Murli du jour du jeudi 31 août 2023

31-08-2023 praatahmurli om shanti "baapdaada"' madhuban

“meethe bachche - apni sthiti saakshi tatha harshit rakhne ke liye smriti mein rahe ki har aatma ka apna-apna part hai, bani banaai ban rahi''

prashn:- tum bachche kis ek purushaartha dvaara apni avastha jama sakte ho?

uttar:- maaya ke toofaanon ko don't care karo aur baap jo shreemat dete hain use kabhi bhi don't care na karo, isse tumhaari avastha achal-adol ho jaayegi, sthiti sada saakshi aur harshit rahegi। tumhaari avastha aisi honi chaahiye jo kabhi bhi rona na aaye। amma mare to bhi halua khaana. . . . .।

geet:- tumheen ho maata, pita tumheen ho…

om shanti। bachchon ne geet suna। aksar karke bhakti maarga vaale mandiron mein jaate hain, chaahe shiv ke, chaahe lakshmi-naaraayan ke, chaahe raadhe-krishna ke ya anya devi-devtaaon ke mandiron mein jaayenge। sabke aage yahi mahima karenge - tvamev maata-cha-pita… phir kehte hain - tvamev vidya dravinam...... maana tum maat-pita bhi ho, padhaane vaale bhi ho। vaastav mein lakshmi-naaraayan va raam-seeta ko tvamev maata-cha-pita nahin kahenge kyonki unhon ko to apne hi bachche honge। woh aisi mahima nahin gaayenge। vaastav mein mahima ek shiv ki hai। woh mahima gaate hain dev-dev mahaadev। maana tum brahma, vishnu, shankar se bhi oonch ho। bhakti maarga mein to koi arth samajh na sake। ab baap kehte hain tumne bhakti bahut ki hai, ab tum mere se samjho aur is par gaur karo ki sach kya hai, jhooth kya hai? tum bachche ab samajhte ho - baap ke baare mein aur devtaaon ke baare mein jo bhi mahima karte hain woh saari wrong hai। abhi jo tumko main samjhaata hoon vahi right hai।

bachchon ko samjhaate hain yeh ulta vriksha hai, iska beej hai parampita paramatma। woh oopar mein rehte hain। woh to chaitanya beej hai na। tum thahre bachche। kai kehte hain ki sab beej aadi mein bhi aatma hai। lekin woh to jad hai na। baap ko kaha hi jaata hai manushya srishti ka chaitanya beejroop। ab manushya gaate hain - O god father। achha, jhaad ko tum chaitanya gyaan saagar nahin kahenge। manushya mein yeh gyaan hai ki yeh beej hai। beej mein zaroor jhaad ka gyaan hona chaahiye। parantu jad hone ke kaaran bata nahin sakte। manushya to samajh jaate hain ki beej neeche hai, unse jhaad nikla hua hai। kalpa vriksha aur banyan tree ki bhent karte hain। woh jad hai, yeh chaitanya hai। kalkatte mein bad ka bahut bada jhaad hai। unka thur saara nikal gaya hai, sirf jhaad khada hai। foundation hai nahin, wonder hai na। baap samjhaate hain is jhaad ka bhi foundation hai nahin। devi-devta dharma praayahlop ho gaya hai, baaki saara jhaad khada hai। kitne math-panth hain! yeh hai behad ka jhaad। behad ka baap baith samjhaate hain। baba likhte bhi hain shivbaaba ka birth de heere jaisa hai kyonki shivbaaba hi kaudi se heere jaisa banaate hain, svarga banaate hain। abhi to bhaarat kitna kangaal ban gaya hai। manushya ham so, so ham kehte hain parantu samajhte to kuchh nahin। ham aatma so paramatma, paramatma so aatma - yeh dhindhora sannyaasiyon ne pitvaaya hai। tum arth sahit jaante ho। ham so brahman bane hain phir ham so devta banenge phir ham so kshatriy..... varna mein aayenge। aatma kehti hai ham in varnon mein jaayenge। ham shoodra the, abhi ham brahman kul mein aaye hain। parampita paramatma hi sabko rachne vaala hai। brahma, vishnu, shankar devtaaon ko bhi rachne vaala woh hai। abhi baap baith bachchon ko samjhaate hain। tum kehte ho tvamev maata-cha-pita. . . . to maata bhi yeh barobar hai। baap baith bachchon ko bahlaate hain। bhakti maarga mein meera bhaktin thi। woh hai bhakta maala। gyaan maala bhi hai। gyaan maala ka naam hai rudra maala। raavan maala nahin kahenge। raavan ki bhakti to nahin karte। raam maala hai। bhal abhi raavan raajya hai parantu raavan ki maala nahin hoti। bhakta maala hoti hai, asuron ki maala to nahin hoti। bhakta shiromni mein ek to meera hai unko shreekrishna ka saakshaatkaar hota tha। lok laaj saari khoi thi। second number mein shiromni bhakta kaun hai? naarad। haan, unka gaayan hai, drishtaanta diya jaata hai। yeh to sab baaten baith banaai hain। real nahin hai।

