Murli du jour du samedi 3 août 2024

03-08-2024 praatahmurli om shanti "baapdaada"' madhuban

meethe bachche - yeh hai behad ki unlimited stage, jismen tum aatmaayen part bajaane ke liye baandhi hui ho, ismen harek ka fix part hai“

prashn:- karmaateet avastha ko praapta karne ka purooshaartha kya hai?

uttar:- karmaateet banna hai to poora-poora surrender hona pade। apna kuchh nahin। sab kuchh bhoole hue honge tab karmaateet ban sakenge। jinhen dhan, daulat, bachche aadi yaad aate, woh karmaateet ban nahin sakte isliye baba kehte main hoon gareeb nivaaz। gareeb bachche jaldi surrender ho jaate hain। sahaj hi sab kuchh bhool ek baap ki yaad mein rah sakte hain।

om shanti। roohaani baap baith apne roohaani bachchon ko samjhaate hain, bachchon ki buddhi mein zaroor hai ki ab ghar jaana hai। bhakton ki buddhi mein nahin rehta। tum jaante ho yeh 84 ka chakra ab poora hua। yeh bahut bada behad ka maandava athva stage hai। unlimited stage hai। is puraane maandave ko chhod ghar jaana hai। apvitra aatmaayen to ja nahin sakti। pavitra zaroor banna hai। ab is khel ka ant hai। aprampaar duhkhon ki ab pichhaadi hai। is samay yeh sab maaya ka pomp hai, jisko manushya svarga samajhte hain, kitne mahal, maadiyaan, motor aadi hain, isko kaha jaata hai maaya ka competition। narka ki svarga ke saath competition hai। alpakaal ke liye sukh hai। yeh hai maaya ki laalach, drama anusaar। kitne dher manushya hain। pahle to sirf ek aadi sanaatan devi-devta dharma hi tha। ab to maandava full bhar gaya hai। ab yeh chakra poora hota hai sab tamopradhaan hain, srishti bhi tamopradhaan hai phir satopradhaan honi hai। saari srishti nai chaahiye na। nai se puraani, puraani se nai yeh to anginat baar chalta aaya hai। anaadi khel hai। kab shuru hua yeh nahin kah sakte। anaadi chalta hi rehta hai। yeh bhi tum jaante ho aur koi nahin jaanta। tum bhi is gyaan milne ke pahle kuchh nahin jaante the। devta bhi nahin jaante the sirf tum purooshottam sangamayugi brahman hi jaante ho phir yeh gyaan praayah lop ho jaayega। baap ne sukhdhaam ka maalik banaaya baaki aur kya chaahiye। baap se jo paana tha, pa liya baaki kuchh paane ke liye rehta nahin। to baap samjhaate hain - bachche, tum hi sabse jaasti patit bane ho। pahle-pahle tum hi aaye ho part bajaane। tumko hi pahle jaana padega। chakra hai na। pahle-pahle tum hi maala mein piroyenge। yeh roodra maala hai na। dhaage mein saari duniya ke manushya piroye hue hain। dhaage se nikal paramdham mein chale jaayenge phir aise hi dhaage mein piroye jaayenge। bahut badi maala hai। shivbaaba ko kitne dher bachche hain। pahle-pahle tum devtaayen aate ho। yeh hai behad ki maala, jismen sab manke misal piroye hue ho। roodra maala aur vishnu ki maala gaai jaati hai। prajaapita brahma ki maala nahin hai। tum brahmaakumaar-kumaariyon ki maala hoti nahin kyonki tum chadhte, girte ho, haar khaate ho। ghadi-ghadi maaya gira deti hai isliye braahmanon ki maala nahin banti, jab poore paas ho jaate ho tab vishnu ki maala banti hai। yoon to prajaapita brahma ka bhi sijra hai। jab paas ho jaate hain to kahenge brahma ki bhi maala hai। sijra bana hua hai। is samay maala nahin ban sakti hai kyonki aaj pavitra bante, kal phir maaya thappad maar kala kaaya hi nikaal deti। ki kamaai chat ho jaati hai। toot padte hain। kahaan se girte hain, vichaar karo। baap to vishwa ka maalik banaate hain। unki shreemat par chalne se tum oonch pad pa sakte ho। haar khaai to khalaas। kaam vikaar mahaashatru hai, unse haar nahin khaani hai। baaki sab vikaar hain baal bachche। bada shatru hai kaam vikaar। unke oopar hi jeet paani hai। kaam par jeet paane se tum jagatjeet banenge। yeh 5 vikaar aadhaakalpa ke dushman hain, woh bhi chhodte nahin hain। sab chillaate hain krodh karna padta hai, parantu darkaar kya padi hai, pyaar se bhi kaam ho sakta hai। chor ko bhi pyaar se agar samjhaayenge to woh jhat sach kah denge। baap kehte hain main pyaar ka saagar hoon na, to bachchon ko bhi pyaar se kaam lena hai। bhal koi bhi position ho। baba ke paas military vaale bhi aate hain। unhon ko bhi baba samjhaate hain tum svarga mein jaana chaahte ho to sirf shivbaaba ko yaad karo। unhein kaha jaata hai - tum yuddha ke maidaan mein marenge to svarga mein jaayenge। vaastav mein yuddha ka maidaan to yeh hai। woh to ladaai karte-karte mar jaate hain to phir vahaan jaakar janma lete hain kyonki sanskaar le jaate hain। svarga mein to ja na saken। to baba unhon ko samjhaate the shivbaaba ko yaad karne se tum svarga mein ja sakte ho kyonki svarga ki sthaapna ho rahi hai। shivbaaba ki yaad se hi vikarma vinaash honge। yeh thoda bhi gyaan mila na to avinaashi gyaan ka vinaash nahin hota hai।

