Murli du jour du vendredi 8 novembre 2024

08-11-2024 praatahmurli om shanti "baapdaada"' madhuban

“meethe bachche - tum yeh raajayog ki padhaai padhte ho raajaai ke liye, yeh hai tumhaari nai padhaai''

prashn:- is padhaai mein kai bachche chalte-chalte fail kyon ho jaate hain?

uttar:- kyonki is padhaai mein maaya ke saath boxing hai। maaya ki boxing mein buddhi ko bahut kadi chot lag jaati hai। chot lagne ka kaaran baap se sachche nahin hain। sachche bachche sada safe rehte hain।

om shanti। yeh to sab bachchon ko nishchay hoga ki ham aatmaon ko paramatma baap padhaate hain। 5 hajaar varsha baad ek hi baar behad ka baap aakar behad ke bachchon ko padhaate hain। koi naya aadmi yeh baaten sunen to samajh na sake। roohaani baap, roohaani bachche kya hote hain, yeh bhi samajh nahin sakenge। tum bachche jaante ho ham sabhi brothers hain। woh hamaara baap bhi hai, teacher bhi hai, supreme guru bhi hai। tum bachchon ko yeh zaroor automatically yaad rahega, yahaan baithe samajhte honge - sabhi aatmaon ka ek hi roohaani baap hai। sabhi aatmaayen usko hi yaad karti hain। koi bhi dharma ka ho। sabhi manushya maatra yaad zaroor karte hain। baap ne samjhaaya hai aatma to sabmen hai na। ab baap kehte hain - deh ke sab dharma chhod apne ko aatma samjho। abhi tum aatma yahaan part baja rahi ho। kaisa part bajaati ho, woh bhi samjhaaya gaya hai। bachche bhi nambarvaar purooshaartha anusaar hi samajhte hain। tum raajayogi ho na। padhne vaale sab yogi hi hote hain। padhaane vaale teacher ke saath yog zaroor rakhna padta hai। em object ka bhi maaloom rehta hai - is padhaai se ham phalaana banenge। yeh padhaai to ek hi hai, inko kaha jaata hai raajaaon ka raaja banne ki padhaai। raajayog hai na। raajaai praapta karne ke liye baap se yog। aur koi manushya yeh raajayog kabhi sikhla na sake। tumko koi manushya nahin sikhlaate hain। paramatma tum aatmaon ko sikhlaate hain। tum phir auron ko sikhlaate ho। tum bhi apne ko aatma samjho। ham aatmaon ko baap sikhlaate hain। yeh yaad na rahne se jauhar nahin bharta hai, isliye bahuton ki buddhi mein nahin baithta hai। to baap hamesha kehte hain, yog-yukta ho, yaad ki yaatra mein rahkar samjhaao। ham bhaai-bhaai ko sikhlaate hain। tum bhi aatma ho, woh sabka baap, teacher, guru hai। aatma ko dekhna hai। bhal gaayan hai second mein jeevanmukti parantu ismen mehnat bahut hai। aatma-abhimaani na banne se tumhaare vachnon mein taakat nahin rehti hai kyonki jis prakaar baap samjhaate hain us reeti koi samjhaate nahin hain। koi-koi to bahut achha samjhaate hain। kaun kaanta hai aur kaun phool hai - maaloom to sab padta hai, school mein bachche 5-6 darja padhkar phir transfer hote hain। achhe-achhe bachche jab transfer hote hain to doosre class ke teacher ko bhi jhat maaloom padta hai। yeh bachche teekhe purushaarthi hain, inhonne achha padha hua hai tab oonch number mein aaye hain। teacher to zaroor samajhte honge na। woh hai laukik padhaai, yahaan to woh baat nahin। yeh hai paarlaukik padhaai। yahaan to aise nahin kahenge। yeh pahle bahut achha padhkar aaye hain tab achha padhte hain। nahin। us imtahaan mein to transfer hote hain to teacher samjhenge isne padhaai mein mehnat ki hai, tab aage number liya hai। yahaan to hai hi nai padhaai, jo pahle se koi padhe hue nahin hain। nai padhaai hai, naya padhaane vaala hai। sab naye hain। nayon ko padhaate hain। unmein jo achhi reeti padhte hain to kahenge yeh achhe purooshaarthi hain। yeh hai nai duniya ke liye nai knowledge aur koi padhaane vaala to hai nahin। jitna-jitna jo attention dete hain utna oonch number mein jaate hain। koi to bahut meethe aagyaakaari hote hain। dekhne se hi pata padta hai, yeh padhaane vaala bahut achha hai, inmen koi avgun nahin hai। chalan se, baat karne se maaloom pad jaata hai। baba poochhte bhi sabse hain - yeh kaisa padhaate hain, inmen koi khaami to nahin hai। aise bahut kehte hain ki hamaare poochhe bigar samaachaar kabhi nahin dena। koi achha padhaate hain, koi shrewd buddhi nahin hote hain। maaya ka vaar bahut hota hai। yeh baap jaante hain, maaya inhon ko dhokha bahut deti hai। bhal 10 varsha bhi padhaaya hai parantu maaya aisi jabardasta hai - deh-ahankaar aaya aur yeh phansa। baap samjhaate hain jo bhi pahalvaan hain, un par maaya ki chot lagti hai। maaya bhi balvaan se balvaan hokar ladti hai।

