Murli du jour du dimanche 20 septembre 2026

20-09-26 praatahmurli om shanti ''avyakt-baapdaada'' revise 30-11-11 madhuban

amritvele vishesh sarva shaktiyon ke anubhvi swaroop ban yog ki sakaash vaayumandal mein phailaao, man ko sada busy rakho, samay ki pukaar hai - teevra purushaarthi bhav

aaj baapdaada chaaron or ke bachchon ke mastak mein bhaagya ke chamakte hue sitaare dekh rahe hain। ek janma ka, doosra sambandh ka aur teesra praaptiyon ka। teenon bhaagya ko dekh harshit ho rahe hain। janma ka bhaagya to aap jaante ho ki aap sabko yeh divya janma, brahman janma dene vaala svayan bhaagya vidhaata hai। to socho, kitna bada bhaagya hai! saath-saath sambandh, iski visheshta jaante ho ki teenon sambandh baap, shikshak, satguru teenon sambandh ek baap se hain। ek mein hi teen sambandh hain। praaptiyon ko bhi jaante ho, jahaan baap hai vahaan praaptiyaan to sarva aur behad ki hai। ek mein teenon sambandh hain। vaise bhi jeevan mein yeh teen sambandh aavashyak hain lekin duniya vaalon ke harek sambandh alag-alag hain aur aapke teenon sambandh ek mein hain। ek mein teenon sambandh hone ke kaaran yaad bhi, anubhav bhi sahaj hota hai। sab teenon sambandh ke anubhvi hain na! baap dvaara kya milta hai? varsa। varsa bhi kitna ooncha milta hai aur yeh varsa kitna samay chalta hai kyonki parmaatma baap dvaara praapta hota hai। doosra sambandh hai shikshak ka, shiksha ko kaha jaata hai source aaph income। to aap sabko shikshak dvaara kitna oonch praapti hui hai, jaante ho na! aisi oonchi praapti sivaae paramatma pita ke aur kisse ho nahin sakti। shiksha se pad ki praapti hoti hai aur aap sabko sabse shreshtha praapti hai, duniya mein bhi shreshtha praapti raajyapad ko kaha jaata hai। to aapko bhi shikshak dvaara raajyapad ki praapti hui hai। abhi bhi svaraajya ke raaja ho, kyon? aatma raajayogi hone ke kaaran svaraajya adhikaari banti hai। sva par raajya karti hai। karmendriyon ke vasheebhoot nahin hoti, aatma maalik hoke in karmendriyon ki raaja ban jaati hai। to abhi ka svaraajya aur bhavishya mein bhi raajya bhaagya praapta hota hai। to double raajya abhi bhi aur bhavishya mein bhi pad ki praapti hoti hai। aur teesra sambandh hai satguru ka। teenon sambandh praapta hain na! hain? baap ka, shikshak ka aur teesra hai satguru ka। satguru dvaara guru ki shreemat milti hai। kitni shreshtha mat mili hai? to apne ko check karo ki sada shreemat par chalte hain va kabhi manmat parmat ki taraph to buddhi nahin jaati? check kiya? jo samajhte hain satguru dvaara sada hi shreemat shreshtha mat par chalne vaale hain, manmat parmat par kabhi bhi svapna mein bhi nahin jaate, woh haath uthaao, jo sada shreemat par hi chalte hain, parmat manmat nahin, haath uthaao।

dekho, maataaon ne uthaaya! thode thode utha rahe hain। kabhi kabhi chali jaati hain aur parmat manmat dhokha de deti hai। aur vishesh shreemat kya hai? apne ko aatma samajh mujh baap ko yaad karo। to sahaj hai ya mushkil hai? kabhi kabhi mushkil ho jaati hai! lekin baap yahi chaahte hain ki sada in teen sambandhon se har bachcha aage aage udta chale। to baapdaada poochhte hain ki jinhonne haath nahin uthaaya woh ab se manmat, parmat ka tyaag kar sakte hain? kar sakte hain? woh haath uthaao। achha! kyonki baapdaada ne samay ka ishaara de diya hai। abhi sangam ka samay ati valuable hai aur baapdaada ne yeh bhi ishaara de diya hai ki vartamaan samay ke pramaan sab achaanak hona hai isliye sada ever ready banna hai na! sabhi saath chalenge na ki peechhe peechhe aayenge? baapdaada ke saath apne ghar chalna hai na! ready ho na! saath chalne ke liye ready ho? ever-ready। ready bhi nahin, ever ready। to baapdaada samay ka ishaara de rahe hain। is ek janma mein 21 janmon ki praalabdha banaani hai। to socho kitna attention dena hai। baap ka har bachche ke saath pyaar hai, baap yahi chaahte hain ki har bachcha baap ke saath-saath chale aur saath-saath raajya adhikaari banen।

