Murli du jour du vendredi 18 avril 2025

18-04-2025 praatahmurli om shanti "baapdaada"' madhuban

“meethe bachche - apne oopar raham karo, baap jo mat dete hain us par chalo to apaar khushi rahegi, maaya ke shraap se bache rahenge''

prashn:- maaya ka shraap kyon lagta hai? shraapit aatma ki gati kya hogi?

uttar:- 1. baap aur padhaai ka (gyaan ratnon ka) niraadar karne se, apni mat par chalne se maaya ka shraap lag jaata hai, 2. aasuri chalan hai, daiveegun dhaaran nahin karte to apne par berahmi karte hain। buddhi ko taala lag jaata hai। woh baap ki dil par chadh nahin sakte।

om shanti। roohaani bachchon ko yeh to ab nishchay hai ki hamko aatma-abhimaani banna hai aur baap ko yaad karna hai। maaya roopi raavan jo hai woh shraapit, duhkhi bana deta hai। shraap akshar hi duhkh ka hai, varsa akshar sukh ka hai। jo bachche vaphaadaar, pharmaanbardaar hain, woh achhi reeti jaante hain। jo naapharmaanbardaar hai, woh bachcha hai nahin। bhal apne ko kuchh bhi samjhen parantu baap ki dil par chadh nahin sakte, varsa pa nahin sakte। jo maaya ke kahne par chalte aur baap ko yaad bhi nahin karte, kisko samjha nahin sakte। goya apne ko aapehi shraapit karte hain। bachche jaante hain maaya badi jabardasta hai। agar behad ke baap ki bhi nahin maante hain to goya maaya ki maante hain। maaya ke vash ho jaate hain। kahaavat hai na - prabhu ki aagya sir maathe। to baap kehte hain bachche, purushaartha kar baap ko yaad karo to maaya ki god se nikal prabhu ki god mein aa jaayenge। baap to buddhivaanon ka buddhivaan hai। baap ki nahin maanenge to buddhi ko taala lag jaayega। taala kholne vaala ek hi baap hai। shreemat par nahin chalte to unka kya haal hoga। maaya ki mat par kuchh bhi pad pa nahin sakenge। bhal sunte hain parantu dhaarna nahin kar sakte hain, na kara sakte to uska kya haal hoga! baap to gareeb nivaaz hain। manushya gareebon ko daan karte hain to baap bhi aakar kitna behad ka daan karte hain। agar shreemat par nahin chalte to ekdam buddhi ko taala lag jaata hai। phir kya praapti karenge! shreemat par chalne vaale hi baap ke bachche thahre। baap to merciful hai। samajhte hain baahar jaate hi maaya ekdam khatma kar degi। koi aapghaat karte hain to bhi apni satyaanaash karte hain। baap to samjhaate rehte hain - apne par raham karo, shreemat par chalo, apni mat par nahin chalo। shreemat par chalne se khushi ka paara chadhega। lakshmi-naaraayan ki shakla dekho kaisi khushnumah hai। to purushaartha kar aisa oonch pad paana chaahiye na। baap avinaashi gyaan ratna dete hain to unka niraadar kyon karna chaahiye! ratnon se jholi bharni chaahiye। sunte to hain parantu jholi nahin bharte kyonki baap ko yaad nahin karte। aasuri chalan chalte hain। baap baar-baar samjhaate rehte hain - apne par raham karo, daiveegun dhaaran karo। woh hai hi aasuri sampradaay। unko baap aakar paristaani banaate hain। paristaan svarga ko kaha jaata hai। manushya kitna dhakka khaate rehte hain। sannyaasiyon aadi ke paas jaate hain, samajhte hain man ko shanti milegi। vaastav mein yeh akshar hi wrong hai, inka koi arth nahin। shanti to aatma ko chaahiye na। aatma svayan shant swaroop hai। aise bhi nahin kehte ki aatma ko kaise shanti mile? kehte hain man ko shanti kaise mile? ab man kya hai, buddhi kya hai, aatma kya hai, kuchh bhi jaante nahin। jo kuchh kehte athva karte hain woh sab hai bhakti maarga। bhakti maarga vaale seedhi neeche utarte-utarte tamopradhaan bante jaate hain। bhal kisko bahut dhan, property aadi hai parantu hain to phir bhi raavan raajya mein na।

