Avyakt murli for Sunday 3 February 1974

> 03-02-74 om shanti avyakt baapdaadaamdhuban

upraam va jvaala roop ke dridh sankalp se vinaash ka kaarya sampanna karo

mukti aur jeevanmukti ke gates kholne vaale, tadaphti hui aatmaon ko sheetal, shant,aanandamoorti banaane vaale, aur sada sarva karma-bandhanon se mukta, sarva ka kalyaan karne vaale niraakaar pita shiv bole:-

jaise baap-daada ko saakaar, aakaar aur niraakaar anubhav karte ho,kya vaise hi apne ko bhi baap-samaan saakaar hote hue aakaari aur niraakaari sada anubhav karte ho? yeh anubhav nirantar hone se is saakaari tan aur is puraani duniya se svatah hi upraam ho jaavenge। aise anubhav karenge jaise ki oopar-oopar se saakshi ho is puraani duniya ko khel sadrishya dekh rahe hain। aisi powerful (shaktishaali) stage abhi sadaakaal ki honi chaahiye। aisi stage par sthit hui aatma mein dekhne se hi kya dikhaai dengi? light house aur power house, aisi aatmaayen baap-samaan vishwa-kalyaankaari kahlaai jaati hain। jo bhi saamne aaye harek light aur might ko praapta karti jaay, kya aise bhandaar bane ho? aise mahaadaani, vardaani,sarvagun daani, sarvashaktiyon ke daani, sang se roohaani rang lagaane vaale,najar se nihaal karne vaale, andhon ko teesra netra dene vaale,bhatki hui aatmaon ko manzil batlaane vaale, tadapti hui aatmaon ko sheetal, shant aur aanandamoorti banaane vaali aatma bane ho?kya is nishaane ke nashe mein rehte ho?isko hi baap-samaan kaha jaata hai।

jaise samay ki sameepta dikhaai deti hai, kya vaise hi apni sthiti ki sameepta va samaanta dikhaai deti hai? jaise duniya ke log aapke sunaaye hue samay pramaan do varsha ka intazaar kar rahe hain, kya aise bhi aap sthaapna ke aur vinaash ka kaarya karaane vaale do varsha ke andar apne kaarya ko aur apni stage va sthiti ko sampanna banaane ke intazaam mein lage hue ho? ya intazaam karne vaale albele aur intazaar karne vaale tez hain,aap kya samajhte ho? kya intazaam jor-shor se kar rahe ho ya jaise duniyaavi log kehte hain, ki jo hoga so dekha jaayega,aise hi aap intazaam karne ke nimitta bani hui aatmaaen bhi, yeh to nahin sochti ho,ki jo hoga so dekha jaayega?isko hi albelaapan kaha jaata hai। ab to itna bada kaarya karne ke liye khoob taiyaari chaahiye,pata hai ki kya taiyaari chaahiye? kya shankar ko kaarya karaana hai? usko hi to nahin dekhte ho ki kab shankar vinaash karaavenge? vinaash jvaala prajvalit kab aur kaise hui? kaun nimitta bana?kya shankar nimitta bana ya yagya rachne vaale baap aur brahman bachche nimitta bane? jab se sthaapna ka kaarya-arth yagya racha tab se sthaapna ke saath-saath yagya-kunda se vinaash ki jvaala bhi pragat hui। to vinaash ko prajjavlit karne vaale kaun hue? baap aur aap saath-saath hai na? to jo prajvalit karne vaale hain to unhon ko sampanna bhi karna hai, na ki shankar ko?shankar samaan jvaala-roop ban kar prajvalit ki hui vinaash ki jvaala ko sampanna karna hai। jab koi ek arthi ko bhi jalaate hain to jalaane ke baad beech-bi cha mein agni ko tez kiya jaata hai, to yeh vinaash jvaala kitni badi agni hai। inko bhi sampanna karne ke liye nimitta bani hui aatmaon ko tej karne ke liye hilaana pade-kaise hilaaven? haath se va laathi se?sankalp se is vinaash jvaala ko tez karna pade, kya aisa jvaala roop ban, vinaash jvaala ko tez karne ka sankalp emerge hota hai ya yeh apna kaarya nahin samajhte ho?

