Avyakt murli for Sunday 18 January 1976

> 18-01-76om shanti avyakt baapdaadaamdhuban

samarthi divas ke roop mein smriti-divas sarva aatmaon ke param snehi parampita shiv bole:-

aaj baap-daada apne sarva lavleen bachchon ko dekh bachchon ke sneh ka response de rahe hain। sada baap-samaan vidhaata aur vardaata bhav! sada vishwa-kalyaankaari, vishwa ke raajya-adhikaari bhav! sada maaya,prakriti aur sarva paristhitiyon ke vijayi bhav! aaj baap-daada sarva vijayi bachchon ke mastak ke beech vijay ka tilak chamakta hua dekh rahe hain। sarva bachchon ke haston mein yahi vijay ka jhanda dekh rahe hain। har-ek ke dil ki aavaaj ‘vijay hamaara janma-siddha adhikaar hai’ -yeh naara goonjata hua sun rahe hain। aaj amritvele sarva bachchon ke sneh aur aahvaan ke meethe-meethe aalaap sun rahe the। door-door bichhudi hui,tadapti hui gopikaayen nadi ke samaan saagar mein sama rahi theen। baapdaada bhi bachchon ke sneh ke swaroop mein sama gaye। har-ek ke meethe-meethe moti hday ka haar ban baap-daada ke gale mein sama gaye। har-ek ke bhinna-bhinna sankalp, variety,madhur saajon ke roop mein sunaai de rahe the। abhi-abhi chaaron or baap-daada ko yaad ki maalaayen anek bachche daal rahe hain। aaj ke din ko ‘smriti divas’ ke saath-saath ‘samarthi-divas’bhi kehte hain। aaj ke is yaadgaar divas par baap-daada ne jaise aadi mein bachchon ke sir par gyaan-kalash rakha,saakaar dvaara shaktiyon ko tan, man, dhan will (Will) kiya,vaise hi saakaar tan dvaara saakaar part ke antim samay shakti sena ko vishwa-kalyaan ke will-power ki will ki। svayan sookshm vatan nivaasi ban saakaar mein bachchon ko nimitta banaaya। iseeliye yeh samarthi-divas hai।

aaj baap sarva bachchon ke sneh mein, aavaaj se pare svayan mein samaane ja raha hai। is samay chaaron or sabka full-force se ulaahne aur aahvaan ke man ka aavaaz aa raha hai। sab svayan mein samaane ja rahe hain। aap sabko sunaai de raha hai? naye-naye bachchon ko vishesh roop se baap-daada yaad ka return de rahe hain। jaise puraane bachchon ko double engine ki lift mili,vaise naye bachchon ko gupta madad ki praapti ke anubhav ki, khushi ke khajaane ki vishesh lift, (Lift) baap-daada gift (Gift) mein de rahe hain। unke anek ulaahnon ko seva aur sada saath ke anubhav dvaara ulaahne umang-utsaah ke roop mein parivartan kar rahe hain। jaise naye bachchon ka vishesh lagaav baap aur seva se hain,vaise baapdaada ki bhi vishesh sahayog ki najar naye bachchon par hai। baap bhi aise bachchon ki kamaal ke gun ga rahe hain। achha!

sarva snehi, sada ek baap ke lav mein leen rahne vaale, baap-daada ko prakhyaat karne vaale, sarva aatmaon dvaara jay-jaykaar ki vijay maalaayen dhaaran karne ke nimitta bane hue,aise vijayi,baap-samaan sarva gunon ko saakaar roop mein pratyaksha karne vaale, sarva siddhiyon ko seva prati lagaane vaale,aise vishwa-kalyaankaari baap-daada ke bhi diltakhta adhikaari bachchon ko baap-daada ka yaad-pyaar aur namaste।

deedi ji tatha vatson ko saamne dekh baap-daada bole –

‘‘aaj bachchon ka vishesh swaroop kaun-sa raha?sneh ke swaroop ke saath-saath ulaahne bhi diye। jaise baap gyaan ka saagar hai, to saagar ki visheshta kya hoti hai? jitni lahren, utna hi shant। lekin ek hi samay donon visheshtaayen hain। vaise hi baap ke samaan banne vaalon ki bhi yeh visheshta hai ki baahar se smriti-swaroop aur andar se samarthi-swaroop। jitna hi saakaar swaroop mein smriti-swaroop utna hi andar samarthi sva roop ho। donon ka saath-saath balance ho। aisa balance raha? jaisa samay va jaisa din vaisa swaroop to hota hi hai। lekin alaukikta yeh hai ki donon ke balance ka swaroop spashta dikhaai de। part bhi baja rahe hain, lekin saath-saath saaksheepan ki stage bhi ho। ‘saaksheepan’ki stage hone se part bhi accurate (Accurate) bajaayenge। lekin part ka swaroop nahin ban jaayenge arthaat part ke vash nahin honge। will-power hogi।

jo chaahen, jis ghadi chaahen, vaisa apna swaroop dhaaran kar sakte ho। isko kehte hain will-power। prem-swaroop mein bhi shaktishaali-swaroop saath-saath samaaya hua ho। sirf prem-swaroop ban jaana - yeh laukikta ho gai। alaukikta yeh hai ki jo prem-swaroop ke saath-saath shaktishaali swaroop bhi rahe। isliye shaktishaali swaroop ka antim drishya‘nashtomohah smriti-swaroop’ka dikhaaya hai। jitna hi ati sneh, utna hi ati nashtomohah। to last paper kya dekha? sneh hote hue bhi nashtomohah smriti-swaroop। yahi last paper yaadgaar mein bhi gaayan roop mein hai,yahi practical karma karke dikhaaya। saakaar sambandh sammukh hote hue samaane ki bhi shakti aur sahan karne ki bhi shakti। yahi donon shaktiyon ka swaroop dekha। ek taraph sneh ko samaana, doosre taraph raha hua last ka hisaab-kitaab sahan shakti se samaapta karna। samaana bhi aur sahan bhi karna-donon ka swaroop karma mein dekha। kya baap ka bachchon mein sneh nahin hota? sneh ka saagar hote huye bhi shant! apne shareer se bhi upraam! yahi last stage hai। yeh practical mein karma karke dikhlaaya। yahi (raatri ka) samay tha na। last paper ko first number mein practical mein kiya। swaroop mein laana sahaj hota hai,lekin samaana,ismen will-power chaahiye। saara part samaane ka dekha। karmabhog ko bhi samaana aur sneh ko bhi samaana। yahi will-power hai। yahi will-power ant mein bachchon ko ‘will’ ki। achha!

vaani ka saar

1. baba bole - yeh divas keval smriti-divas nahin, ‘samarthi divas’ bhi hai kyonki svayan sookshm vatan nivaasi ban baba ne saakaar mein bachchon ko nimitta banaaya।

2. baba kehte hain ki jaise puraane bachchon ko double engine ki lift mili, vaise naye bachchon ko gupta madad, praapti ke anubhav ki khushi ke khazaane ki vishesh lift baapdaada gift mein dete hain।

3. jo chaahen jis ghadi chaahen, vaisa apna swaroop dhaaran kar sako,isko kehte hain‘will power।’prem-swaroop mein shaktishaali-swaroop bhi saath-saath samaaya hua ho - yahi alaukikta hai। sirf prem-swaroop ban jaana to laukikta ho gai।