tum bachchon ko chitron par samjhaane ki bhi bahut achhi practice karni hai। baap sab centres ke bachchon ko samjhaate rehte hain, nambarvaar to hain na। kai bachche raajaai pad paane ka purushaartha nahin karte to praja mein kya jaakar banenge! service nahin karte, apne par taras nahin aata hai ki ham kya banenge phir samjha jaata hai drama mein inka part itna hai। apna kalyaan karne ke liye gyaan ke saath-saath yog bhi ho। yog mein nahin rehte to kuchh bhi kalyaan nahin hota। yog bigar paavan ban nahin sakte। gyaan to bahut sahaj hai parantu apna kalyaan bhi karna hai। yog mein na rahne se kuchh bhi kalyaan hota nahin। yog bigar paavan kaise banenge? gyaan alag cheez hai, yog alag cheez hai। yog mein bahut kachche hain। yaad karne ka akla hi nahin aata। to yaad bigar vikarma kaise vinaash hon। phir saja bahut khaani padti hai, bahut pachhtaana padta hai। woh sthool kamaai nahin karte to koi saja nahin khaate hain, ismen to paapon ka bojha sir par hai, uski bahut saja khaani pade। bachche bankar aur beadab hote hain to bahut saja mil jaati hai। baap to kehte hain - apne par raham karo, yog mein raho। nahin to muphta apna ghaat karte hain। jaise koi oopar se girta hai, mara nahin to hospital mein pada rahega, chillaata rahega। naahek apne ko dhakka diya, mara nahin, baaki kya kaam ka raha। yahaan bhi aise hai। chadhna hai bahut ooncha। shreemat par nahin chalte hain to gir padte hain। aage chal har ek apne pad ko dekh lenge ki ham kya bante hain? jo serviceable, aagyaakaari honge, vahi oonch pad paayenge। nahin to daas-daasi aadi jaakar banenge। phir saja bhi bahut kadi milegi। us samay donon jaise dharmaraaj ka roop ban jaate hain। parantu bachche samajhte nahin hain, bhoolen karte rehte hain। saja to yahaan khaani padegi na। jitna jo service karenge, shobhenge। nahin to koi kaam ke nahin rahenge। baap kehte hain doosron ka kalyaan nahin kar sakte ho to apna kalyaan to karo। baandheliyaan bhi apna kalyaan karti rehti hain। baap phir bhi bachchon ko kehte hain khabardaar raho। naam-roop mein phansane se maaya bahut dhokha deti hai। kehte hain baba phalaani ko dekhne se hamko kharaab sankalp chalte hain। baap samjhaate hain - karmendriyon se kabhi bhi kharaab kaam nahin karna hai। koi bhi ganda aadmi jiski chalan theek na ho to centre par unko aane nahin dena hai। school mein koi badachlan chalte hain to bahut maar khaate hain। teacher sabke aage batlaate hain, isne aise badachlan ki hai, isliye inko school se nikaala jaata hai। tumhaare centres par bhi aisi gandi drishti vaale aate hain, to unko bhaga dena chaahiye। baap kehte hain kabhi kudrishti nahin rahni chaahiye। service nahi karte, baap ko yaad nahin karte to zaroor kuchh na kuchh gandagi hai। jo achhi service karte hain, unka naam bhi baala hota hai। thoda bhi sankalp aaye, kudrishti jaaye to samajhna chaahiye maaya ka vaar hota hai। ekdam chhod dena chaahiye। nahin to vriddhi ko paae nuksaan kar denge। baap ko yaad karenge to bachte rahenge। baba sab bachchon ko saavdhaan karte hain - khabardaar raho, kahaan apne kul ka naam badnaam nahin karo। koi gandharvi vivaah kar ikatthe rehte hain to kitna naam baala karte hain, koi phir gande ban padte hain। yahaan tum aaye ho apni sadgati karne, na ki buri gati karne। bure te bura hai kaam, phir krodh। aate hain baap se varsa lene liye parantu maaya vaar kar shraap de deti hai to ekdam gir padte hain। goya apne ko shraap de dete hain। to baap samjhaate hain badi sambhaal rakhni hai, koi aisa aaye to unko ekdam ravaana kar dena chaahiye। dikhaate bhi hain na - amrit peene aaye phir baahar jaakar asur ban ganda kiya। woh phir yeh gyaan suna na saken। taala band ho jaata hai। baap kehte hain apni service par hi tatpar rehna chaahiye। baap ki yaad mein rehte-rehte pichhaadi ko chale jaana hai ghar। geet bhi hai na - raat ke raahi thak mat jaana… aatma ko ghar jaana hai। aatma hi raahi hai। aatma ko roz samjhaaya jaata hai ab tum shantidham jaane ke raahi ho। to ab baap ko, ghar ko aur varse ko yaad karte raho। apne ko dekhna hai maaya kahaan dhokha to nahin deti hai? main apne baap ko yaad karta hoon?

