Murli du jour du mercredi 6 décembre 2023

06-12-2023 praatahmurli om shanti "baapdaada"' madhuban

“meethe bachche - main tumhein phir se raajayog sikhlaakar raajaaon ka raaja banaata hoon, is ‘phir se' shabd mein hi saara chakra samaaya hua hai''

prashn:- baap bhi prabal hai to maaya bhi? donon ki prabalta kya hai?

uttar:- baap tumhein patit se paavan banaate, paavan banaane mein baap prabal hai isliye baap ko patit-paavan sarva-shaktimaan kaha jaata hai। maaya phir patit banaane mein prabal hai। sachchi kamaai mein grihchaari aisi baithti hai jo phaayde ke badle ghaata ho jaata hai, vikaaron ke peechhe maaya tavaai bana deti hai isliye baba kehte - bachche, dehi-abhimaani banne ka purushaartha karo।

geet:- humein un raahon par chalna hai…

om shanti। tum bachchon ko kin raahon par chalna hai? zaroor raah bataane vaala hoga। manushya wrong raaste par chalte hain tab to duhkhi hote hain। abhi kitne duhkhi hain kyonki unki mat par nahin chalte। sab ulti mat par chalte aaye hain, jab se ulti mat dene vaale raavan ka raajya shuru hua hai। baap samjhaate hain tum is samay raavan ki mat par ho, tab harek ka aisa bura haal hua hai। sab apne ko patit kehte bhi hain। gaandhi baapu ji bhi kehte the - patit-paavan aao, goya ham patit hain। parantu koi bhi samajhte nahin ki ham patit kaise bane hain? chaahte hain bhaarat mein raam raajya ho parantu kaun banaayega? geeta mein baap ne sab baaten samjhaai hain, parantu geeta ke bhagwan ka hi naam ulta laga diya hai। baap samjhaate hain tumne kya kar diya hai। Christ ke Bible mein pope ka naam daal den to kitna nuksaan ho jaae। yeh bhi drama hai। baap bade se badi bhool samjhaate hain। yeh aadi, madhya, ant ka gyaan geeta mein hai। baap samjhaate hain main tumko phir se raajaaon ka raaja banaata hoon। tumne 84 janma kaise liye - yeh tum nahin jaante ho, ham bataate hain। yeh koi bhi shaastra mein nahin hai। shaastra to anek hain। bhinna-bhinna maten hain। geeta maana geeta। jisne geeta gaai hai usne hi raay di hai। kehte hain main tumko raajayog sikhaane phir se aaya hoon। tum par maaya ka parchhaaya pad gaya hai। abhi phir se main aaya hoon। geeta mein bhi kehte hain he bhagwan phir se geeta sunaane aao arthaat phir se geeta ki knowledge do। geeta mein hi yeh baat hai ki aasuri srishti ka vinaash aur daivi srishti ki sthaapna phir se hoti hai। phir zaroor kahenge। guroonaanak phir se aayega apne samay par, chitra bhi dikhaate hain। shreekrishna bhi phir se vahi mor mukut vaala hoga। to yeh sab raaz geeta mein hain। parantu bhagwan ko badal diya hai। ham aise nahin kehte ki geeta ko nahin maante parantu usmein jo yeh ulta naam manushyon ne daal diya hai, usko baap aa karke seedha karke samjhaate hain। yeh bhi samjhaate hain har ek aatma mein apna-apna part noondha hua hai। sab ek samaan nahin ho sakte। jaise manushya maana manushya, vaise aatma maana aatma। parantu har ek aatma mein apna part bhara hua hai। yeh baaten samjhaane vaala bada buddhivaan chaahiye। baap jaante hain kaun samjha sakte hain, kaun service karne mein samajhdaar hain, kiski line clear hai। dehi-abhimaani rehte hain। sab to paripoorna, dehi-abhimaani nahin bane hain। yeh to ant mein result hogi। imtahaan ke din jab nazdeek hote hain to maaloom pad jaata hai kaun-kaun paas honge। teachers bhi samajh sakte hain aur bachche bhi samajhte hain ki yeh sabse teekha hai। vahaan to thagi aadi bhi ho sakti hai। yahaan to yeh baat ho na sake। yeh to drama mein noondh hai। kalpa pahle vaale hi niklenge। humein pata chalta hai service ki raphtaar se। is sachchi kamaai mein ghaata aur laabh, grihchaari aadi aati hai। chalte-chalte taang toot padti hai। gandharvi vivaah karne baad phir maaya ekdam tavaai bana deti hai। maaya bhi badi prabal hai। baba prabal hai paavan banaane mein, isliye unko sarvashaktimaan patit-paavan kaha jaata hai aur phir maaya prabal hai patit banaane mein। satayug mein to maaya hoti nahin। woh hai hi viceless world, abhi hai ekdam vicious world। kitni jabardasta prabalta hai। chalte-chalte maaya ekdam naak se pakad tavaai bana deti hai, phaarakti dila deti hai, itni prabal hai। bhal sarvashaktimaan parampita paramatma ko kehte hain parantu maaya bhi kam nahin hai। aadhaakalpa unka raajya chalta hai। yeh koi thode hi jaante hain। din aur raat aadha-aadha hota hai, brahma ka din, brahma ki raat। phir bhi satayug ko laakhon varsha, kaliyug ko kitne varsha de dete hain। abhi baap samjhaate hain to samajh mein aata hai। yeh to bilkul right hai। baap baith padhaate hain। kaliyug mein manushya thode hi geeta ka raajayog sikhaae raajaaon ka raaja banaayenge। aise to koi hai nahin, jiski buddhi mein ho ki ham raajayog seekh raajaaon ka raaja banenge। vo geeta paathshaalaayen to anek hain parantu koi raajayog seekh raajaaon ka raaja va raani ban nahin sakte। koi bhi em object raajaai paane ka nahin hai। yahaan to kehte ho ham behad ke baap se bhavishya sukh ki raajaai paane ke liye padhte hain। pahle-pahle to alpha par samjhaana hai। geeta par hi saara madaar hai। manushyon ko kaise pata pade srishti chakra kaise phirta hai, ham kahaan se aaye hain, phir kahaan jaana hai। koi ko pata nahin hai। kaun desh se aaya, kaun desh hai jaana। geet bhi hai na, sirf tote muaaphik gaate rehte hain। buddhi jo aatma mein hai woh nahin jaanti ki ham jisko he parampita paramatma kehte hain woh kaun hai। unko na dekh sakte hain, na jaan sakte hain। aatma ka to farja hai na - baap ko jaanna, dekhna। abhi tum samajh gaye ho, ham aatma hain parampita paramatma baap hamko padhaate hain। buddhi kehti hai baap aakar padhaate hain। jaise kiski aatma ko bulaate hain to samajhte hain na unki aatma aai hai। to tum samajhte ho ham aatma hain, hamaara woh baap hai। baap se zaroor varsa milna chaahiye। ham duhkhi kyon hue hain, manushya to kah dete baap hi sukh duhkh dene vaala hai। bhagwan ko gaali dete rehte hain। woh hain aasuri santaan। jaise kalpa pahle kaha hai vaise kehte hain। tum abhi practical mein eeshvareey santaan bane ho। aage tum aasuri aulaad the। ab baap kehte hain nirantar mujhe yaad karo। kisko bhi yeh do akshar samjhaana bahut sahaj hai। tum bhagwan ke bachche ho। bhagwan ne svarga racha, ab narka bana hai phir svarga baap hi rachenge। baap hamko raajayog sikhla rahe hain, svarga ki sthaapna kar rahe hain। achha, shiv ko nahin jaante ho। prajaapita brahma ko bhi rachne vaala woh baap hai। to zaroor baap brahma dvaara hi sikhaayenge। abhi shoodra varna hai। ham brahman se devta kshatriy banenge। nahin to viraat roop kyon banaaya hai, chitra theek hai। parantu samajh nahin sakte।

