Murli du jour du lundi 29 avril 2024

29-04-2024 praatahmurli om shanti "baapdaada"' madhuban

“meethe bachche - yeh sachcha-sachcha sat ka sang hai oopar chadhne ka, tum abhi sat baap ke sang mein aaye ho isliye jhooth sang mein kabhi nahin jaana''

prashn:- tum bachchon ki buddhi kis aadhaar par sada behad mein tik sakti hai?

uttar:- buddhi mein svadarshan chakra phirta rahe, jo kuchh drama mein chal raha hai, yeh sab noondh hai। second ka bhi farka nahin pad sakta। world ki history-geography repeat honi hai। yeh baat buddhi mein achhi tarah aa jaaye to behad mein tik sakte ho। behad mein tikne ke liye dhyaan par rahe ki ab vinaash hona hai, humein vaapis ghar jaana hai, paavan ban karke hi ham ghar jaayenge।

om shanti। meethe-meethe roohaani bachchon prati roohaani baap baith samjhaate hain। samjhaate unko hain jo besmajh hain। school mein teacher padhaate hain kyonki bachche besmajh hain। bachche padhaai se samajh jaate hain। tum bachche bhi padhaai se samajh jaate ho। hamko padhaane vaala kaun hai! yeh to kabhi bhoolo nahin। padhaane vaala teacher hai, supreme baap। to unki mat par chalna hai। shreshtha banna hai। shreshtha te shreshtha hote hain sooryavanshi। bhal chandravanshi bhi shreshtha hain। parantu yeh hain shreshtha te shreshtha। tum yahaan aaye ho shreshtha te shreshtha banne। tum bachche jaante ho hamko aisa banna hai। aisa school 5 hazaar varsha baad hi khulta hai। yahaan tum samajhkar baithe ho, yeh sachmuch sat ka sang hai। sat hai oonche te oonch, unka tumko sang hai। woh baithkar satayug ka shreshtha te shreshtha devta banaate hain arthaat phool banaate hain। tum kaante se phool bante jaate ho। koi phauran ban jaate hain, koi ko time lagta hai। bachche jaante hain yeh hai sangamayug। so bhi sirf bachche jaante hain, nishchay hai ki yeh purooshottam banne ka yug hai। purooshottam bhi kaun-sa? oonch te oonch aadi sanaatan devi-devta dharma ke jo mahaaraaja-mahaaraani hain, woh banne liye tum yahaan aaye ho। tum samajhte ho ham aaye hain behad ke baap se behad ka satayugi sukh lene। had ki jo bhi baaten hain woh sab khatma ho jaati hain। had ke baap, had ke bhaai, chaache, kaake, maame, had ki paai-paise ki milkiyat aadi jismen bahut moh rehta hai, yeh sab khalaas ho jaana hai। baap samjhaate hain yeh milkiyat sab had ki hai। abhi tumko behad mein chalna hai। behad milkiyat praapta karne ke liye tum yahaan aaye ho। aur to sab hain had ki cheejen। shareer bhi had ka hai। beemaar padta hai, vinaash ho padta hai। akaale mrityu ho jaata hai। aajkal to dekho