Murli de Mamma - gyan-sitar-35

८२ १८.९.६२

nishchay ke atalta ke bal se nai duniya ki sthaapna

phakeeri mein ameeri yaad hai na ? to yeh hai phakeeri mein, yaad karte hain ameeri ko। ham jo poojya the woh phir pujaari bane। sabka yeh antim janma hai। ek hain bhakta jo bhakti-maarga vaale hain aur ham phir woh bhakta hain jo pujaari se poojya ban rahe hain। aatma bhi puraani ho gai hai to shareer bhi puraane hain। ab phir parivartan aa raha hai । satayug mein mahaaraaja-mahaaraani, praja aadi sab honge । ab apne ko nirnay karna hai ki humein kya banna hai ? gupta vesh mein raajdhaani ban rahi hai। duniya nahin jaanti hai ki lakshmi-naaraayan ki raajdhaani kaise banti hai ? ek to poorva mein vinaashi dhan daan karne se alpakaal ki raajaai milti hai, doosra ladaai se milti hai। lekin yeh phir hai sadaakaal ke liye sukh ki raajdhaani। ismen na hai vinaashi dhan ka bal, na ladaai ka bal hai, parantu sahaj raajayog ke bal se raajdhaani sthaapan hoti hai। to kitni oonch baat hai ! ab yeh kaarya ho raha hai । yahaan kai aate hain lekin jo apne gharaane ke hain woh to chatak jaate hain, baaki to aate-jaate rehte hain।

ab bhaarat par lakshmi-naaraayan ke raajdhaani paane ka samay aakar pahuncha hai। saubhaagyashaali ki buddhi mein hi yeh baat baithti hai। kai to phir kah dete hain ki yeh kalpana ka sansaar bana baithe hain। parantu ham phir samajhte hain ki yeh jo soorya-chaand mein apna ghar banaane ki soch rahe hain, woh abhi-abhi kalpana ho jaayegi। yeh duniya to badalni hai। apne nishchay ke atalta ke bal se hi sthaapna ho rahi hai। is baat ko duniya nahin jaanti। ham hi sarva samartha baap dvaara yeh jaante hain। kya akaale mrityu, duhkh-rog aadi aisi hi manushya ki life hoti hai ?

kaal ko jeetne vaala bhi manushya hota hai na। abhi to akaale mrityu hoti rehti hai। vahaan akaale mrityu nahin hoti hai, samay par hi sab hota hai। kya manushya ki life aisi hoti hai ? log to kehte hain - aisa hota hi aaya hai। lekin unhonne dekha hi yahi hai। parantu hamko to baba ne dikhlaaya hai ki duhkh-ashaanti ka vahaan naam-nishaan nahin hai। ab to aatmaon ka khel hi bigad gaya hai। yeh baap, teacher, pati aadi to sab sambandh chalte aaye hain। abhi phir behad ka baap kehte hain ki sab sambandh mere se jodo। nai duniya ki rachna ab phir se bhagwan rach rahe hain।

manushya to kehte hain – yeh srishti anaadi hai, sab duhkh aadi bhi anaadi hain। lekin bhagwan ne nai duniya bhi kaise rachi ? woh bhi samjhaate hain। woh to kehte hain – pahle-pahle mitti ka putla tha, phir aise hua, phir srishti bani । lekin ab baap samjhaate hain ki nai duniya kaise tumhaare dvaara banaate hain। baap kehte hain ki "yeh karmakshetra tumhaara hai। tumhaari hi kheti hai। bhal lagvaane vaala main hoon, parantu tum apna karo, main apna karoon।" abhi to had ka sab sametna hai। aise nahin ki chhodo, parantu buddhiyog nikaalo। ab to buddhi mein aise hi sochna hai ki yeh puraani duniya hai, oopar jaana hai aur phir vaapas nai duniya mein aana hai। ab woh puraana naata na ho। ab apne thikaane ko yaad karna hai jo apna nivaas-sthaan tha। ab vahaan jaakar vishraam paana hai। mool vatan se chakra lagaae phir aakar svarga ke maalik banenge। ab banna yahaan hai, satayug mein to hokar rahenge। life ka maja kuchh aur hai। manushya kehte- eeshvar ka bhaana (marji ko) meetha kar bhogna hai। lekin yeh aur baat hai। jo eeshvar ka bhaana tha woh to ab ban raha hai। ab usko paana hai। baaki to dil khush kar rahe hain। yeh eeshvar ne nahin diya hai, yeh apne karmabhog hain। eeshvar duhkh thode hi deta hai। ab usse nikal aur jo eeshvar dvaara mil raha hai usko achhi tarah lena hai। achha । goodmorning ।