Murli du jour du mardi 19 décembre 2023

19-12-2023 praatahmurli om shanti "baapdaada"' madhuban

“meethe bachche - service ki vriddhi ke naye-naye tareeke nikaalo, gaanv-gaanv mein jaakar service karo, service karne ke liye gyaan ki paraakaashtha chaahiye''

prashn:- buddhi se puraani duniya bhoolti jaae - iski sahaj yukti kya hai?

uttar:- ghar ko ghadi-ghadi yaad karo। buddhi mein rahe - ab mrityulok se hisaab-kitaab chuktu kar amarlok jaana hai। deh se bhi beggar, yeh deh bhi apni nahin - aisa abhyaas ho to puraani duniya bhool jaayegi। is puraani duniya mein rehte apni paripakva avastha banaani hai। ekras avastha ke liye mehnat karni hai।

geet:- maata O maata…

om shanti। jagat amba ki mahima bhaarat mein bahut hai। jagat-amba ko bhaaratvaasiyon ke sivaae koi bhi jaante nahin। naam suna hai jisko Eve arthaat beebi bhi kehte hain। ab tum bachchon ki buddhi mein hai ki beebi aur maalik ke sivaae rachna to rachi nahin ja sakti। zaroor jagat amba ko prakat hona pade। zaroor thi tab to gaayan karte hain। bhaarat ki mahima bahut hai। svarga bhi kehte hain aur yeh bhi jaante hain ki bhaarat hi praacheen tha isliye zaroor heaven hona chaahiye। yeh tum eeshvareey santaan bigar koi samajh na sake। jinhonne kalpa pahle samjha hai vahi aate rahenge। pradarshani chalti hai। samajhte hain kalpa pahle bhi ki hogi। sabko samjhaane ke liye akshar bahut achhe hain। pavitra aatma, pavitrata se tum light ka taaj paate ho। doosra punya aatma usko kaha jaata hai jo daan-punya karte hain। usko angreji mein philanthropist bhi kaha jaata hai। pavitra ko viceless kahenge। alag-alag akshar hain। bhaarat mein daan-punya hota to bahut hai parantu aksar karke daan karte hain gurooon ko। ab unhein pavitra aatma to bhal kahen parantu punya aatma nahin kah sakte। woh daan-punya nahin karte hain woh to daan-punya lete hain। to in sabse buddhiyog tootkar baap se jut jaae, iske liye baap ko samjhaana padta hai ki yeh theek nahin hai। in sabka uddhaar karne main aata hoon। tum gyaan saagar se nikli hui gyaan gangaayen ho। vaastav mein ganga akshar right nahin hai parantu gaayan chala aata hai isliye bhent ki jaati hai। baap aakar puraani duniya ki puraani sab cheezon ko naya banaate hain। svarga nai cheez hai। nai cheez ka samaachaar baap hi jaante hain, duniya nahin jaanti।

bhagvaanuvaach hai parantu geeta mein shreekrishna ka naam daalne se sabka buddhiyog toot gaya hai isliye sarvavyaapi kah diya hai। shreekrishna ke saath bahuton ka buddhiyog hai, jahaan bhi geeta ka maan hai to jaise shreekrishna ka maan hai। vaastav mein baap ke mahima ki topi bachche ke oopar aa gai hai। yeh bhi drama mein noondh hai। yeh baap aakar samjhaate hain।