kya-kya banaate rehte hain! science ne bhi kamaal kar di hai। maaya ka pomp kitna hai। science vaale khoob himmat kar rahe hain। jinke paas bahut mahal maadiyaan aadi hain woh to samajhte hain abhi hamaare liye satayug hai। yeh nahin samajhte ki satayug mein ek dharma hota hai। woh nai duniya hoti hai। baap kehte hain bilkul hi besmajh hain। tum kitne samajhdaar bante ho। oopar chadhte ho phir seedhi neeche utarte ho। satayug mein tum samajhdaar the phir 84 janma lete-lete besmajh bante ho। phir baap aakar samajhdaar banaate hain, jisko paarasbuddhi kehte hain। tum jaante ho ham paarasbuddhi bahut samajhdaar the। geet bhi hai na। baba aap jo varsa dete hain, saari jameen, aakaash ke ham maalik ban jaate hain। koi bhi hamse chheen nahin sakta। koi ka dakhal nahin ho sakta। baap bahut-bahut dete hain। isse jaasti koi jholi bhar na sake। jab aisa baap mila hai, jisko aadhaakalpa yaad kiya hai। duhkh mein simran karte hain na। jab sukh mil jaata hai phir simran karne ki darkaar nahin। duhkh mein sab simran karte hain - haay raam… aise anek prakaar ke akshar bolte hain। satayug mein aisa koi bhi akshar hota nahin। tum bachche yahaan aaye ho padhne ke liye - baap ke sammukh। baap ke direct versions sunte ho। indirect gyaan baap dete nahin। gyaan direct hi milta hai। baap ko aana padta hai। kehte hain meethe-meethe bachchon ke paas aaya hoon। mujhe bulaate ho - ‘O baapdaada'। baap bhi response karte hain ‘O bachchon', ab mujhe achhi reeti yaad karo, bhoolo nahin। maaya ke vighna to anek aayenge। tumhaari padhaai chhudaae tumko deh-abhimaan mein laayenge, isliye khabardaar raho। yeh sachcha-sachcha satsang hai - oopar chadhne ka। woh sab satsang aadi hain utraai ke। sat ka sang ek hi baar hota hai, jhooth sang janma-janmaantar anek baar hote hain। baap bachchon ko kehte hain yeh tumhaara antim janma hai। ab vahaan chalna hai, jahaan koi apraapta vastu nahin hoti। jiske liye hi tum purooshaartha kar rahe ho। yeh jo baba kehte hain yeh to tum abhi sunte ho, vahaan yeh kuchh bhi pata nahin padega। abhi tum kahaan jaate ho? apne sukhdhaam mein। sukhdhaam tumhaara hi tha। tum sukhdhaam mein the, ab duhkhadhaam mein ho। baba ne bahut-bahut sahaj raasta bataaya hai, vahi yaad karo। hamaara ghar hai shantidham, vahaan se ham svarga mein aayenge। aur koi svarga mein aata hi nahin hai, sivaae tumhaare। to tum hi simran karenge। ham pahle sukh mein jaate hain phir duhkh mein। kaliyug mein sukhdhaam hota hi nahin। sukh milta hi nahin isliye sannyaasi bhi kehte - sukh kaag vishta samaan hai।