to aap saath chalne ke liye baap samaan sampoorn aur sampanna banenge tab to saath chalenge na! is samay is chhote se janma mein 21 janma ki praapti nishchit hai। to socho sangam ka chhota sa janma ek ek minute kitna mahaan hai! hisaab lagaao, is janma mein 21 janma ka raajya bhaagya lena hai to sangam ka ek minute bhi kitna valuable hai। to is value ko jaan kya karna padega?

baapdaada ne pahle bhi sunaaya hai ki do baaton ka vishesh attention do। do baaten kaun si? yaad hain na! ek samay aur doosra sankalp। sankalp vyartha na jaaye, samay vyartha na jaaye। ek ek second saphal ho। to bolo itna attention dena padega na! baapdaada ka to sabhi bachchon se pyaar hai। baapdaada yahi chaahte hain ki ek bachcha bhi saath se rah nahin jaae। saath hai, saath chalenge, saath raajya adhikaari ban sada jeevan mein sukh shanti ka anubhav karenge। to bolo, saath chalenge na! chalenge? rah to nahin jaayenge? dekho, teen bhaagya to har ek ke mastak mein chamak rahe hain। apne mastak mein yeh teenon hi bhaagya dikhaai dete hain na! sangamayug hi bhaagyavaan yug hai। jo jitna bhaagya banaane chaahe utna bana sakte hain। lekin bahut samay ka attention chaahiye। to sabhi bachche apne apne purushaartha mein abhi teevrata laao। purushaarthi hain, baapdaada dekhte hain purushaartha karte hain lekin sabhi ka teevrata ka purushaartha abhi hona chaahiye। baapdaada har bachche ko baalak so maalik dekhne chaahte hain। kiska maalik? sarva khajaanon ka maalik। kabhi kabhi koi bachche baapdaada ko kehte hain ki baba aapne to sarvashaktiyaan di hain aur ham bhi apne ko master sarvashaktivaan maante hain lekin kai bachche ulhana dete hain ki kabhi kabhi jis samay jo shakti ki aavashyakta hoti hai, woh samay par nahin aati hai। lekin iska kaaran kya? baap ne har ek ko sarva shaktiyaan di hain। di hain ki kisko kam di hain kisko jyaada? sarvashaktiyaan mili hain, haath uthaao। sabhi ko mili hain lekin samay par kyon nahin kaam par aati hain? iska kaaran? kaaran ko jaante bhi ho lekin us samay bhool jaate ho। sarvashaktiyon ka khajaana har bachche ko varse mein mila hai। baap ne sabhi ko sarvashaktiyon ka varsa diya hai, koi ko kam koi ko jyaada nahin diya hai। sarvashaktiyaan di hain lekin samay par kyon nahin aati hain! aap socho koi bhi agar apne svamaan ki seat par nahin hota to uska order koi maanta hai? to jis samay shakti nahin aati hain, uska kaaran hai ki aap apne master sarvashaktivaan ki seat par set nahin hote iseelie bina seat ke order koi nahin maanta। to sada apni seat par set raho। kabhi vesta thoughts chalte hain va kabhi tension aata hai to usse hi svamaan ki seat chhoot jaati hai। baapdaada ne har ek ko kitne svamaan diye hain। kitni badi svamaan ki list hai! ginti karo, kitne svamaan baap ne diye hain? svamaan mein set nahin hote hain to jahaan svamaan nahin vahaan kya hota hai? jaante ho na! deh abhimaan aata hai। ya to svamaan hai ya to deh-bhaan hai। to dehbhaan ki seat par order karenge to shakti nahin maanti hai। nahin to master sarvashaktivaan ka shakti nahin maanen yeh ho nahin sakta। seat par set hona, iska abhyaas sada karo। check karo chaahe karmayog mein ho, chaahe seva mein ho, chaahe apne manan manthan mein ho lekin seat par set hain to sarvashaktiyaan haazir hoti hain।

