Murli du jour du jeudi 7 novembre 2024

07-11-2024 praatahmurli om shanti "baapdaada"' madhuban

“meethe bachche - shivbaaba aaya hai tumhaare sab bhandaare bharpoor karne, kaha bhi jaata hai bhandaara bharpoor kaal kantak door''

prashn:- gyaanvaan bachchon ki buddhi mein kis ek baat ka nishchay pakka hoga?

uttar:- unhein dridh nishchay hoga ki hamaara jo part hai woh kabhi ghista-mitta nahin। mujh aatma mein 84 janmon ka avinaashi part noondha hua hai, yahi buddhi mein gyaan hai to gyaanvaan hai। nahin to saara gyaan buddhi se ud jaata hai।

om shanti। baap aakar roohaani bachchon prati kya kehte hain? kya seva karte hain? is samay baap yeh roohaani padhaai padhaane ki seva karte hain। yeh bhi tum jaante ho। baap ka bhi part hai, teacher ka bhi part hai aur guru ka bhi part hai। teenon part achhe baja rahe hain। tum jaante ho woh baap bhi hai, sadgati dene vaala guru bhi hai aur sabke liye hai। chhote, bade, boodhe, javaan sabke liye ek hi hai। supreme baap, supreme teacher hai। behad ki shiksha dete hain। tum conference mein bhi samjha sakte ho ki ham sabki biography ko jaante hain। parampita paramatma shivbaaba ki jeevan-kahaani ko bhi jaante hain। nambarvaar sab buddhi mein yaad hona chaahiye। saara viraat roop zaroor buddhi mein rehta hoga। ham abhi brahman bane hain, phir ham devta banenge phir kshatriy, vaishya, shoodra banenge। yeh to bachchon ko yaad hai na। sivaae tum bachchon ke aur kisko yeh baaten yaad nahin hongi। utthaan aur patan ka saara raaz buddhi mein rahe। ham utthaan mein the phir patan mein aaye, ab beech mein hain। shoodra bhi nahin hain, poore brahman bhi nahin bane hain। agar abhi pakke brahman ho to phir shoodrapne ki act na ho। braahmanon mein bhi phir shoodrapna aa jaata hai। yeh bhi tum jaante ho - kab se paap shuru kiye hain? jab se kaam chita par chadhe ho, to tumhaari buddhi mein saara chakra hai। oopar mein hai parampita paramatma baap, phir tum ho aatmaayen। yeh baaten tum bachchon ki buddhi mein zaroor yaad rahni chaahiye। abhi ham brahman hain, devta ban rahe hain phir vaishya, shoodra dynasty mein aayenge। baap aakarke hamko shoodra se brahman banaate hain phir ham brahman se devta banenge। brahman ban karmaateet avastha ko praapta kar phir vaapis jaayenge। tum baap ko bhi jaante ho। baajoli va 84 ke chakra ko bhi tum jaante ho। baajoli se tumko bahut easy kar samjhaate hain। tumko bahut halka banaate hain taaki apne ko bindi samajh aur jhat bhaagenge। student class mein baithe rehte hain to buddhi mein study hi yaad rehti hai। tumko bhi yeh padhaai yaad rahni chaahiye। abhi ham sangamayug par hain phir aise chakra lagaayenge। yeh chakra sadaiv buddhi mein phirta rehna chaahiye। yeh chakra aadi ka knowledge tum braahmanon ke paas hi hai, na ki shoodron ke paas। devtaaon ke paas bhi yeh gyaan nahin hai। abhi tum samajhte ho bhakti maarga mein jo chitra bane hain sab defected hain। tumhaare paas hain accurate kyonki tum accurate bante ho। abhi tumko gyaan mila hai tab samajhte ho bhakti kisko kaha jaata hai, gyaan kisko kaha jaata hai? gyaan dene vaala baap gyaan ka saagar abhi mila hai। school mein padhte hain em object ka maaloom to padta hai na। bhakti maarga mein to em object hoti nahin। yeh thode hi tumko maaloom tha ki ham oonch devi-devta the phir neeche gire hain। ab jab brahman bane ho tab pata pada hai। brahmaakumaar-kumaariyaan zaroor aage bhi bane the। prajaapita brahma ka naam to baala hai। prajaapita to manushya hai na। unke itne dher bachche hain zaroor adopted hone chaahiye। kitne adopted hain। aatma ke roop mein to sab bhaai-bhaai ho। abhi tumhaari buddhi kitni door jaati hai। tum jaante ho jaise oopar mein stars khade hain। door se kitne chhote dikhaai padte hain। tum bhi bahut chhoti-si aatma ho। aatma kabhi chhoti-badi nahin hoti hai। haan, tumhaara martaba bahut oonch hai। unko bhi soorya devta, chandrama devta kehte hain। soorya baap, chandrama maa kahenge। baaki aatmaayen sab hain nakshatra sitaare। to aatmaayen sab ek jaisi chhoti hain। yahaan aakar paartadhaari banti hain। devtaayen to tum hi bante ho।