baba baar-baar samjhaate hain - jab koi aate hain to har ek ka occupation poochho isse tumhaara kya sambandh hai? baba ne prashnaavli achhi banaai hai। service to bahut achhi ho sakti hai। service to jagat amba ke mandir mein bahut achhi ho sakti hai, vahaan jaakar samjhaao ki yeh hai jagat amba srishti ko rachne vaali maata। kaun-si duniya rachti hai? zaroor nai rachna rachegi। achha, is maata ka pita kaun hai? inko janma kisne diya? manushya to mukh vanshaavli ka arth bhi nahin samajhte hain। tum jaante ho inko parampita paramatma ne janma diya hai। tum bachchon ko hi samjhaana pade। jagat amba mukh vanshaavli hai parantu kaise? parampita paramatma to niraakaar hai, samjhaaya jaata hai brahma tan se। parampita paramatma ne aakar jaise is brahma ko adopt kiya, vaise bachchi ko bhi kiya। yeh baaten sabki buddhi mein sthaai nahin thaharti। ghadi-ghadi bhool jaate hain। bachche service to bahut kar sakte hain। jagat amba ke mandir mein parichay dena chaahiye। to unhon ka bhi buddhiyog baap se jute। jagat amba bhi unse yog lagaati hai to ham bhi unse yog lagaayen। neeche jagat amba tapasya mein baithi hai, unka mandir oopar hai। neeche raajayog ki tapasya kar rahe hain phir raaj-raajeshvari svarga ki maalik bani satayug mein। abhi hai kaliyug। phir se jab tapasya mein baithe tab to svarga ke maalik bane na। tumhaari buddhi mein yeh saara gyaan rehna chaahiye। yeh sachchi raay manushyon ko di jaati hai। tum har ek ka parichay dete ho। parantu sabki buddhi mein koi jaldi thode hi baith sakta hai। baithe tab jab service mein lag jaayen। chitra bhi bahut achhe bane hue hain। lakshmi-naaraayan ke mandir mein jaakar samjha sakte ho। baba kehte hain - mere bhakton ko sunaao। bhakta zaroor mandir mein hi milenge। unko pyaar se samjhaao yeh jo lakshmi-naaraayan ke chitra hain, inke liye sabhi kahenge yeh svarga ke maalik the। achha, ab kya hai? zaroor kahenge kaliyug। kaliyug mein duhkh hi duhkh hai phir inko baadshaahi kaise mili? tum jaante ho to sabko suna sakte ho। ek ko samjhaayenge to satsang ikattha ho jaayega। phir sab kahenge - hamaare paas aao। mandir mein bada mela lagta hai। raam ke bhi mandir mein jaakar unka occupation bata sakte ho। aahiste-aahiste yukti se samjhaana chaahiye। kai bachche likhte bhi hain - baba, hamne aise-aise samjhaaya। ek ko samjhaane se phir doosre nimantran dete hain। hamaare ghar mein bhi saat roz bhaashan chale to achha hai phir vahaan se aur koi niklega। koi bhi nimantran de unko aisa samjhaana chaahiye jo chhode nahin। bhaashan karne se aas-paas vaale mitra sambandhi aadi bhi ikatthe honge। aise hi vriddhi hoti hai। centre par itne nahin aa sakte hain। yeh achhi yukti hai। aisi mehnat karni chaahiye। mehnat karne ka dhang mushkil kisko aata hai। gyaan ki paraakaashtha chaahiye। baba kitni door se hamko sikhaane aaya hai। agar service nahin karenge to oonch pad kaise paayenge? school mein bachche bahut achhe chamatkaari hote hain, uchhalte rehte hain। yeh bhi padhaai hai, yeh wonderful padhaai hai - ismen boodhe, javaan, bachche sab padhte hain। gareebon ko aur hi achha chance hai। sannyaasi bhi vaastav mein gareeb hain। kitne bade-bade dhanvaan manushya apne paas bulaate hain। sannyaasiyon ne gharbaar chhoda beggar hue। kuchh bhi unhon ke paas nahin hai। tum bhi abhi beggar ho phir prince bante ho। woh bhi beggar hain, ismen pavitrata ki baat hai। tumhaare paas aur kuchh nahin hai। tum deh ko bhi bhool jaate ho। deh sahit sab kuchh tyaag kar ek baap ke bante ho। jitna ek baap ko yaad karenge utni dhaarna hogi। ekras dhaarna ho jaae uske liye mehnat chaahiye। hamko baba ke paas jaana hai to is puraani duniya ka khyaal kya rakhen। jab tak paripakva avastha ho tab tak rehna is puraani duniya, puraane shareer mein hai।

