Avyakt murli for Wednesday 30 May 1973

>

30-05-73 om shanti avyakt baapdaadaamdhuban

sangam yug-purooshottam yug

nirbal ko bal dene vaale, vishwa ka maalik banaane vaale,vishwa-kalyaankaari,vishwa ka parivartan karne vaale baba bole :-

sabhi apne ko paandav sena ke mahaaveer ya mahaaveerniyaan samajhte ho? mahaaveer arthaat apne ko shaktishaali samajhte ho? koi nirbal aatma saamne aaye to kya nirbal ko bal dene vaale bane ho,ya abhi tak svayan mein hi bal bharte ja rahe ho? daata ho ya lene vaale bane ho?sarva-shaktiyon ka varsa praapta kar chuke ho ya abhi praapta karna hai? abhi tak praapti karne ka samay hai ya karaane ka samay hai? mahaan banne ke liye mehnat lene ka samay hai ya baap se li hui seva ka return karne ka samay hai? agar ant tak kisi bhi dvaara kisi bhi prakaar ki seva lete rahenge to seva ka return kya bhavishya mein karenge? bhavishya mein praarabdha bhogne ka samay hai ya return ka phal dene ka samay hai? ye sabhi baaten buddhi mein rakhte hue apne aap ko check karo ki hamaara antim part va bhavishya kya hoga? jab abhi se sarva-aatmaon ko baba ka khazaana dene vaale daata banenge, apni shaktiyon dvaara pyaasi va tadapti hui aatmaon ko ji-daan denge, vardaata ban praapta hue vardaanon dvaara unhein bhi baap ke sameep laayenge aur baba ke sambandh mein laayenge, tab yahaan ke daataapan ke sanskaar bhavishya mein ikkees janmon tak raajyapad arthaat daataapan ke sanskaar bhar sakenge। is sangamayug ko purooshottam sangamayug va sarvashreshtha yug kyon kehte ho? kyonki aatma ke har prakaar ke dharma ki, raajya ki, shreshtha sanskaaron ki,shreshtha sambandhon ki aur shreshtha gunon ki sarva- shreshthata abhi record ke samaan bharta jaata hai। chauraasi janmon ki chadhti kala aur utarti kala un donon ke sanskaar is samay aatma mein bharte ho। record bharne ka samay abhi chal raha hai।

jab had ke record bharte hain to bhi kitna attention rakhte hain। had ka record bharne vaale bhi teen baaton ka dhyaan rakhte hain। woh kaun-si hai? woh log vaayumandal,apni vritti aur vaani in teenon ke oopar attention dete hain। agar vritti chanchal hoti hai aur woh ekaagra nahin hoti hai to bhi vaani mein aakarshan karne ka ras nahin rehta। jis prakaar ka geet gaate hain, usi roop mein sthit hokar gaate hain। agar koi duhkh ka geet hota hai to duhkh ka roop dhaaran kar geet na gaaye to sunne vaalon ko us geet se koi ras nahin aayega। jab had ka geet gaane vaale va record bharne vaale bhi in sabhi baatn ka dhyaan dete hain to aap behad ka record bharne vaale, saare kalpa ka record bharne vaale kya har samay in sabhi baaton ke oopar attention dete ho? yeh attention rehta hai ki har second record bhar raha hoon? kya itna attention rehta hai? record bharte-bharte agar ullaas ke bajaay aalasya aa jaay to record kaise bharega? record bharne ke samay kya koi aalasya karta hai?to aap log bhi jab record bhar rahe ho to bharte-bharte aalasya aata hai ya sadaiv ullaas mein rehte ho? kabhi apne bhare hue saare din ke record ko saakshi hokar dekhte ho ki aaj ka record kaisa bhara hai?

jaise tape mein bhi pahle bhar kar phir dekhte hain aur sunte hain ki dekhen kaisa bhara hai, theek hai ya nahin?vaise hi kya aap bhi saakshi ho kar dekhte ho? dekhne se kya lagta hai? apne aap ko janchata hai ki theek bhara hai? ya apne aapko dekhte hue sochte ho ki isse achha bharna chaahiye। result to dekhte ho na?jo samajhte hain ki sadaiv apne aap ko saakshi hokar roj check karte hain ki kabhi bhi check karna miss nahin hota hai- woh haath uthaao? (thodaan ne haath uthaaya)। abhi checker hi nahin bane ho? jo checker na bana hai woh maikar kya banenge? bhool jaate ho kya?time oopar-neeche ho jaaye yeh ho sakta hai lekin bhool jaay yeh ho nahin sakta। to aatma ki dincharya jo amritvele banaate ho, fix karte ho woh check karna kyon bhool jaate ho? ya fix karna hi nahin aata hai?aatma ko dincharya fix karni aati hai? yeh to bahut common) baat hai। is common niyam par bhi agar vismrit hai to isse kya siddha hota hai ki aatma abhi tak bhi nirbal hai। jo apne aapko eeshvareey niyam,eeshvareey maryaadaaon mein nahin chala sakte woh kya vishwa ki maryaadaapoorvak laaphul (Lawful) raajya ko chala sakenge? jo sangamayugeey raajya-pad ke adhikaari na bane hain woh bhavishya raajya-pad kaise pa sakte hain?is sangathan ki teachers kaun hain? itni kam result ki jimmevaar kaun? kya aaye hue teacher svayan checker hain? koi himmat se nahin uthaati hain। agar abhi-abhi vishwa-yuddha chhid jaay to? (kisi ne kaha ki usi samay khade ho jaayenge) agar samay par khade ho jaayenge to isko kya kaha jaayega? prakriti ke aadhaar par jo puroosh chale to us puroosh ko kya kaha jaata hai?samay bhi prakriti hai na?to yadi puroosh prakriti ke aadhaar par chalne vaala ho to usko kya paas with honour kaha jaayega? samay ka dhakka lagne se jo chal pade usko kya kaha jaayega? kya yahi socha hai,ki dhakke se chalne vaale banenge? vartamaan sangathan to bahut kamjor hai। majority kamjor hai। achha phir bhi beeti so beeti, lekin abhi se aap apne aap ko parivartan kar lo। abhi phir bhi samay hai, lekin bahut thoda hai। abhi to baapdaada aur sahayogi shreshtha aatmaayen aap purushaarthi aatmaon ko ek ka hazaar guna sahayog dekar, sahaara dekar, sneh dekar aur sambandh ke roop mein bal dekar aage badha sakte hain। lekin thode samay ke baad yeh baaten arthaat lift ka milna bhi banda ho jaayega। isliye abhi jo-kuchh bhi lena chaaho woh le sakte hain। phir baad mein baap ke roop ka sneh badal kar supreme justice ka roop ho jaayega।