shoodron ko brahman kaun banaayenge? zaroor prajaapita brahma chaahiye। unko kaise adopt kiya। jaise tum kehte ho yeh meri stri, unko ‘meri' kaise banaaya? adopt kiya। baap kehte hain mujhe bhi maat-pita kehte ho, main baap to hoon। meri kahaan se laaoon। to inmen pravesh kar inka naam brahma rakhta hoon। stri adopt ki jaati hai, jaise laukik baap stri ko adopt kar kukh vanshaavli rachte hain, baba ne phir inmen pravesh kar inko adopt kar inke mukh dvaara mukhvanshaavli banaai hai। tum kehte ho ham brahman-braahmaniyaan hain। zaroor inka hi naam brahma hai। brahma kiska bachcha? shivbaaba ka। inko kisne adopt kiya? behad ke baap ne। drishtaanta bada achha hai parantu jiski buddhi mein baitha hoga woh samjha sakenge। buddhi mein nahin hoga to unko samjhaane aayega hi nahin। laukik aur paarlaukik baap to hai na। woh bhi stri ko adopt kar meri kehte hain। yeh phir inmen pravesh kar adopt karte hain। khud kehte hain mujh niraakaar ko inka aadhaar lena padta hai, to naam bhi badli karta hoon। ek hi time kitnon ke naam rakhe। naam ki list bhi tumhaare paas honi chaahiye। pradarshani mein naam ki list bhi dikhaani chaahiye। baba ne kaise ek hi samay naam rakhe। baba ne hamko apna banaaya to naam badlaaya, unko bhrigu rishi kehte hain। janma patri to bhagwan ke paas hi hai। wonderful naam hain। ab sabhi to hain nahin। koi to aashcharyavat bhaaganti ho gaye। aaj hain, kal hain nahin। number one dushman hai kaam। yeh kaam vikaar bahut tang karta hai। us par jeet paani hai। grihastha vyavhaar mein ikatthe rahkar un par jeet paani hai - yeh hai pratigya। apni vritti dekhni hai, karmendriyon se vikarma nahin karna hai। toofaan to sabko aate hain। ismen darna nahin hai।