drama ke anusaar nishchit hote hue bhi nimitta bani hui aatmaon ko purooshaartha karna hi padta hai। isi prakaar ab is mukti aur jeevanmukti ke gates kholne ki jimmedaari baap ke saath-saath aap sabki hai। woh vinaash sarva-aatmaon ki sarva- kaamnaaen poorn karne ka nimitta saadhan hai। yeh saadhan aapki saadhna dvaara poora hoga। aisa sankalp emerge hona chaahiye ki ab sarva-aatmaon ka kalyaan ho। sarva tadapti hui, duhkhi aur ashaanta aatmaayen vardaata baap aur bachchon dvaara vardaan praapta kar sada shant aur sukhi ban jaaen aur ab ghar chalen। yeh smriti samay ki sameepta pramaan tez honi chaahiye। kyonki is sankalp se hi aur is smriti se hi vinaash jvaala bhadak uthegi aur sarva ka kalyaan hoga।

ab jitna hi, behad ke vishaal swaroop ki service teevra roop se karte ja rahe ho itna hi behad ki upraam vritti teevra chaahiye। aapki behad ki upraamvritti athva vairaagya vritti vishwa ki aatmaon mein alpakaal ke liye hogi। to apne sukh se vairaagya utpanna karegi। tab hi vairaagya ke baad samaapti hogi। apne aap se poochho ki kya hamaare andar behad ki vairaagya vritti rehti hai? jo gaayan hai ki karte hue akarta। samparka-sambandh mein rehte hue karmaateet, kya aisi stage rehti hai? koi bhi lagaav na ho aur service bhi lagaav se na ho lekin nimittabhaav se ho; isse hi karmaateet ban jaayenge। ab apne kaarya ko sametna shuru karo। jab abhi se sametna shuru karenge tab hi jaldi sampanna kar sakenge। sametne mein bhi time lagta hai। jab koi kaarya athva dukaan aadi sametni shuru karte hain,to kya kiya jaata hai? sel karte hain। jab sel likh dete hain to woh saamaan jaldi-jaldi samaapta ho jaata hai। to yeh fair bhi kya hai? yeh bhi sel lagaaya hai na, taaki jaldi-jaldi sabko sandesh mil jaae। jo khareedna hai, woh khareed lo,nahin to ulhana na rah jaae। abhi kya karna hai? kaarya sametna arthaat svayan ke lagaav ko sametna hai। agar svayan ko sarva taraph se samet kar ever-ready banaaya to aapke ever-ready banne se vinaash bhi ready ho jaayega। jab aag prajvalit karne vaale hi sheetal ho baith jaavenge to aag kya hogi? to aag madhyam pad jaayegi na?isliye ab jvaala roop ho apne ever-ready banne ke powerful sankalp se vinaash jvaala ko tez karo। jaise duhkhi aatmaon ke man se yeh aavaaz shuru hua hai ki ab vinaash ho, vaise hi aap vishwa-kalyaankaari aatmaon ke man se yeh sankalp utpanna ho ki ab jaldi hi sarva ka kalyaan ho tab hi samaapti hogi, samjha?

paalna to ki, ab kalyaankaari bano aur sabko mukta karaao। vinaashkaariyon ki kalyaankaari aatmaon ka sahayog chaahiye। unke sankalp ka ishaara chaahiye। jab tak aap jvaalaaroop na bane, tab tak ishaara nahin kar sakte। isliye ab svayan ki taiyaari ke saath-saath vishwa ke parivartan ki bhi taiyaari karo। yeh hai aapka last kartavya kyonki yahi shakti swaroop ka karttavya hai। svayan to nahin ghabraate ho na? vinaash hoga ki nahin hoga, kya hoga aur kaise hoga? yeh samajhne ke bajaae ab aisa samjho ki yeh hamaare dvaara hona hai। yeh jaankar ab svayan ko shakti swaroop banaao,svayan ko light house aur power house banaao। achha,kya har baat mein aap nishchay buddhi ho?

aise sada achal, adol,nirbhay,shuddh sankalp mein sthit rahne vaale, sankalp ki siddhi praapta karne vaale, sada sarva karma bandhanon se mukta, karmaateet sthiti mein sthit rahne vaale aur baap-daada ke shreshtha kaarya mein sada sahayogi aatmaon ko baap-daada ka yaad-pyaar aur namaste।

murli ka saar

(1) baap samaan sada apne ko aakaari va niraakaari anubhav karte rahne se is patit tan aur is puraani duniya se upraam ho jaayenge।

(2) aapki behad ki upraam vritti arthaat vairaagya vritti hi vishwa ki aatmaon mein alpa kaal ke sukh se vairaagya utpanna karegi aur is vairaagya ke baad hi samaapti hogi।

(3) ab shankar samaan jvaala roop ban kar prajvalit ki hui vinaash ki jvaala ko sampanna karna hai।

(4) mukti aur jeevanmukti ke get kholne ki zimmevaari roohaani baap ke saathsaath aap bachchon ki bhi hai।

(5) ab ghar chalne ki smriti samay ki sameepta pramaan tez honi chaahiye,kyonki is sankalp se hi aur is smriti se hi vinaash jvaala bhadak uthegi aur sarva ka kalyaan hoga।

(6) vinaashkaariyon ko kalyaankaari aatmaon ke sankalp ke ishaare ka sahayog chaahiye।