aaj baapdaada ne dekha, amritvele chakkar lagaaya। chaaron or ka chakkar lagaaya, chaahe videsh chaahe desh। baapdaada ko chakkar lagaane mein samay nahin lagta। to kya dekha? bataayen। sabhi majority baithe to the, uthkar apne apne sthaanon par baithe the, purushaartha bhi kar rahe the ki saara samay sarva anubhveemoorta ho karke baithen lekin kya dekha? anubhvi moorta koi koi the, kyonki sabse badi shakti anubhav ki hai। anubhvi swaroop, sarvashaktiyon ke anubhvi swaroop, master knowledgeful, master sarvashakti swaroop, to anubhvi swaroop banne mein kuchh kami dikhaai di। purushaartha karte hain, baapdaada ne phir bhi mubaarak di jo purushaartha karke majority aate hain, baithte majority hain lekin baapdaada yahi chaahte hain ki light might swaroop ke anubhvi moorta ban baithen kyonki yeh amritvele ke yog ki sakaash saare vaayumandal mein phailti hai। is anubhav ko aur aage badhaao। jaise brahma baba ko dekha, kitni powerful pharishte swaroop ki sthiti rahi। aise hi is amritvele ko abhi apne apne roop se attention aur athak hokar do। baapdaada ne dekha kai bachche light might roop mein bhi baithte hain, na nahin hai, haan bhi hai lekin is samay ke purushaartha ko aur bhi attention dena hoga aur baapdaada ne pahle bhi ishaara diya ki apne man ko sada busy rakho। chaahe mansa seva se, chaahe vaacha se, chaahe manan shakti mein busy rakho। manan karo। manan shakti man ko ekaagra bana deti hai। koi koi bachche manan achha karte bhi hain lekin manan shakti ko bhi saare din mein badhaao kyonki baapdaada ko last bachche se bhi pyaar hai। last bachche ko bhi baapdaada yahi chaahte ki saath chale, rah nahin jaaye। peechhe peechhe nahin rah jaae। to kya karenge? attention।

aaj baapdaada sabha ko dekh jaante hain ki bachchon ki vriddhi honi hi hai। 75 varsha ki jubilee manaai। uski to baapdaada bachchon ko mubaarak de rahe hain। baapdaada ne seva ki lagan bhi dekhi, har ek sthaan vaalon ko umang hai aur seva ka phal aur seva ka bal woh bhi dikhaai de raha hai। vishesh baapdaada ne dekha ki jahaan bhi bachchon ne seva ki hai vahaan is vaari government ke nimitta bani hui aatmaayen jyaada aai hain aur result mein maante bhi hain ki abhi ke samay anusaar jabki duhkh aur ashaanti badh rahi hai to yeh jo topic rakhi hai woh aavashyak hai kyonki jitna hi shanti chaahte hain utni ashaanti badh rahi hai। koi na koi baat ashaanti ki aa hi jaati hai। iske liye chaaron or tension badh raha hai aur government bhi chaahti hai ki bhaarat tension free ho jaae। to sabhi ne, jin bachchon ne seva ki hai un sabhi bachchon ko baapdaada mubaarak de rahe hain aur jo karne vaale hain unhon ko bhi advance mein mubaarak de rahe hain।

baapdaada abhi yahi chaahte hain ki ek ek bachcha follow father karte hue baap samaan sampanna zaroor banen। baapdaada ne dekha ki purushaartha bhi sab bachche karte hain। purushaartha ki lagan bhi hai, apne se promise bhi bahut karte hain, ab nahin karenge, ab nahin karenge… lekin kaaran kya hota hai? kaaran hai purushaartha mein dridhta kam hai। beech-beech mein albelaapan aa jaata hai। ho jaayenge, ban jaayenge... yeh albelaapan purushaartha ko dheela kar deta hai। to ab kya karenge? abhi yahi vishesh attention do, apne aap apna programme banaao, jismen saara din man ko busy rakho। apna programme aap banaao। timetable apna aap banaao, man ko busy rakhne ka। chaahe manan karo, chaahe seva karo, chaahe ek do ko attention khinchavaao lekin busy rakho। man se busy, shareer se busy to hote ho lekin man se busy raho। man ke busy rahne mein businessman number one bano। yeh kar sakte ho? karenge? karenge? kyonki aap jaante ho brahma baap bhi aapka intajaar kar rahe hain aur aapki advance party bhi aapka intajaar kar rahi hai, kab samay ko sameep laate hain kyonki samay ko sameep laane ke jimmevaar aap ho। apne ko sampanna banaana arthaat samay ko sameep laana।