oonch te oonch baap ki taraph hi drishti rahe - yeh hai bahut oonch purushaartha। baap kehte hain - bachche, kudrishti chhod do। deh-abhimaan maana kudrishti, dehi-abhimaani maana shuddh drishti। to bachchon ki drishti baap ki taraph rahni chaahiye। varsa bahut oonch hai - vishwa ki baadshaahi, kam baat hai! svapna mein bhi kisko nahin hoga ki padhaai se, yog se vishwa ki baadshaahi mil sakti hai। padhkar oonch pad paayenge to baap bhi khush hoga, teacher bhi khush hoga, satguru bhi khush hoga। yaad karte rahenge to baap bhi puchkaar dete rahenge। baap kehte hain - bachche, yeh khaamiyaan nikaal do। nahin to muphta naam badnaam karenge। baap to vishwa ka maalik banaate, saubhaagya kholte hain। bhaaratvaasi hi 100 pratishat saubhaagyashaali the so phir 100 pratishat durbhaagyashaali bane hain phir tumko saubhaagyashaali banaane ke liye padhaaya jaata hai।

baba ne samjhaaya hai dharma ke jo bade-bade hain, woh bhi tumhaare paas aayenge। yog seekhkar jaayenge। museum mein jo tourist aate hain, unko bhi tum samjha sakte ho - ab svarga ke gates khulne hain। jhaad par samjhaao, dekho tum phalaane samay par aate ho। bhaarat-vaasiyon ka part phalaane samay par hai। tum yeh knowledge sunte ho phir apne desh mein jaakar bataao ki baap ko yaad karo to tamopradhaan se satopradhaan ban jaayenge। yog ke liye to woh chaahna rakhte hain। hathayogi, sannyaasi to unhon ko yog sikhla na saken। tumhaari mission bhi baahar jaayegi। samjhaane ki badi yukti chaahiye। dharma ke jo bade-bade hain unhon ko aana to hai। tumse koi ek bhi achhi reeti yeh knowledge le jaaye to ek se kitne dher samajh jaayenge। ek ki buddhi mein aa gaya to phir akhbaaron aadi mein bhi daalenge। yeh bhi drama mein noondh hai। nahin to baap ko yaad karna kaise seekhe। baap ka parichay to sabko milna hai। koi na koi niklenge। museum mein bahut puraani cheejen dekhne jaate hain। yahaan phir tumhaari puraani knowledge sunenge। dher aayenge। unse koi achhi reeti samjhenge। yahaan se hi drishti milegi ya to mission baahar jaayegi। tum kahenge baap ko yaad karo to apne dharma mein oonch pad paayenge। punarjanma lete-lete sab neeche aa gaye hain। neeche utarna maana tamopradhaan banna। pope aadi aise kah na sake ki baap ko yaad karo। baap ko jaante hi nahin। tumhaare paas bahut achhi knowledge hai। chitra bhi sundar bante rehte hain। sundar cheez hogi to museum aur hi sundar hoga। bahut aayenge dekhne ke liye। jitne bade chitra honge utna achhi reeti samjha sakenge। shauk rehna chaahiye ham aise samjhaayen। sada tumhaari buddhi mein rahe ki ham brahman bane hain to jitni service karenge utna bahut maan hoga। yahaan bhi maan to vahaan bhi maan hoga। tum poojya banenge। yeh eeshvareey knowledge dhaaran karni hai। baap