Daily Murli for Sunday 30 July 2023

30-07-23 praatahmurli om shanti ''avyakt-baapdaada'' revise 25-03-95 madhuban

brahman jeevan ka sabse shreshtha khajaana - sankalp ka khajaana

aaj baapdaada chaaron or ke bachchon ke khajaanon ke khaate dekh rahe the। har ek bachche ko khajaane bahut mile hain aur avinaashi anginat khajaane mile hain। sirf is janma ke liye nahin lekin anek janmon ki guarantee hai। ab bhi saath hain aur aage bhi saath rahenge। to aaj vishesh jo sabse shreshtha khajaana hai aur sarva khajaanon ka vishesh aadhaar hai vo hi vishesh dekh rahe the ki sabke khaate mein jama kitna hai? mila anginat hai lekin jama kitna hai? to sabse shreshtha khajaana sankalp ka khajaana hai aur aap sabka shreshtha sankalp hi brahman jeevan ka aadhaar hai। sankalp ka khajaana bahut shaktishaali hai। sankalp dvaara second se bhi kam samay mein paramdham tak pahunch sakte ho। sankalp shakti ek automatic rocket se bhi teevra gati vaala rocket hai। jahaan chaaho vahaan pahunch sakte ho। chaahe baithe ho, chaahe koi karma kar rahe ho lekin sankalp ke khajaane se va shakti se jis aatma ke paas pahunchna chaaho uske sameep apne ko anubhav kar sakte ho। jis sthaan par pahunchna chaaho vahaan pahunch sakte ho। jis sthiti ko apnaana chaaho, chaahe shreshtha ho, khushi ki ho, chaahe vyartha ho, kamjori ki ho, second ke sankalp se apna sakte ho। sankalp kiya - main shreshtha brahman aatma hoon to shreshtha sthiti aur shreshtha anubhooti hogi aur sankalp kiya main to kamjor aatma hoon, mere mein koi shakti nahin hai, to second ke sankalp se khushi gaayab ho jaayegi। pareshaani ke chinha sthiti mein anubhav honge। lekin donon sthiti ka aadhaar sankalp hai। yaad mein bhi baithte ho to sankalp ke aadhaar se hi sthiti banaate ho। main bindu hoon, main pharishta hoon… yeh sthiti sankalp se hi bani। to sankalp kitna shaktishaali hai!

gyaan ka aadhaar bhi sankalp hi hai। main aatma hoon, shareer nahin hoon - ye sankalp karte ho। saara din man-buddhi ko shuddh sankalp dete ho va manan mein shuddh sankalp karte ho to manan shakti ka aadhaar bhi sankalp shakti hai। dhaarna karte ho, man-buddhi ko sankalp dete ho ki aaj mujhe sahanshakti dhaaran karni hai to dhaarna ka bhi aadhaar sankalp hai। seva karte ho, plan banaate ho to bhi shuddh sankalp hi chalte hain na! shuddh sankalp dvaara hi plan banta hai। anubhav hai na! to brahman jeevan ka vishesh shreshtha khajaana hai sankalp ka khajaana। agar aap sankalp ke khajaane ko saphal karte ho to aapki sthiti, karma saara din bahut achha rehta hai aur sankalp ke khajaane ko vyartha ganvaate ho to result kya hoti? jo sthiti chaahte ho vo nahin hoti। aur aap sab jaante ho ki vyartha sankalp buddhi ko bhi kamjor karte hain aur sthiti ko bhi kamjor karte hain। jinka vyartha chalta hai unki buddhi kamjor hoti hai, confused hoti hai। nirnay theek nahin hoga। sada moonjha hua hoga। kya karoon, kya na karoon, spashta nirnay nahin hoga। aur vyartha sankalp ki gati bahut fast hoti hai। vyartha sankalp ka to sabko anubhav hoga। vikalpa nahin, vyartha ka anubhav sabhi ko hai। to fast gati hone ke kaaran usko control nahin kar paate hain। control khatma ho jaata hai। pareshaani ya khushi gaayab hona ya man udaas rehna, apne jeevan se maza nahin aana - ye vyartha sankalp ki nishaaniyaan hain। kaiyon ko maaloom hi nahin padta ki meri sthiti aisi hui hi kyon? vo moti-moti baaten dekhte hain ki koi vikarma to kiya hi nahin, koi galti to ki nahin phir bhi khushi kam kyon, udaasi kyon, kyon nahin aaj jeevan mein maza aa raha hai! man nahin lag raha hai। kaaran? vikarma ko dekhte, vikalpa ko dekhte, badi galtiyon ko check karte lekin ye sookshm galti vyartha khajaane ganvaane ki hoti hai। zaroor vesta ka, vyartha ganvaane ka khaata badha hua hai। jaise shaareerik rog pahle bada roop nahin hota, chhota roop hota hai lekin chhote se badhte-badhte bada roop ho jaata hai aur bada roop dikhaai deta hai, chhota roop dikhaai nahin deta hai, vaise ye vyartha ka khaata, ganvaane ka khaata badhta jaata, badhta jaata। paap ka khaata alag hai, ye khajaane ganvaane ka khaata hai। paap to spashta dikhaai deta hai to mahsoos kar lete ho ki aaj ye kiya na iseeliye khushi gum ho gai। lekin vyartha ganvaane ka khaata, uski checking kam hoti hai। aur aap samajhte ho ki chalo, aaj ka din bhi beet gaya, achha hua, koi aisi galti nahin ki, lekin ye check kiya ki apne sankalp ke shreshtha khajaane ko jama kiya ya vyartha ganvaaya? yadi jama nahin hoga to ganvaane ka khaata hoga na! andar samajh mein aata hai ki bahut kuchh kar rahe hain, lekin khaata check karo ki aaj kya-kya khajaana jama kiya? check karna aata hai? apna checker bane ho ya doosre ka checker bane ho? kyonki apne ko andar se dekhna hota hai, doosre ko baahar se dekhna hota hai, vo sahaj ho jaata hai। to baapdaada dekh rahe the ki jo vishesh shreshtha sankalpon ka khajaana hai woh vyartha bahut jaata hai। pata hi nahin padta hai ki vyartha gaya ya samartha hai?