to baapdaada vishesh ek maas de chuka hai। is ek maas mein har ek ko teevra purushaarthi ban, purushaarthi nahin teevra purushaarthi banna hi hai। manjoor hai? hai manjoor? haath uthaao। achha, mubaarak ho। abhi har ek ko dridh sankalp kar roz baapdaada ko apni result saare din ki kaisi deni hai? teevra purushaartha ki। purushaartha nahin teevra purushaartha। iske liye taiyaar hain? hain taiyaar? do haath uthaao। bahut achha। abhi baapdaada achaanak hi beech mein result mangaayega। date nahin bataate hain। achaanak hi ek maas ke andar koi bhi date par result mangaayenge। karna hi hai। yeh promise apne aap karo। baapdaada karaayega, woh to karaate hi hain lekin apne aap se yeh sankalp karo aur practical karke dikhaao। karna hi hai। karenge, ge-ge nahin... abhi ge-ge achhi nahin hai। samay aage badh raha hai, ati mein ja raha hai, to samay ka parivartan karne vaale kya aap poorvajon ko apne duhkhi parivaar par raham nahin aata? merciful bano। duhkhiyon ko sukh ka raasta bataao, chaahe mansa se, chaahe vaacha se, chaahe sambandh-samparka se। apna parivaar hai na! to parivaar ka duhkh mitaana hai। merciful bano। achha।

abhi jahaan bhi jo baithe hain un sabko, chaahe T.vi. mein dekh rahe hain, chaahe yahaan bhinna-bhinna sthaan par baithe hain woh bhi T.vi. mein dekh rahe hain, ek ek bachche ko baapdaada aaj teevra purushaarthi ka title de raha hai। abhi isi title ko sada yaad rakhna। koi poochhe aap kaun hain? to yahi kehna teevra purushaarthi। theek hai sabhi ko manjoor hai। manjoor hai? abhi dheela purushaartha nahin chalega, samay aage bhaag raha hai iseelie abhi teevra purushaarthi banna hi hai, samay ki pukaar hai - teevra purushaarthi bhav। to sabhi bachchon ko baapdaada ki bahut-bahut yaadapyaar aur teevra purushaartha ki saugaat de rahe hain। achha - om shanti।

vardaan:- maaya ki knowledge se innocent aur gyaan mein saint banne vaale sampoorn pavitra bhav

jaise satayugi aatmaayen vikaaron ki baaton ki knowledge se innocent hoti hain, vahi sanskaar spashta smriti mein rahen to maaya ki knowledge se innocent ban jaayenge। lekin bhavishya sanskaar smriti mein spashta tabhi rahenge jab aatmik swaroop ki smriti sadaakaal aur spashta hogi। jaise deh spashta dikhaai deti hai vaise apni aatma ka swaroop spashta dikhaai de arthaat anubhav mein aaye tab kahenge maaya se innocent aur gyaan mein saint arthaat sampoorn pavitra।

slogan:- andar ki ashuddhi hi sampoorn shuddh banne mein vighna daalti hai।

ye avyakt ishaare - ab apne daata swaroop ko pratyaksha karo

aap eeshvareey sevaadhaari seva karne vaale ho na ki seva lene vaale। agar seva lene vaale bante ho to naam pramaan karttavya nahin hua। khudaai-khidmatgaar seva lete nahin, dete hain kyonki daata ke bachche hain। jaise baap kuchh lete nahin, woh to sada dete hain, aise aap bhi dene vaale bano। agar kabhi problem roop bante ho to bhi seva lete ho। koi bhi prakaar ki extra seva lene vaalon ko kabhi yeh nasha nahin rahega ki ham daata, vardaata ke bachche hain।

vishesh soochna - maas ke teesre ravivaar ka yog abhyaas

aaj maas ka teesra ravivaar hai, sabhi bhaai bahinen sangathit roop mein ekatrit hokar saayan 6.30 se 7.30 baje tak apni gyaan swaroop sthiti mein sthit ho, gyaan ki light aur yog ki might sarva aatmaon ko dekar sahi raah dikhaane va us par chalne ki shakti har aatma tak pahunche aise shubh sankalpon se vishwa kalyaan ki seva karen।