abhi bachche samajhte hain baba aaya hai, hamko ghar le chalne। ham patiton ko paavan banaakar le jaayenge। paavan banenge yaad ki yaatra se। yaatra par bahut neeche-oopar hote hain। koi to beemaar pad jaate hain phir laut aate hain। yeh bhi aise hain। yeh hai roohaani yaatra, ant mati so gati ho jaayegi। ham apne shantidham mein ja rahe hain। hai bahut sahaj। parantu maaya bahut bhulaati hai। tumhaari yuddha maaya ke saath hai। baap bahut sahaj kar samjhaate hain, ham abhi shantidham jaate hain। baap ko hi yaad karte hain। daiveegun dhaaran karte hain। pavitra bante hain। 3-4 baaten mukhya hain jo buddhi mein rakhni hain - vinaash to hona hi hai, 5 hazaar varsha pahle bhi ham gaye the। phir pahle-pahle ham hi aayenge। gaayan bhi hai na - raam gayo, raavan gayo। jaana to sabko hai shanti-dhaam। tum jo padhte ho - us padhaai anusaar pad paate ho। tumhaari em object saamne khadi hai। koi kahe ham saakshaatkaar karen। yeh chitra (lakshmi-naaraayan ka) saakshaatkaar nahin to phir kya hai! iske sivaae kiska saakshaatkaar karna hai? behad ke baap ka? aur to koi saakshaatkaar kaam ke nahin। baba ka saakshaatkaar chaahte hain। baba se meethi aur koi cheez nahin। baap kehte hain - meethe bachchon, pahle apna saakshaatkaar kiya hai? aatma kehti hai ki baba ka saakshaatkaar karen। to apna saakshaatkaar kiya hai? yeh to tum bachche jaan gaye ho। ab samajh mili hai - ham aatma hain, hamaara ghar hai shantidham। vahaan se ham aatmaayen aati hain part bajaane। drama ke plan anusaar pahle-pahle satayug aadi mein ham aate hain। aadi aur ant ka yeh hai purooshottam sangamayug। ismen sirf brahman hi hote hain aur koi nahin। kaliyug mein to anekaanek dharma kul aadi hain। satayug mein ek hi dynasty hogi। yeh to sahaj hai na। is samay tum sangamayugi eeshvareey parivaar ke ho। tum na satayugi ho, na kaliyugi। yeh bhi jaante ho ki kalpa-kalpa baap aakar aisi padhaai padhaate hain। yahaan tum baithe ho to yahi smriti mein aana chaahiye। shantidham, sukhdhaam aur yeh hai duhkhadhaam। is duhkhadhaam ka hai vairaagya athva sannyaas - buddhi se। woh koi buddhi se sannyaas nahin karte hain। woh to gharbaar chhod sannyaas karte hain। tumko to baap kabhi nahin kehte gharbaar chhodo। itna zaroor hai bhaarat ki seva karni hai va apni seva karni hai। seva to ghar mein bhi kar sakte ho। padhne liye aana zaroor hai। phir hoshiyaar hokar auron ko bhi aap samaan banaana hai। time to bahut thoda hai। gaayan bhi hai na bahut gai thodi rahi। duniya ke manushya to bilkul hi ghor andhiyaare mein hain, samajhte hain abhi 40 hazaar varsha pade hain। tumko baap samjhaate hain - bachchon, ab baaki thoda samay hai। tumko behad mein tikna hai। saari duniya mein jo kuchh chal raha hai sab noondh hai। joon misal drama chal raha hai। world ki history-geography repeat honi hai। vahi aakar padhenge jo satayug mein jaane vaale honge। anek baar tumne padha hai। tum apna svarga sthaapan karte ho shreemat par। yeh bhi jaante ho oonch te oonch bhagwan aate bhi bhaarat mein hain। kalpa pahle bhi aaye the। tum kahenge kalpa-kalpa aisa baap aate hain। kehte hain main kalpa-kalpa aisi sthaapna karoonga। vinaash bhi tum dekhte ho। tumhaari buddhi mein sab baithta jaata hai। sthaapna, vinaash aur paalna ka kartavya kaise hota hai, tum jaante ho। phir auron ko samjhaana hai। aage nahin jaante the। baap ko jaanne se baap dvaara tum sab kuchh jaan jaate ho। world ki history-geography yathaartha reeti se tum jaante ho। manushya kaise tamopradhaan se satopradhaan bante hain - yeh baap tumko samjha rahe hain। tumko phir auron ko samjhaana hai।