ham bahut powerful ban rahe hain। baap ko yaad karne se ham satopradhaan devta ban jaayenge। nambarvaar thoda-thoda farka to rehta hai। koi aatma pavitra ban satopradhaan devta ban jaati hai, koi aatma poora pavitra nahin banti hai। gyaan ko zara bhi nahin jaanti hai। baap ne samjhaaya hai baap ka parichay to zaroor sabko milna chaahiye। pichhaadi mein baap ko to jaanenge na। vinaash ke samay sabhi ko pata padta hai baap aaya hua hai। abhi bhi koi-koi kehte hain bhagwan zaroor kahaan aaya hua hai parantu pata nahin padta। samajhte koi bhi roop mein aa jaayega। manushya mat to bahut hai na, tumhaari hai ek hi eeshvareey mat। tum eeshvareey mat se kya bante ho? ek hai manushya mat, doosri hai eeshvareey mat aur teesri hai devta mat। devtaaon ko bhi mat kisne di? baap ne। baap ki shreemat hai hi shreshtha banaane vaali। shri shri baap ko hi kahenge, na ki manushya ko। shri shri hi aakar shri banaate hain। devtaaon ko shreshtha banaane vaala baap hi hai, unko shri shri kahenge। baap kehte hain main tumko aisa laayak banaata hoon। un logon ne phir apne par shri shri ka title rakh diya hai। conference mein bhi tum samjha sakte ho। tum hi samjhaane liye nimitta bane hue ho। shri shri to hai hi ek shiv-baba jo aisa shri devta banaate hain। vo log shaastron aadi ki padhaai padhkar title le aate hain। tumko to shri shri baap hi shri arthaat shreshtha bana rahe hain। yeh hai hi tamopradhaan bhrashtaachaari duniya। bhrashtaachaar se janma lete hain। kahaan baap ka title, kahaan yeh patit manushya apne par rakhaate hain। sachchi-sachchi shreshtha mahaan aatmaayen to devi-devta hain na। satopradhaan duniya mein koi bhi tamopradhaan manushya ho na sake। rajo mein rajo manushya hi rahenge, na ki tamoguni। varna bhi gaaye jaate hain na। abhi tum samajhte ho, aage to ham kuchh nahin samajhte the। ab baap kitna samajhdaar banaate hain। tum kitna dhanvaan bante ho। shivbaaba ka bhandaara bharpoor hai। shivbaaba ka bhandaara kaun-sa hai? (avinaashi gyaan ratnon ka) shivbaaba ka bhandaara bharpoor kaal kantak door। baap tum bachchon ko gyaan ratna dete hain। khud hai saagar। gyaan ratnon ka saagar hai। bachchon ki buddhi behad mein jaani chaahiye। itni karod aatmaayen sab apne-apne shareer roopi takhta par viraajmaan hain। yeh behad ka naatak hai। aatma is takhta par viraajmaan hoti hai। takhta ek na mile doosre se। sabke features alag-alag hain, inko kaha jaata hai kudrat। har ek ka kaisa avinaashi part hai। itni chhoti-si aatma mein 84 ka record bhara hua rehta hai। ati sookshm hai। isse sookshm wonder koi ho nahin sakta। itni chhoti aatma mein saara part bhara hua hai, jo yahaan hi part bajaati hai। sookshm vatan mein to koi part bajaati nahin hai। baap kitna achhi reeti samjhaate hain। baap dvaara tum sab-kuchh jaan jaate ho। yahi knowledge hai। aise nahin ki sabke andar ko jaanne vaala hai। yeh knowledge jaante hain, jo knowledge tumhaare mein bhi emerge ho rahi hai। jis knowledge se hi tum itna oonch pad paate ho। yeh bhi samajh rehti hai na। baap hai beejroop। unmein jhaad ke aadi, madhya, ant ki knowledge hai। manushyon ne to laakhon varsha aayu de di hai, to gyaan aa na sake। abhi tumko sangam par yeh saara gyaan mil raha hai। baap dvaara tum saare chakra ko jaan jaate ho। inke pahle tum kuchh nahin jaante the। abhi tum sangam par ho। yeh hai tumhaara ant ka janma। purooshaartha karte-karte phir tum poora brahman ban jaayenge। abhi nahin ho। abhi to achhe-achhe bachche bhi brahman se phir shoodra ban jaate hain। isko kaha jaata hai maaya se haar khaana। baba ki god se haarkar raavan ki god mein chale jaate hain। kahaan baap ki shreshtha banne ki god, kahaan bhrashta banne ki god। second mein jeevanmukti। second mein poori durdasha ho jaati hai। brahman bachche achhi reeti jaante hain - kaise durdasha ho jaati hai। aaj baap ke bante, kal phir maaya ke panje mein aakar raavan ke ban jaate hain। phir tum bachaane ki koshish karte ho to koi-koi bach bhi jaate hain। tum dekhte ho doobte hain to bachaane ki koshish karte raho। kitni khitkhit hoti hai।

