Murli de Mamma - gyan-sitar-39

२८.९.६२

gyaan ki roshni mili hai to din-raat avastha ka meter chadhta rahe

kaha jaata hai - hath kaar de, dil yaar de। paramatma ko yaar bhi kehte hain, yaar athva khuda-dosta । is par ek kahaani hai ki khuda-dosta pul par baitha tha। jo unke paas pahle aaega unko baadshaahi dega। pul hoti hai ek taraf se doosre taraf cross karne ki। to ham bhi sangam par khade hain। puraani duniya se paar ho nayi duniya mein jaaenge। ab chakra lagaae poora kiya hai। ab ham sabka, balki saari duniya ka yeh antim janma hai। humein yahaan se connection karna hai nai duniya mein। ab nai duniya ka kalam lagta hai। jahaan kalam lagta hai vahaan phir pralay ki baat nahin। yeh manushya srishti-vriksha ka kalam lagne vaala hai jiska foundation paramatma aakar lagaate hain। bade-bade manushyon se koi jagah aadi ka foundation dalvaate hain। lekin paramatma to aakar nai duniya ka foundation lagaate hain aur ham practical mein us part mein chal rahe hain।

ham jaante hain ki arjun ke rath mein bhagwan savaari kar aaya hai is yuddha ke maidaan par aur yuddha karne ka tareeka sikhla rahe hain। dharma sthaapan karne ki baat mein pavitra banne aur vikaaron ko kaatne ki baat hai। kitne manushya to svarga ke sukh ko bhi kam samajhte hain। samajhte hain - "woh sukh bhog kar bhi to neeche utarna hai। isliye aisa purushaartha karen hi kyon ?" lekin hamaari to chadhti kala hai। ab to sukh ke din dekhne hain। jab naya makaan banaaya jaata hai to puraana hone ke liye thode hi socha jaata hai। khushi to hoti hai na ki ham naya makaan banaayenge, usmein bachche honge, phir potre honge, aadi-aadi ! lekin aisa thode hi sochte hain ki yeh makaan to phir khatma hona hai। phir yeh sab khyaal kyon karen ? is alpakaal ke sukh ko samajhte bhi hain ki jo cheez aaj hai woh kal nahin rahegi। lekin phir bhi unke liye soch nahin karte hain। yeh baat aur hi lambi hai। yeh to janma-janmaantar ki praapti hai। ismen to guarantee hai aur svayan dene vaala bhi aisa hai jo kabhi dhokha bhi nahin dega। is sukh ki taste hi niraali hai।

kai phir kehte hain – “aatma ko us paramatma mein leen hona hai। bas, aananda usmein hai।” lekin ham to jaante hain ki aatma kab paramatma mein leen ho nahin sakti। leen ho jaane ka bhi agar kisne anubhav paaya ho to woh chihna milna chaahiye। woh vahaan se aakar bataave ki aisa hamne sukh paaya hai। lekin leen hi ho gaya to phir bataave kaun ? devtaaon ke to chihna milte hain। unhon ke yaadgaar hain, history hai। sabko duhkh ke bandhan se chhudaana, purified dhaam mein le jaana - yeh paramatma ka kaam hai। buddha, Christ aadi sabki aatmaayen is samay bandhan mein hain। sabka mukti-jeevanmukti daata woh hai।

ab ham sabki mat ek hai। husain ek hai। usmein hi buddhi jaati hai। vahaan to satsang mein jaao to kiski buddhi kismen, to kiski buddhi kismen hogi। khud guru bhi chhutti denge ki kisko bhi yaad karo। lekin ham to 'jo hai, jaisa hai,' - usi taraf buddhi ko sthit rakhte hain। hamaare is sangathan mein bahut taakat hai। bhal duniya mein bahuton ki mahima hoti hai lekin unki mahima vikaari manushya hi karte hain। aur ham jab baikuntha mein hain to svayan mahima sampanna hain hi। saadhu-sanyaasiyon ki vikaari manushya mahima karte hain। phir woh jinhon se mahima paate hain unke paas hi janma lete hain। aap to koi vikaariyon se mahima nahin paate, na vikaariyon se sambandh hi rakhte। hamaari baat hi alag hai। ham to vikaari ko nirvikaari banaae le chal rahe hain। to hamko kitna phakhur hona chaahiye ! ismen ashuddha nasha ya ahankaar ki baat nahin। ashuddha nasha bhi kyon ho ? ashuddha vaalon se jab mahima milti hai to ashuddha ahankaar baith jaata hai। lekin hamaari to kisi se bhent hi nahin hai। vahaan to hai hi shuddh praja aur sambandh hi baap-bete ka rehta hai। to baap-bete mein thode hi ahankaar rahega। ghar mein bhi baap-bachche hote hain, sab baap to nahin hote। vahaan bhi raaja-praja hote hain। parantu praja ko bhi sab praapti rehti hai। to hamko praalabdha vahaan lena hai।

is gyaan ko bhi jaisa hai vaisa hi samajhna hai। baap ne har ek cheej ki roshni di hai। to ismen raat-din avastha ka meter chadha rehna chaahiye। ham kaun hain, kiski santaan hain ! vo nasha rehna chaahiye। kehte hain na – khushi jaisi khuraak nahin। humein ab maut ka bhi dar nahin। sadaiv harshit rehna hai। harshit-chit honge to harshit-mukh bhi rahenge। abhi ham hain bephikra baadshaah। sachchi khushi to ab hai। vahaan to praalabdha mein honge। achha।