tum bachche abhi paarasbuddhi ban rahe ho। satayug mein hote hi hain paarasbuddhi। yeh hai purooshottam sangamayug। inko geeta episode kaha jaata hai, jab tum pattharbuddhi se paarasbuddhi bante ho। geeta sunaane vaala to bhagwan khud hai। manushya nahin sunaate। tum aatmaayen sunti ho phir auron ko sunaati ho। isko kaha jaata hai roohaani knowledge, jo roohaani bhaaiyon ko sunaate ho। vriddhi ko paate rehte ho। tum jaante ho baba aakarke sooryavanshi, chandravanshi dynasty sthaapan karte hain। kiske dvaara? brahma mukh vanshaavli brahman kul bhooshnon dvaara। baap shreemat dete hain। yeh samajhne ki baat hai। dil par note karna hai, yeh to bahut sahaj hai। yeh hai duhkhadhaam। abhi hamko ghar jaana hai। kaliyug ke baad hai satayug। baat to bahut chhoti aur sahaj hai। bhal tum na padhe ho to bhi koi harza nahin hai। jo padhna jaante hain unse phir sunna chaahiye। shivbaaba hai sab aatmaon ka baap। abhi unse varsa lena hai। baap par nishchay karenge to svarga ka varsa milega। andar mein bhi ajpaajaap chalta rahe। shivbaaba se behad sukh, svarga ka varsa mil raha hai isliye shivbaaba ko zaroor yaad karna hai। sabko hak hai behad ke baap se varsa lene ka। jaise had ka birth right milta hai vaise yeh phir hai behad ka। shivbaaba se tumko saare vishwa ka raajya milta hai। chhote-chhote bachchon ko bhi yeh samjhaana chaahiye। har ek aatma ka hak hai baap se birth right lene ka। kalpa-kalpa lete bhi zaroor hain। tum varsa lete ho jeevanmukti ka। jinko mukti ka varsa milta hai woh bhi jeevanmukti mein aate zaroor hain। pahla janma to sukh ka hi hota hai। tumhaara yeh hai 84vaan janma। yeh knowledge saari tumhaari buddhi mein rahni chaahiye। behad ka baap hamko padhaate hain - yeh bhoolo mat। dehdhaari kabhi gyaan de na saken। usmein roohaani gyaan hota nahin। tumko samjhaaya jaata hai - bhaai-bhaai samjho। jo bhi manushya maatra hain aur kisko bhi yeh shiksha nahin milti hai। bhal geeta bhi sunaate hain ki bhagvaanuvaach - kaam mahaashatru hai, in par jeet paane se tum jagat jeet banenge parantu samajhte nahin। ab bhagwan to hai truth (satya)। devta bhi bhagwan se truth seekhe hain। shreekrishna ne bhi yeh pad kahaan se paaya? lakshmi-naaraayan kahaan se bane? kya karma kiya? koi bata sakenge? ab tum hi jaante ho niraakaar baap ne unhon ko aise karma sikhaaya, brahma baap dvaara। yeh srishti hai na। abhi tum ho prajaapita brahmaakumaar-kumaariyaan। tumhaare paas knowledge hai roohaani baap ki। tum samajhte ho ham bhagwan ko jaan gaye hain। oonch te oonch woh niraakaar hai। uska saakaar roop nahin। baaki jo bhi dekhte ho woh saakaar hai। mandiron mein bhi ling dekhte ho arthaat unko shareer nahin। aise nahin ki woh naam-roop se nyaara hai। haan, aur sab dehdhaariyon ke naam padte hain, janma patri hai। shivbaaba to hai niraakaar। unki janmapatri nahin hai। shreekrishna ki hai number one। shiv jayanti bhi manaate hain। shivbaaba hai niraakaar kalyaankaari। baap aate hain to zaroor varsa denge। unka naam shiv hai। woh baap, teacher, satguru teenon hi ek hai। kitna achhi reeti padhaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is duhkhadhaam ka buddhi se sannyaas kar shantidham aur sukhdhaam smriti mein rakhna hai। bhaarat ki va apni sachchi seva karni hai। sabko roohaani knowledge sunaani hai।

2) apna satayugi janma siddha adhikaar lene ke liye ek baap mein poora nishchay rakhna hai। andar se ajpaajaap karte rehna hai। padhaai roz zaroor padhni hai।

vardaan:- sarva sambandhon ki anubhooti ke saath praaptiyon ki khushi ka anubhav karne vaale tripta aatma bhav

jo sachche aashik hain woh har paristhiti mein, har karma mein sada praapti ki khushi mein rehte hain। kai bachche anubhooti karte hain ki haan woh mera baap hai, saajan hai, bachcha hai…lekin praapti jitni chaahte hain utni nahin hoti। to anubhooti ke saath sarva sambandhon dvaara praapti ki mahsoosta ho। aise praapti aur anubhooti karne vaale sada tripta rehte hain। unhein koi bhi cheez ki apraapti nahin lagti। jahaan praapti hai vahaan tripti zaroor hai।

slogan:- nimitta bano to seva ki saphalta ka share mil jaayega।