baap baith bachchon ko samjhaate hain। yahaan school mein tum padhte ho na। tumko maaloom hai kaise ham yeh chakra lagaate hain। tum bachchon ko shreemat milti hai aise-aise karo। bhagvaanuvaach to zaroor hai। unki shreemat hui na। main tum bachchon ko ab shoodra se devta banaane aaya hoon। abhi kaliyug mein hain shoodra sampradaay। tum jaante ho kaliyug poora ho raha hai। tum sangam par baithe ho। yeh baap dvaara tumko knowledge mili hai। shaastra jo bhi banaaye hain un sabmen hai manushya mat। eeshvar to shaastra banaate nahin। ek geeta ke oopar hi kitne naam rakh diye hain। gaandhi geeta, taigor geeta aadi-aadi। dher naam hain। geeta ko manushya itna kyon padhte hain? samajhte to kuchh bhi nahin। adhyaay vahi uthaakar arth apna-apna karte rehte hain। woh to sab manushyon ke banaaye hue ho gaye na। tum kah sakte ho manushya mat ki banaai hui geeta padhne se aaj yeh haal hua hai। geeta hi pahla number ka shaastra hai na। woh hai devi-devta dharma ka shaastra। yeh tumhaara brahman kul hai। yeh bhi brahman dharma hai na। kitne dharma hain, jis-jis ne jo dharma racha hai unka woh naam chalta hai। jaini log mahaaveer kehte hain। tum bachche sab mahaaveer-mahaaveerniyaan ho। tumhaara mandir mein yaadgaar hai। raajayog hai na। neeche yog tapasya mein baithe hain, oopar mein raajaai ka chitra hai। raajayog ka accurate mandir hai। phir koi ne kya naam rakh diya hai, koi ne kya। yaadgaar hai bilkul accurate, buddhi se kaam le theek banaaya hai phir jisne jo naam kaha woh rakh diya hai। yeh model roop mein banaaya hai। svarga aur raajayog sangamayug ka banaaya hua hai। tum aadi, madhya, ant ko jaante ho। aadi ko bhi tumne dekha hai। aadi sangamayug ko kaho ya satayug ko kaho। sangamayug ki scene neeche dikhaate hain phir raajaai oopar mein dikhaai hai। to satayug hai aadi phir madhya mein hai dvaapar। ant ko tum dekhte hi ho। yeh sab khatma ho jaana hai। poora yaadgaar bana hua hai। devi-devta hi phir vaam maarga mein jaate hain। dvaapar se vaam maarga shuru hota hai। yaadgaar poora accurate hai। yaadgaar mein bahut mandir banaaye hain। yahaan hi sab nishaaniyaan hain। mandir bhi yahaan hi bante hain। devi-devta bhaaratvaasi hi raajya karke gaye hain na। phir baad mein kitne mandir banaate hain। sikkha log bahut honge to woh apna mandir bana denge। military vaale bhi apna mandir bana dete hain। bhaaratvaasi apne krishna ka va lakshmi-naaraayan ka mandir banaayenge। hanoomaan, ganesh