baba se bahut bachche poochhte hain yeh dhandha karen va nahin karen? baba likhte hain main koi tumhaare dhandhe aadi ko dekhne aaya hoon kya? main to teacher hoon, padhaane ke liye। dhandhe ki baat hamse kyon poochhte ho? main to raajayog sikhaata hoon। rudra yagya bhi gaaya hua hai, shreekrishna yagya nahin। baap kehte hain lakshmi-naaraayan mein yeh srishti chakra ka gyaan hi nahin। agar yeh maaloom ho ki 16 kala se phir 14 kala banna hai to usi samay hi raajaai ka nasha ud jaae। vahaan to hai hi sadgati। sadgati daata to ek hai। vahi aakar yukti bataate hain, doosra koi batla na sake। pahle-pahle yeh baat uthaao ki kisne kaha hai - kaam mahaashatru hai? yeh bhi gaate hain vicious world aur viceless world। bhaarat mein hi raavan ko jalaate rehte hain। satayug mein thode hi jalaayenge। agar yeh kehte hain ki anaadi hai, satayug mein bhi tha phir to sab jagah duhkh hi duhkh hoga। phir svarga kaise kahenge? yeh baaten samjhaani hai। harek ki raphtaar apni hai। pata lag jaata hai - kaun achhi raphtaar vaala hai? sampoorn to koi bane nahin hain। baaki haan, sato, rajo, tamo to hote hi hain। buddhi har ek ki alag-alag hai। jo shreemat par nahin chalte hain - woh hain tamopradhaan buddhi। apne ko insure nahin karenge to bhavishya 21 janmon ke liye kaise milega। marna to hai hi। to kyon na insure kar dena chaahiye। sab kuchh unka hai। to paravrish bhi woh karenge। bhal koi sab kuchh dete hain, parantu service nahin karte, jo diya woh khaate rehte hain। to baaki jama kya hoga। kuchh bhi nahin। service ka saboot chaahiye। dekha jaata hai - kaun pande ban aate hain? naye bi.ke. bhi aapas mein centre chalaate hain, unko bhi aaphreen di jaati hai। yeh knowledge to badi sahaj hai। vaanaprastha avastha vaalon ko jaakar samjhaao - vaanaprastha avastha kab hoti hai? baap hi guide ban sabko le jaayenge। tum jaante ho baap hi kaalon ka kaal hai। ham to khushi se baba ke saath ikatthe jaana chaahte hain।

pahle-pahle to mukhya baat yeh uthaao - geeta ka bhagwan kaun hai, jisne rachna rachi? lakshmi-naaraayan ko raajayog kisne sikhaaya? unki bhi raajdhaani sthaapan ho rahi hai। aur koi raajdhaani sthaapan karne aate nahin। baap hi raajdhaani sthaapan karne aate hain। sab patiton ko paavan banaate hain। yeh hai vicious world, woh hai viceless world। donon mein nambarvaar martabe hain। jo shreemat par chalne vaale honge, unki buddhi mein hi yeh baaten baith sakti hain। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) buddhi ki line sada clear rahe iske liye dehi-abhimaani rehna hai। sachchi kamaai mein maaya kisi prakaar se ghaata na daal de - yeh sambhaal karni hai।

2) karmendriyon se koi bhi vikarma nahin karna hai। insure karne ke baad service bhi zaroor karni hai।

vardaan:- maaya ko dushman ke bajaae paath padhaane vaali sahayogi samajh ekras rahne vaale maayaajeet bhav

maaya aati hai aapko paath padhaane ke liye, isliye ghabraao nahin, paath padh lo। kabhi sahansheelta ka paath, kabhi shant swaroop banne ka paath pakka karaane ke liye hi maaya aati hai, isliye maaya ko dushman ke bajaae apna sahayogi samjho to ghabraahat mein haar nahin khaayenge, paath pakka karke angad ke samaan achal ban jaayenge। kabhi bhi kamjor ban maaya ka aahvaan nahin karo to woh vidaai le legi।

slogan:- har sankalp mein dridhta ki mahaanta ho to saphalta milti rahegi।