Murli de Mamma - gyan-sitar-09

२७.१२.५८

paramatma ki nazar aur eeshaara sirf, abhi hi practical mein milta hai

kaha jaata hai -- "himmate marda, madde khuda ।" yeh akshar kis samay ke aur kiske hain, yeh bhi abhi ham jaante hain। duniya vaale samajhte hain -- jo kuchh chal raha hai woh paramatma ke hi ishaare se chalta hai kyonki woh sarvatra hai, haajira hajur hai। unke ishaare athva hukm se hi achha athva bura sab kuchh chal raha hai। ham jaante hain ki practical mein unki nazar, unka eeshaara aur purushaartha karna-karaana, is ek samay ki hi baat hai, jis samay woh practical apni nazar aur direction se aakar kaam karaate hain। teenon karttavya ab karte hain। sthaapna ka kaam bhi chal raha hai, vinaash ki bhi taiyaari ho rahi hai aur jo sthaapna karte hain, unki praalabdha chale - woh bhi ab banaai jaati hai। ek hi time par sab kaam karte hain। aise nahin saare chakra ka duhkh-sukh woh banaate hain। ham jaante hain -- woh to achhi baat banaayega na। aadhaakalpa sukh ki praalabdha rehti hai। unke karttavya se hi siddha hai ki ek cheez ke vinaash aur doosri cheej ki sthaapna ke liye woh upasthit hai। jis cheej ka vinaash karaate hain to zarur woh buri cheej hai। buraai ko vinaash hi karna hai to phir usko rach kaise sakta ? woh banaate hain achhi cheez । to unka karttavya hi siddha karta hai ki usne achhe ki sthaapna aur bure ka vinaash kiya hai। abhi humein unki nazar practical mein milti hai। practical mein direction dete hain। woh hamaare saamne khud apne eeshaare se kaam kara rahe hain। ham apne purushaartha se apni praalabdha bana rahe hain। ab ka hi practical part hai। agar sada yeh part hota to phir sada vinaash, sada sthaapna-paalna hoti ।

manushya samajhte bhi aise hain ki “manushya khaate-peete hain, marte-janmate hain – yeh sab bhagwan karaate hain। bhagwan ki yeh sthaapna-vinaash-paalna jaise ki chalti hi rehti hai।” parantu ab ham jaante hain - unki vinaash-sthaapna-paalna ka part aise nahin hota hai। woh to aadha kalpa ke liye aisi sthaapna kar dete hain, jismen sada sukh hai। in baaton ko ab ham samajh kar apni bhavishya praalabdha bana rahe hain। paalna bhi phir hamaare dvaara hi unko karaani hai। himmat aur madad abhi ki baat hai। baaki itna jo karte aaye usmein practical madad nahin thi । hamaare hi purushaartha se hamko aisi praalabdha milti hai। is hisaab se aadha sukh, aadha duhkh rakha hua hai। ham hi practical mein chakra mein aate hain । duniya is samay ki baaton ko yaadgaar ke rup mein simran karti hai। practical part bahut thoda time hai।

ab hamaari buddhi mein knowledge hai। aise thode hi, koi duhkhi ho raha hai woh bhi unke ishaare se । nahin । yeh to har ek ke karma hain jis kaaran duhkh-sukh uthaate aate hain। unki nazar, unka eeshaara oonch chadhaane vaala hai kyonki woh khud oonche te oonch hai। unke part mein oonch le jaane ki hi baat hai। yaadgaar sab hain hi is samay ke । auron ke yaadgaar aise nahin gaaye jaate hain। unhonne bhi paramatma ke yaadgaar gaaye hain। mahima saari paramatma ki hai, na ki koi manushya hasti ki। paramatma ek hi samay aakar saara kaam poora kar jaate hain। phir kuchh rehta nahin, jiske liye aana pade। sthaapna bhi aadha kalpa ke liye kar dete hain। vinaash bhi poora kar lete hain। yeh bhagwan ka part aur hamaara part bade kaayde se bana hua hai, jiska chakra chalta rehta hai। ek taraf aadi aur ek taraf ant hai। is samay unke dvaara hamko roshni mil rahi hai। us roshni se ham chal rahe hain। jo chalte hain unke liye hi roshni hai। jab tak unki nazar mein nahin hain tab tak jaise ki andhiyaare mein hain। himmate marda madde khuda, donon ka connection hai । purushaartha karen tab madad bhi mile । aadha kalpa sirf sunte aaye hain। ab practical unke dvaara praapta karna hai। isliye koi bhi baat se hamko ghrina nahin aa sakti hai। bana banaaya khel hai, ismen ooncha, neecha -- sab part hai। ham apne abhi ke purushaartha ki manzil ko bhi samajhte hain। ise bhi hamko tay karna hai ।