tum samajhte honge baba ne jismen pravesh kiya hai yeh number one hai। phir nambarvaar to bahut hain na। baba misaal karke ek-do ka dete hain। hote to nambarvaar bahut hain। jaise dehli mein geeta bachchi bahut hoshiyaar hai। hai bachchi badi meethi। baba hamesha kehte hain geeta to sachchi geeta hai। manushya woh geeta padhte hain parantu yeh nahin samajhte hain ki bhagwan ne kaise raajayog sikhaakar raajaaon ka raaja banaaya tha। barobar satayug tha to ek hi dharma tha, kal ki baat hai। baap kehte hain kal tumko itna saahookaar banaakar gaya। tum padmaapdam bhaagyashaali the, ab tum kya ban gaye ho। tum feel karte ho na। un geeta sunaane vaalon se koi ko feeling aati hai kya, zara bhi nahin samajhte। oonch te oonch shreemat bhagvat geeta hi gaai jaati hai। woh to geeta kitaab baith padhte va sunaate hain। baap to kitaab nahin padhte। farka to hai na। unki yaad ki yaatra to hai hi nahin। woh to neeche girte hi rehte hain। sarvavyaapi ke gyaan se sab dekho kaise ban gaye hain। tum jaante ho kalpa-kalpa aise hi hoga। baap kehte hain tumko sikhlaakar vishay saagar se paar kar dete hain। kitna farka hai। shaastra padhna to bhakti maarga hua na। baap kehte hain yeh padhne se mere se koi nahin milte। woh samajhte hain koi bhi taraph jaao pahunchna to sabko ek hi jagah hai। kabhi kehte hain bhagwan kis na kis roop mein aakar padhaayenge। jab baap ko aakar padhaana hai to phir tum kya padhaate ho? baap samjhaate hain geeta mein aate mein namak misal koi right akshar hain, jismen tum pakad sakte ho। satayug mein to koi bhi shaastra aadi hote hi nahin। yeh hai hi bhakti maarga ke shaastra। aise nahin kahenge ki yeh anaadi hain। shuru se chale aate hain। nahin। anaadi ka arth nahin samajhte। baap samjhaate hain yeh to drama anaadi barobar hai। tumko baap raajayog sikhlaate hain। baap kehte hain abhi tumko sikhlaata hoon phir gum ho jaata hoon। tum kahenge hamaara raajya anaadi tha। raajya vahi hai sirf paavan se badal patit hone se naam badal jaata hai। devta ke badle hindu kahlaate hain। hai to aadi sanaatan devi-devta dharma ke na। jaise doosre satopradhaan se sato, rajo, tamo mein aate hain, tum bhi aise utarte ho। rajo mein aate ho to apvitrata ke kaaran devta ke badle hindu kahlaate ho। nahin to hindu hindustaan ka naam hai। tum asul mein to devi-devta the na। devtaayen sadaiv paavan hote hain। abhi to manushya patit ban gaye hain। to naam bhi hindu rakh diya hai। poochho hindu dharma kab, kisne racha? to bata nahin sakenge। aadi sanaatan devi-devta dharma tha, jisko paradise aadi bahut achhe-achhe naam dete hain। jo past hua hai woh phir repeat hona hai। is samay tum shuru se lekar ant tak sab jaante ho। jaante jaayenge to jeete rahenge। kai to mar bhi jaate hain। baap ka bante hain to maaya ki yuddha chalti hai। yuddha hone se traitor ban padte hain। raavan ke the, raam ke bane। phir raavan, raam ke bachchon par jeet pahan apni taraph le jaata hai। koi beemaar ho padte hain। phir na vahaan ke rehte, na yahaan ke rehte। na khushi hai, na ranj। beech mein pade rehte hain। tumhaare paas bhi bahut hain jo beech mein hain। baap ka bhi poora nahin bante hain, raavan ka bhi poora nahin bante।