ab tumhein grihastha vyavhaar mein rahkar pavitra banna hai। is mrityulok se hisaab-kitaab chuktu hota hai। ab amarlok jaana hai। ghar ko ghadi-ghadi yaad karne se puraani duniya bhoolti jaayegi। bolo, geeta mein baba ne kya kaha hai? bhagwan ko baba kaha jaata hai। niraakaar baba kehte hain - maamekam yaad karo। yog agni se tumhaare vikarma vinaash honge। yeh bhagwan ke mahaavaakya hain ki is puraani duniya aur puraani deh ko bhi chhodo। dehi-abhimaani bankar nirantar baba ko yaad karo। bhagwan hai niraakaar। aatma shareer lekar talkie banti hai। baba to garbha se janma nahin lete। unka naam ek hi shiv hai। brahma, vishnu, shankar ko apna sookshm shareer hai। yeh hai hi niraakaar parampita paramatma। phir unka naam hai shiv। vahi gyaan ka saagar hai। brahma, vishnu, shankar ko rachta nahin kahenge। rachayita ek hi niraakaar ko kaha jaata hai। woh phir saakaari rachna kaise rache? to brahma dvaara aakar samjhaate hain। shreekrishna to ho na sake। brahma ke haath mein hi ved-shaastra dikhaate hain। gaaya bhi hua hai brahma dvaara sthaapna, brahma dvaara sabhi shaastron ka saar sunaate hain। niraakaar sunaate hain saakaar dvaara। yeh baaten achhi reeti dhaaran karni pade। bhagvaanuvaach - main raajayog sikhlaata hoon। vinaash ke pahle sthaapna bhi zaroor chaahiye। pahle-pahle hai sthaapna। bada hi clear likhte rehte hain। brahma dvaara sooryavanshi gharaane ki sthaapna। likhat mein bada achha raaz hai parantu jabki koi mehnat kar aur service mein lag jaae। service mein lag jaane se phir maja aayega। mama-baba ko bhi service mein maja aata hai। bachchon ko bhi service karni hai, mama ko to mandir mein nahin le jaayenge। mama ki to badi mahima hai, bachchon ko to jaana hi pade। baba kehte hain vaanaprasthiyon ke paas jaakar unhon se prashn poochho phir samjhaao ki kabhi geeta adhyayan ki hai? geeta ka bhagwan kaun hai? bhagwan to ek hi niraakaar hota hai। saakaar ko bhagwan nahin kahenge। bhagwan ek hai। ismen service ka bahut vichaar saagar manthan chalna chaahiye। practice karni hai to baahar jaakar trial karni chaahiye। jagat amba ka darshan karne roz aate hain। triveni par bhi manushya bahut jaate hain। vahaan bhi jaakar service kare, bhaashan kare to dher aakar ikatthe honge। nimantran dete rahenge - hamaare paas aakar satsang karo। baba-mama to kahaan ja nahin sakte, bachche ja sakte hain। bangaal mein kaali ka mandir hai vahaan bhi bahut service kar sakte ho। kaali kaun hai? is par bhaashan karo। parantu himmat chaahiye। baba jaante hain kaun samjha sakte hain? jinmen deh-abhimaan hai woh kya service kar sakenge? service ka saboot nahin dete। service agar poori nahin ki to naam badnaam karenge। yogi mein bal bada achha rehta hai। samjhaane ke liye points bahut dete rehte hain। parantu achhe-achhe mahaarthi bhi bhool jaate hain। service to bahut hai, isko kaha jaata hai behad ki service phir woh maan bhi bahut paate hain। mukhya hai pavitrata ki baat। chalte-chalte toot padte hain। laukik baap se kabhi kisko bhi nishchay nahin tootta। yahaan baba ke paas janma lete hain। aise baap ko phir ghadi-ghadi bhool jaate hain kyoki vichitra hai aise baap ka chitra nahin hai। baap kehte hain mujhe yaad karo aur tum pavitra bano to mere paas aa jaayenge। aatma samajhti hai - hamne hi 84 janmon ka part bajaaya hai। aatma mein part noondha hua hai। shareer mein thode hi part hai। itni chhoti si aatma mein kitna bhaari part hai! yeh buddhi mein kitna nasha rehna chaahiye, vyavhaar ke saath-saath yeh service bhi kar sakte hain। maa-baap to kahaan bhi nahin jaayenge। bachche kahaan bhi jaakar service kar sakte hain। bachchon ko hi lucky stars kaha jaata hai। achha!

meethe-meethe gyaan lucky sitaaron ko maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) deh-abhimaan chhod service karni hai। vichaar saagar manthan kar behad ki service ka saboot dena hai।

2) is mrityulok se puraane sab hisaab-kitaab chuktu karne hain। puraani deh aur puraani duniya ko buddhi se bhoolte jaana hai।

vardaan:- ek ki smriti dvaara ekras sthiti banaane vaale oonch pad ke adhikaari bhav

ekras sthiti banaane ke liye sada ek ki smriti mein sthit raho। agar ek ke bajaae doosra koi bhi yaad aaya to ekras ke bajaae bahuras sthiti ho jaayegi। jis samay aur koi ras akarshit karta hai, usi samay yadi aapka antim samay aa jaae to oonch pad nahin mil sakta, isliye har second attention rakho। sadaiv ek ka paath pakka ho, ek baap, ek hi sangam ka samay hai aur ekras sthiti mein rehna hai to oonch pad ka adhikaar mil jaayega।

slogan:- shuddh sakanlpon ka bhojan sveekaar karne vaale hi sachche-sachche vaishnav hain।