tum bachche yeh mela aadi karte ho to kitni praja banti hai। tum roohaani sena ho na ismen commander, major aadi thode hote hain, praja to bahut banti hai। jo achhi reeti samjhaate hain to kuchh na kuchh achha pad paate hain। unmein bhi first, second, third grade hoti hain। tum shiksha dete rehte ho, koi to bilkul aapasmaan ban jaate hain। koi sabse oopar bhi ja sakte hain। dekha jaata hai ek-do se oopar chale jaate hain। naye-naye puraanon se teekhe chale jaate hain। baap se poora yog lag jaaye to bahut oonch chala jaayega। saara madaar hai yog par। knowledge to bahut sahaj hai, tum feel karte honge। baap ki yaad mein vighna padte hain। baap kehte hain bhojan khaao to bhi yaad mein। parantu koi 2 minute, koi 5 minute yaad mein rehte hain। saara samay yaad mein rahen, bada mushkil hai। maaya kahaan na kahaan udaay bhula deti hai। sivaae baap ke aur koi ki yaad nahin rahegi tab hi karmaateet avastha hogi। agar kuchh bhi apna hoga to woh yaad zaroor padega। kuchh bhi yaad na aaye, yeh baba misaal hai, inko kya yaad aayega? koi baal bachche, dhan aadi hai? sirf tum bachche hi yaad aate ho। tum to zaroor baap ko yaad padenge hi kyonki baap aaye hain kalyaan karne ke liye। yaad sabko karte hain। parantu phir bhi buddhi phoolon taraph hi chali jaati hai। phool anek prakaar ke hote hain। koi bigar khushbu bhi hote hain। bageecha hai na। baap ko baagvaan, maali bhi kehte hain। yeh to tum jaante ho - manushya krodh mein aakar kitna ladte-jhagadte hain। bahut deh abhimaan hai। baap samjhaate hain - kabhi koi krodh kare to shant rehna chaahiye। krodh bhoot hai na। bhoot ke aage shanti se respond dena hai।