ka banaayenge। yeh saara srishti ka chakra kaise phirta hai, kaise sthaapna, vinaash, paalna hoti hai - yeh tum hi jaante ho। isko kaha jaata hai andhiyaari raat। brahma ka din aur raat hi gaai jaati hai kyonki brahma hi chakra mein aate hain। abhi tum brahman ho phir devta banenge। mukhya to brahma hua na। brahma ko rakhen ya vishnu ko rakhen! brahma hai raat ka aur vishnu hai din ka। vahi raat se phir din mein aate hain। din se phir 84 janmon ke baad raat mein aate hain। kitna sahaj samjhaani hai। yeh bhi poora yaad nahin kar sakte। poori reeti nahin padhte hain to nambarvaar purooshaartha anusaar pad paate hain। jitna yaad karenge satopradhaan banenge। satopradhaan so bhaarat tamopradhaan। bachchon mein kitna gyaan hai। yeh knowledge simran karni hai। yeh gyaan hai hi nai duniya ke liye, jo behad ka baap aakar dete hain। sab manushya behad ke baap ko yaad karte hain। angrej log bhi kehte hain O god father liberator, guide arth to tum bachchon ki buddhi mein hai। baap aakarke duhkh ki duniya iron ej se nikaal golden ej mein le jaate hain। golden ej zaroor paas hokar gaya hai tab to yaad karte hain na। tum bachchon ko andar mein bahut khushi rahni chaahiye aur daivi karma bhi karne chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap se jo avinaashi gyaan ratnon ka akhut khajaana mil raha hai - use smriti mein rakh buddhi ko behad mein le jaana hai। is behad naatak mein kaise aatmaayen apne-apne takhta par viraajmaan hain - is kudrat ko saakshi ho dekhna hai।

2) sada buddhi mein yaad rahe ki ham sangamayugi brahman hain, humein baap ki shreshtha god mili hai। ham raavan ki god mein ja nahin sakte। hamaara kartavya hai - doobne vaalon ko bhi bachaana।

vardaan:- vyartha sankalp roopi pillars ko aadhaar banaane ke bajaae sarva sambandh ke anubhav ko badhaane vaale sachche snehi bhav

maaya kamjor sankalp ko majboot banaane ke liye bahut royal pillars lagaati hai, baar-baar yahi sankalp deti hai ki aisa to hota hi hai, bade-bade bhi aisa karte hain, abhi sampoorn to hue nahin hain, zaroor koi na koi kamjori to rahegi hi…yeh vyartha sankalp roopi pillars kamjori ko aur majboot kar dete hain। ab aise pillars ka aadhaar lene ke bajaae sarva sambandhon ke anubhav ko badhaao। saakaar roop mein saath ka anubhav karte sachche snehi bano।

slogan:- santushtata sabse bada gun hai, jo sada santushta rehte hain vahi prabhu priy, lok priy va svayan priy bante hain।