justice ke aage chaahe kitna bhi snehi sambandhi ho lekin ‘law is law’ (Law is Law)। abhi lav ka samay hai phir law ka samay hoga। phir us samay lift nahin mil sakegi। abhi hai praapti ka samay aur phir thode samay ke baad praapti ka samay badalkar pashchaataap ka samay aayega। to kya us samay jaagenge? baapdaada phir bhi sabhi bachchon ko kahenge ki thode samay mein bahut samay ki praalabdha bana lo। samay ke intazaar mein albele na bano। sadaiv yeh smriti mein rakho ki hamaara har karma chauraasi janmon ke record bharne ka aadhaar hai। apni vritti,apne vaayumandal aur apni vaani ko yathaartha roop mein sait karo। jaise woh log bhi vaataavran ko banaate hain aise aap log bhi apne vaataavran ko, apni antarmukhta ki shakti se shreshtha banaao। vritti ko shreshtha aur vaani ko bhi raazayukta aur yukti-yukta banaao tab hi yeh result badal sakegi। badalta to hai na? kya aise hi manjoor hai? challenge to bahut badi karte ho ki ham paanch tatvon ko bhi badlenge। to bina checker ke maker kaise banenge?abhi se complaint complete ho jaani chaahiye। jo samajhte hain ki abhi se yeh kamjori chhoot phir ant tak kabhi bhi yeh na rahegi woh haath uthaaven। iski jimmevaari kis par (koi ne kaha deedi par,koi ne kaha baapdaada par) baapdaada karenge to baapdaada paavenge। karne ke samay baapdaada par aur paane ke samay?bhavishya pad paane ka tyaag karo to phir karne ka bhi tyaag karo। lekin woh kar nahin sakte kyonki muktidhaam ke ho hi nahin। harek ko apni jimmevaari aap uthaani hai। agar yeh sochenge ki deedi, daadi va teacher jimmevaar hain to isse siddha hota hai ki aap ko bhavishya mein un hi ki praja banna hai, raaja nahin banna hai। yeh bhi adheen rahne ke sanskaar hue na?jo adheen rahne vaala hai woh adhikaari nahin ban sakta। vishwa ka raajyabhaagya nahin le paata। isliye svayan ke jimmevaar,phir saare vishwa ki jimmevaari lene vaale vishwa mahaaraajan ban sakte hain। vishvakalyaankaari baap ki santaan hokar aur apna kalyaan nahin kar sakte ho?kya yeh shobhta hai? yeh to kaliyug ke karmabhog ki nishaani bataate ho ki koi lakhapti hai lekin ek roopaye ka bhi sukh svayan nahin le sakta। to sarvashaktiyon ke khajaane ka maalik ho lekin svayan ke prati ek chhoti-si shakti bhi use nahin kar paate ho isko kya kaha jaaye? sangamayug par braahmanon ki kya yeh nishaani hai? abhi sangamayugi ho ya ek paanv kaliyug mein rakh diya hai ki kahin sangamayug par na tik sakenge, to kahaan chale jaayenge? sangamayug ki yeh nishaani nahin hai। isliye abhi se teevra purushaarthi ban dridh- sankalp lo ki karna hi hai aur banna hi hai। karenge aur plan banaayenge isko bhi teevra purushaarthi nahin kaha jaata। kya plan banaavenge? kya bana hua nahin hai? trikaaldarshi ko to plan banaane mein samay nahin lagega kyonki usko to teenon hi kaal spashta hain। sabhi kaarya second mein hon aisi teevra- gati apni banaao, teevra-gati vaale hi sadgati ko paayenge।

achha aise ummeedvaar, baapdaada ke shreshtha sankalp ko saakaar karne vaale,har sankalp,karma aur bol ko check karne vaale, har second mein,har sankalp mein svayan ka kalyaan aur vishwa ka kalyaan karne vaale, vishwa-kalyaankaari,vishwa-parivartak aatmaon ko baapdaada ka yaad-pyaar aur namaste।

is vaani ka saar

1. abhi jo samay chal raha hai vo hai record bharne ka। record bharte samay vishesh teen baaton par attention diya jaata hai-vaataavran,vritti aur vaani। jab had ka record bharne vaale hi itna attention rakhte hain to hamko bhi bahut dhyaan rakhna chaahiye। vaataavran ko apni antarmukhta ki shakti se shreshtha banaao;vritti ko shreshtha aur vaani ko bhi raajayukta evan yuktiyukta banaao। aisa karne se hi result badal sakta hai।

2. svayan ka svayan checker ban kar har roj ye check karo ki jo mera record bhar gaya hai kya woh theek hai ya nahin?apne aapko janchata hai ya nahin? kyonki checker hi maker ban sakta hai। yadi is common niyam par abhi tak bhi vismrit hain to siddha hai aatma abhi tak nirbal hai।