abhi tum ho purooshottam sangamayug par। uttam puroosh banne ke liye purooshaartha kar rahe ho। yeh badi samajhne ki baate hain। baba poochhte hain haath to bahut bachche uthaate hain। parantu samjha jaata hai - buddhi nahin hai। bhal baba kehte hain shubh bolo। kehte to sab hain - ham nar se naaraayan banenge। katha hi nar se naaraayan banne ki hai। agyaan kaal mein bhi satya naaraayan ki katha sunte hain na। vahaan to koi poochh nahin sakte। yeh to baap hi poochhte hain। tum kya samajhte ho - itni himmat hai? tumhein paavan bhi zaroor banna hai। koi aate hain to poochha jaata hai is janma mein koi paap karma to nahin kiye hain? janma-janmaantar ke paapi to ho hi। is janma ke paap bata do to halke ho jaayenge। nahin to dil andar khaata rahega। sach batlaane se halke honge। kai bachche sach nahin bataate hain to maaya ekdam jor se ghoonsa laga deti hai। tumhaari badi kadi boxing hain। us boxing mein to shareer ko chot lagti hai, ismen buddhi ko bahut chot lagti hai। yeh baba bhi jaante hain। yeh brahma kehte hain main bahut janmon ke ant ka hoon। sabse paavan tha, abhi sabse patit hoon। phir paavan banta hoon। aise to nahin kehta hoon ki main mahaatma hoon। baap bhi khaatiri dete hain, yeh sabse jaasti patit hai। baap kehte hain main paraaye desh, paraaye shareer mein aata hoon। inke bahut janmon ke ant mein main inmen pravesh karta hoon, jisne poore 84 janma liye hain। ab yeh bhi paavan banne ka purooshaartha karte hain, khabardaar bhi bahut rehna hota hai। baap to jaante hain na। yeh baba ka bachcha bahut najdeek hai। yeh to baap se juda kabhi ho nahin sakta। khyaal bhi nahin aa sakta ki chhodkar jaaoon। ekdam hamaare baaju mein baitha hai। mera to baba hai na। mere ghar mein baitha hai। baba jaante hain hanseekudi bhi karte hain। baba aaj hamko snaan to karaao, bhojan to khilaao। main chhota bachcha hoon, bahut prakaar se baba ko yaad karta hoon। tum bachchon ko samjhaata hoon - aise-aise yaad karo। baba aap to bahut meethe ho। ekdam hamko vishwa ka maalik bana dete ho। yeh baat aur kiski buddhi mein ho na sake। baap sabko refresh karte rehte hain। sab purooshaartha to karte hain, parantu chalan bhi aisi ho na। bhool ho jaae to jhat likhna chaahiye - baba, hamse yeh bhool ho jaati hai। koi-koi likhte bhi hain - baba hamse yeh bhool hui maaph karna। hamaara bachcha bankar phir bhool karne se sau guna vriddhi ho jaati hai। maaya se haarte hain to phir vahi ke vahi ban jaate hain। bahut haarte hain। yeh badi boxing hai। raam aur raavan ki ladaai hai। dikhaate bhi hain bandar sena li। yeh sab bachchon ka khel bana hua hai। jaise chhote bachche besmajh hote hain na। baap bhi kehte hain yeh to inhon ki paai-paise ki buddhi hai। kehte hain har ek eeshvar ka roop hai। to har ek eeshvar ban create bhi karte hain, paalna karte hain phir vinaash bhi kar dete। ab eeshvar koi ka vinaash thode hi karte hain। yeh to kitni agyaanta hai isliye kaha jaata hai gudiyon ki pooja karte rehte hain। wonder hai। manushyon ki buddhi kya ho jaati hai। kitna kharcha karte hain। baap ulhana dete hain - ham tumko itna bada banaakar gaya, tumne kya kiya! tum bhi jaante ho ham so devta the phir chakra lagaate hain, abhi ham brahman bane hain। phir ham so devta… banenge। yeh to buddhi mein baitha hua hai na। yahaan baithte ho to buddhi mein yeh knowledge rahni chaahiye। baap bhi knowledgeful hai na। rehte bhal shantidham mein hain phir bhi unko knowledgeful kaha jaata hai। tumhaari bhi aatma mein saari knowledge rehti hai na। kehte hain is gyaan se to hamaari aankh khul gai hai। baap tumko gyaan ke chakshu dete hain। aatma ko srishti ke aadi, madhya, ant ka pata pad gaya hai। chakra phirta rehta hai। braahmanon ko hi svadarshan chakra milta hai। devtaaon ko padhaane vaala koi hota nahin। unko shiksha ki darkaar nahin। padhna to tumko hai jo phir tum devta bante ho। ab baap baith yeh nai-nai baaten samjhaate hain। yeh nai padhaai padhkar tum oonch bante ho। first so last। last so first। yeh padhaai hai na। abhi tum samajhte ho baba har kalpa aakar patit se paavan banaate hain, phir yeh knowledge khalaas ho jaayegi। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) bahut-bahut aagyaakaari, meetha hokar chalna hai। deh-ahankaar mein nahin aana hai। baap ka bachcha bankar phir koi bhi bhool nahin karni hai। maaya ki boxing mein bahut-bahut khabardaar rehna hai।

2) apne vachnon (vaakyon) mein taakat bharne ke liye aatma-abhimaani rahne ka abhyaas karna hai। smriti rahe - baap ka sikhlaaya hua ham suna rahe hain to usmein jauhar bharega।

vardaan:- avinaashi nashe mein rah roohaani maze aur mauj ka anubhav karne vaale brahman so pharishta bhav

aap brahman so pharishte devtaaon se bhi oonche ho, devtaai jeevan mein baap ka gyaan emerge nahin hoga। parmaatma milan ka anubhav bhi nahin hoga isliye abhi sada yeh nasha rahe ki ham devtaaon se bhi oonch brahman so pharishta hain। yeh avinaashi nasha hi roohaani maje aur mauj ka anubhav karaane vaala hai। agar nasha sada nahin rahega to kabhi maje mein rahenge, kabhi moonjhenge।

slogan:- apni seva ko bhi baap ke aage arpit kar do tab kahenge samarpit aatma।