sarva shaastra shiromni shreemad bhagvad geeta hai eeshvareey mat ki। eeshvareey mat, aasuri mat aur daivi mat ek eeshvar hi aakar bataate hain। raajayog ki knowledge dete hain। phir yeh knowledge gum ho jaayegi। raajaaon ka raaja ban gaya phir knowledge kya karenge? 21 janma to praalabdha bhogte ho। vahaan yeh maaloom nahin padta hai ki is purooshaartha ka yeh phal hai। anek baar tum satayug mein gaye ho। yeh chakra phirta rehta hai। satayug-treta hai gyaan ka phal। aise nahin ki vahaan gyaan milta hai। baap aakar yahaan bhakti ka phal gyaan dete hain। baap ne bataaya hai tumne jaasti bhakti ki hai। ab ek baap ko yaad karo to tamopradhaan se satopradhaan ban jaayenge। ismen hai mehnat। rachna ke aadi-madhya-ant ko yaad karo to chakravarti raaja ban jaayenge। bhagwan bachchon ko bhagwan-bhagavti banaayenge na। parantu dehdhaari ko bhagwan-bhagavti kehna wrong hai। brahma, vishnu aur shiv ka kitna sambandh hai। yeh brahma phir vishnu banne vaala hai aur ismen shiv ki praveshta hai। sookshm vatan vaalon ko pharishta kaha jaata hai। tumko pharishta banna hai, saakshaatkaar hota hai, baaki kuchh hai nahin। silence, movie aur yahaan talkie। yeh hai detail। baaki nutshell mein to phir bhi kehte hain manamnaabhav, maamekam yaad karo aur srishti chakra ko yaad karo। yahaan baithe ho to bhi shantidham, sukhdhaam ko yaad karo। is puraane duhkhadhaam ko bhool jaao। yeh hai behad ka sannyaas buddhi se। unka hai had ka sannyaas। woh nivritti maarga vaale pravritti maarga ka gyaan de na sake। raaja-raani banna pravritti maarga hai। vahaan hai hi sukh। woh to sukh ko maante hi nahin। sannyaasi bhi karodon ki andaaj mein hain। unhon ki paravrish va kamaai hoti hai grihasthiyon se। ek to tumne daan-punya mein lagaaya, phir paap ka dhandha kiya to paap aatma ban pade। tum bachche to abhi avinaashi gyaan ratnon ki len-den karte ho। ve dharmashaala aadi banvaate hain to doosre janma mein achha phal milega। yeh to hai behad ka baap। yeh hai direct, woh hai in direct। eeshvar arpanam karte hain। ab bhookh to donon ko hai nahin। shiv baba to daata hai, unko bhookh hogi kya। shreekrishna daata nahin। baap to sabko dene vaala hai, lene vaala nahin hai। ek deve 10 paave, gareeb 2 roopaya dete hain to padma mil jaate hain (sudaama ka misaal)। bhaarat sone ki chidiya tha na। baap ne kitna dhanvaan banaaya। somnaath ke mandir mein kitna akeechaar dhan tha। kitna lootkar le gaye।। bade-bade heere-javaahar the। ab to dekhne mein bhi nahin aate, katkut ho gaye। phir history repeat hogi। vahaan sab khaaniyaan tumhaare liye bharpoor ho jaayengi। heere javaahar to vahaan jaise patthar misal rehte hain। baap avinaashi gyaan ratna dete hain, jisse tum athaah dhanvaan ban jaate ho। to meethe-meethe bachchon ko kitni khushi honi chaahiye। jitna padhte rahenge, khushi ka paara chadhta rahega। bada imtahaan paas karte hain to buddhi mein rehta hai na - yeh paas kar phir yeh banenge, yeh karenge। tum bhi jaante ho yeh devta banenge। yeh to jad chitra hain। ham vahaan chaitanya banenge। yeh chitra bhi tumne jo banaaye kahaan se aaye? divya drishti se tum dekh aaye ho। chitra bade wonderful hai। koi samjhenge yeh brahma ne banaaye hain। agar yeh koi se seekha hota to sirf ek thode hi seekha hota, aur bhi seekhe hue hote na। yeh kehte hain main kuchh bhi seekha hua nahin hoon। yeh to baap ne divya drishti dvaara banvaaye hain। yeh chitra sab shreemat se bane hue hain। yeh manushya mat ke nahin hain। yeh sab khalaas ho jaayenge। kuchh bhi naam nishaan nahin rahega। is srishti ka hi ant hai। bhakti ki kitni saamagri hai। yeh nahin rahegi। nai duniya mein sab kuchh naya। tum anek baar svarga ke maalik bane ho phir maaya ne haraaya hai। maaya vikaaron ko kaha jaata hai, na ki dhan ko। tum bachche raavan ki janjeer mein aadhaakalpa se phanse hue the। raavan hai sabse puraana dushman। aadhaakalpa unka raajya chalta hai। laakhon varsha kah dene se phir aadha-aadha ka hisaab hi nahin nikalta। kitna farka hai। tumko to baap ne bataaya hai, saare kalpa ki aayu hi 5 hajaar varsha hai। 84 laakh yoniyaan to hain nahin। yeh bada gapoda hai। sooryavanshi, chandravanshi devi-devta itne laakhon varsha raajya karte the kya। yeh buddhi kaam nahin karti। sannyaasi to samajhte hain abhi ham apne ko wrong maan leven to sab followers hamko chhod denge। revolution ho jaae isliye abhi vo tumhaari mat par chal apni raajaai nahin chhodenge। pichhaadi mein kuchh samjhenge, abhi nahin। na saahookaar log hi gyaan lenge। baap kehte hain main gareeb nivaaz hoon। saahookaar log kabhi surrender hokar karmaateet avastha ko pa nahin sakenge। baap to bada jabardasta sarraaph hai। gareebon ka hi lenge। saahookaaron ka leven to phir itna dena pade। saahookaar uthte hi mushkil hain kyonki ismen sab kuchh bhoolna padta hai। kuchh bhi paas na rahe tab karmaateet avastha ho। saahookaar log to bhool nahin sakenge, jinhonne kalpa pahle varsa liya hai vahi lenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jaise baap pyaar ka saagar hai, aise master pyaar ka saagar ban pyaar se kaam nikaalna hai। krodh nahin karna hai। krodh koi kare to tumhein shant rehna hai।

2) buddhi se is puraani duhkh ki duniya ko bhool behad ka sannyaasi banna hai। shantidham aur sukhdhaam ko yaad karna hai। avinaashi gyaan ratnon ki len-den karni hai।

vardaan:- vikaaron roopi jahreele saampon ko gale ki maala banaane vaale shankar samaan tapasveemoorta bhav

yeh paanch vikaar jo logon ke liye jahreele saamp hain, yeh saamp aap yogi va prayogi aatma ke gale ki maala ban jaate hain। yeh aap braahmanon va brahma baap ke ashareeri tapasvi shankar swaroop ka yaadgaar aaj tak bhi pooja jaata hai। doosra - yeh saamp khushi mein naanchane ki stage ban jaate hain - yeh sthiti stage ke roop mein dikhaate hain। to jab vikaaron par aisi vijay ho tab kahenge tapasveemoorta, prayogi aatma।

slogan:- jinka svabhaav meetha, shaantachit hai us par krodh ka bhoot vaar nahin kar sakta।