to kehte hain service par daudte raho। baap kahaan bhi service par bheje, ismen kalyaan hai। saara din buddhi mein service ke khyaal chalne chaahiye। foreigners ko bhi baap ka parichay dena hai। most beloved baap ko yaad karo, koi bhi dehdhaari ko guru nahin banaao। sabka sadgati daata woh ek baap hai। abhi wholesale maut saamne khada hai, wholesale aur retail vyaapaar hota hai na। baap hai wholesale, varsa bhi wholesale dete hain। 21 janma ke liye vishwa ki raajaai lo। mukhya chitra hain hi trimoorti, gola, jhaad, seedhi, viraat roop ka chitra aur geeta ka bhagwan kaun?..... yeh chitra to first class hai, ismen baap ki mahima poori hai। baap ne hi krishna ko aisa banaaya hai, yeh varsa god father ne diya। kaliyug mein itne dher manushya hain, satayug mein thode hain। yeh phergher (adli-badli) kisne ki? zara bhi koi nahin jaante hain। to tourist bahut karke bade-bade shahron mein jaate hain। woh bhi aakar baap ka parichay paayenge। points to service ki bahut milti rehti hain। vilaayat mein bhi jaana hai। ek taraph tum baap ka parichay dete rahenge, doosre taraph maaraamaari chalti rahegi। satayug mein thode manushya honge to zaroor baaki ka vinaash hoga na। world ki history-geography repeat hoti hai। jo ho gaya vo phir repeat hoga। parantu kisko samjhaane ka bhi akla chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada ek baap ki taraph hi drishti rakhni hai। dehi-abhimaani banne ka purushaartha kar maaya ke dhokhe se bachna hai। kabhi kudrishti rakh apne kul ka naam badnaam nahin karna hai।

2) service ke liye bhaag daud karte rehna hai। serviceable aur aagyaakaari banna hai। apna aur doosron ka kalyaan karna hai। koi bhi badachlan nahin chalni hai।

vardaan:- fullstop ki stage dvaara prakriti ki halchal ko stop karne vaale master prakritipti bhav

vartamaan samay halchal badhne ka samay hai। final paper mein ek taraph prakriti ka aur doosri taraph paanch vikaaron ka vikraal roop hoga। tamoguni aatmaon ka vaar aur puraane sanskaar..sab last samay par apna chance lege। aise samay par sametne ki shakti dvaara abhi-abhi saakaari, abhi-abhi aakaari aur abhi-abhi niraakaari sthiti mein sthit hone ka abhyaas chaahiye। dekhte hue na dekho, sunte hue na suno। jab aisi fullstop ki stage ho tab prakriti-pati ban prakriti ki halchal ko stop kar sakenge।

slogan:- nirvighna raajya adhikaari banne ke liye nirvighna sevaadhaari bano।

avyakt ishaare - “combined roop ki smriti se sada vijayi bano''

sada yahi smriti rahe ki main rooh us supreme rooh ke saath combined hoon। supreme rooh mujh rooh ke bina rah nahin sakte aur main bhi supreme rooh ke bina alag nahin ho sakta। aise har second hajoor ko haajir anubhav karne se roohaani khushbu mein avinaashi aur ekras rahenge।