baap kehte hain ki mel-female sab seetaayen hain। sab raavan ki shokvaatika mein hai। lanka ki baat nahin, bhaarat ki hi baat hai। ek hi baap sarva ka sadgati daata hai। woh ek na ho to bhaarat kuchh kaam ka nahin hai। sabse jaasti patit aur sabse jaasti paavan bhaarat hi banta hai। bhaarat hi sabse bada teertha sthaan hai। bhal apne-apne paigambaron ke teerthon par jaate hain parantu sabka sadgati daata ek baap hai। bhaarat hi avinaashi khanda hai। baap kehte hain main yahaan aakar bhaarat ko jeevanmukti deta hoon, baaki sabko mukti deta hoon, sabka sadgati daata main hoon। sachkhanda sthaapan karne vaala baap ek hi hai। sachkhanda mein raajya karne ke liye bachchon ko laayak banaate hain, khud raajya nahin karte। baap baith samjhaate hain main kalpa-kalpa aata hoon bhaarat ko sadgati dene। baaki sabko gati mein vaapas le jaata hoon। har ek manushya maatra ki jo aatma hai, har ek mein avinaashi part bhara hua hai। isko kaha jaata hai bani banaai ban rahi..... samjho, kiska baap mar gaya, usne jaakar doosra janma liya, ab rone se kya hoga? saakshi hokar dekhna hai। yeh drama hai, ismen rone ki darkaar nahin hai। grihastha vyavhaar mein to rehna hai। amma mare to bhi halua khaao, beebi mare to bhi halua khaao। yeh unhon ke liye hai jo grihastha vyavhaar mein rehte hain। tumhaari avastha aisi honi chaahiye jo kuchh bhi duhkh na ho। behad ke baap ko yaad karte rehna hai। itni adol avastha honi chaahiye jaise angad ko raavan hila nahin saka। maaya hai badi jabardasta। tum stheriyam rehte ho। maaya ke kitne bhi toofaan lage, don't care, ghabraana nahin hai, funk nahin hona hai। purushaartha karke avastha ko jamaana hai। baaten to bahut achhi samjhaate hain। tum samajhte ho ham paarvatiyaan hain, shivbaaba amraktha sunaate hain। amarlok mein hai aadi-madhya-ant sukh। is mrityulok mein to aadi-madhya-ant duhkh hi duhkh hai। tyohaar aadi sab is samay ke hain। lakshmi-naaraayan aadi ka koi tyohaar nahin। woh kya service karte hain। tum brahman bahut service karte ho। devtaaon ki aatma ko social worker nahin kahenge - na jismaani, na roohaani। tum ho roohaani-jismaani double social worker।

achha, manushyon ko nashtomoha banne mein mehnat lagti hai kyonki unke paas koi em object nahin hai। yahaan to tumko praapti bahut hai to bahut nashtomoha hona chaahiye na। ek baba ke saath yog lagaana hai - baba, O meethe-meethe baba, aapko hamne poora jaan liya hai, aage to sirf kahne maatra god father kehte the, abhi to aap aaye ho phir se svarga ki raajaai dene, yeh kaliyug to kabristaan hone vaala hai isliye ham isko kyon yaad karen। baap kehte hain is kabristaan mein, grihastha vyavhaar mein rehte mujhe yaad karo। yeh to bahut sahaj hai। jaise bhakti maarga mein manushya shreekrishna ki pooja karte rehte hain, buddhi dhandhe dhori mein bhaagti rehti hai। man ka ghoda kahaan na kahaan bhaagta rahega, tavaai ke muaaphik। baap kehte hain ki shareer nirvaah karte buddhi ka yog mere saath lagaao। meri yaad se tumhein bahut praapti hogi। aur sabse to alpakaal ki praapti hoti hai। kitni naudha bhakti ki, achha, phir kya hua? saakshaatkaar kiya, bas na। mukti-jeevanmukti to nahin mili। ab baap kehte hain ki tum 21 janmon ke liye vishwa ke maalik bante ho। svarga mein garbha bhi mahal hota hai, yahaan to garbha jel hai। log shreekrishna janmaashtami aadi kitna dhoomdhaam se manaate hain, tumhein sirf manaana nahin hai lekin sabko samjhaana hai ki shreekrishna ka janma kab hua? shreekrishna abhi kahaan hai? tum jaante ho abhi ham krishnapuri ka maalik banne ke liye padh rahe hain। baap ke paas baithe hain। baap ko haath jode jaate hain kya? teacher padhaate hain to kya unko haath jodna hota hai, mahima karni hoti hai? teacher se to padhna hai। bachche baap ko ghadi-ghadi haath jodte hain kya? is samay to tum ghar mein ho। tumko bhaasna aati hai yeh baap bhi hai, patit-paavan bhi hai। is samay 5 vikaaron ka grahan lagne ke kaaran tum bilkul hi kaale ban gaye ho। 5 vikaaron ne kaala kar diya hai। satayug mein tum gore sundar the, abhi shyaam ho। shreekrishna sundar tha, abhi shyaam hai। kitne baari shyaam aur sundar bana hoga! kansapuri hi krishnapuri ban jaati hai। krishnapuri phir kansapuri ban jaati hai।

tum aatmaayen hi to brahmaanda ki rahne vaali ho। brahm tatva kaha jaata hai। aham brahm kehna bhi bhram hai। tum brahmaanda ke maalik ho। tumhaara sinhaasan brahmaanda hai। baap kehte hain main to brahmaanda ka maalik hoon hi। tum aatmaayen bhi kehti ho - hamaara desh vaastav mein brahmaanda hai। vahaan tumhaari aatmaayen pavitra hain। tum brahmaanda ke maalik ho to phir vishwa ke bhi maalik ho। main to sirf brahmaanda ka hi maalik hoon। mujhe is puraane tan mein aana padta hai, jisne poore 84 janma liye hain। bachchon ko murli achhi tarah 5-6 baar padhna va sunna chaahiye tab hi buddhi mein baithegi aur khushi ka paara chadhega। maaya ghadi-ghadi yaad bhula deti hai। ismen koi hath aadi karne ki baat nahin। phursat mili, achha, baba ko yaad karna hai kachhue misal। sabse achha hai - amritvele ka time। uska asar saare din rahega। yeh bhi bachchon ko samjhaaya gaya hai ki pahle khilaane vaale ko khilaakar phir khaana hai। shivbaaba ke yagya se khaate hain to pahle unko bhog lagaana pade। yeh sab sookshm vatan mein saakshaatkaar hote hain। drama mein noondh hai। tumko bhog lagaana hai shivbaaba ko। woh to niraakaar hai। gaaya bhi jaata hai devtaaon ke liye - unko brahma bhojan ki aash thi kyonki tum brahma bhojan khaakar brahman se devta bante ho। sookshm vatan mein devtaayen aate hain, mahphil lagti hai, yeh sab khel-paal hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) buddhi mein poori em object rakh nashtomaaha banna hai। is kabristaan ko bhool baap ko yaad karna hai। roohaani jismaani seva karni hai।

2) khilaane vaale ko khilaakar phir khaana hai। amritvele ka samay achha hai isliye us samay uthkar baap ko yaad karna hai। murli 5-6 baar sunni va padhni zaroor hai।

vardaan:- alaukik swaroop ki smriti dvaara alaukik karma karne vaale sada samartha aatma bhav

brahman jeevan arthaat alaukik, heere tulya amoolya jeevan। is alaukik jeevan ki smriti se va alaukik swaroop mein sthit rahne se saadhaaran chalan, saadhaaran karma nahin ho sakta। jo bhi karma karenge woh alaukik hi hoga kyonki jaisi smriti hoti hai vaisi sthiti hoti hai। smriti mein rahe ek baap doosra na koi। to baap ki smriti sada samartha bana degi isliye har karma bhi shreshtha, alaukik hoga।

slogan:- sva-unnati ka yathaartha chashma pahan lo to sabki visheshtaayen hi dikhaai dengi।