brahma baap ko economy ka avtaar kehte hain। aap sabhi kaun ho? aap bhi master ho ya nahin? economy nahin aati hai? kharcha karna aata hai! vaise double foreigners ko laukik jeevan ke hisaab se jama ka khaata banaana kam aata hai। khaaya aur kharcha, khatma। bank balance kam rakhte hain। lekin ismen to economy ka avtaar banna padega। to baapdaada dekh rahe the ki jitna mila hai, jitna sankalp ka shreshtha khajaana jama hona chaahiye utna nahin hai, vyartha ka hisaab jyaada dekha। agar sankalp vyartha hua to aur khajaane vyartha svatah hi ho jaate hain। sankalp vyartha to karma aur bol kya hoga? vyartha hi hoga na! foundation hai sankalp। to sankalp ko check karo। halka nahin chhodo। theek hai, sirf do minute hi to hua, jyaada nahin hua... lekin do minute mein aap check karo ki kitne sankalp chalte hain? vyartha sankalp to tej hote hain na! ek second mein aabu se America pahunch jaayenge। vaise pahunchne mein kitne ghante lagte hain! to itni fast gati hai, us gati ke pramaan check karo, apne sankalp shakti ki bachat karo aur phir raatri ko check karo। agar attention de karke koi bhi cheez ki bachat karte hain to chaahe bachat thodi ho lekin bachat ki khushi extra hoti hai। agar 10 pound ya dollar kharcha hona hai aur aapne ek pound ya dollar bacha liya to ek pound ki badi khushi hogi ki bachaakar aaye hain। to apne sankalpon ke oopar controlling power rakho। ye nahin kaho - chaahte to nahin the, samajhte to hain lekin kya karen ho jaata hai...। kaun kehta hai ho jaata hai? maalik ya gulaam? maalik ke to control mein hote hain na। agar maalik ko bhi koi dhokha de de to vo maalik hai kya? to ye check karo - controlling power hai? ek to bachat karo, vesta ke bajaay best ke khaate mein jama karo aur doosra agar bachat nahin kar sakte ho to vyartha ko samartha sankalpon mein parivartan karo। yadi control nahin ho sakta hai to parivartan to kar sakte ho na? uski raphtaar ko jaldi se change karna। nahin to aadat pad jaati hai। ek ghante ko bhi check karo to ek ghante mein bhi dekhenge ki 5-10 minute bhi jo vesta sankalp ja rahe the, woh 5 minute bhi vesta se best mein jama ho gaye to 12 ghante mein 5-5 minute bhi kitne ho jaayenge? aur khushi kitni hogi? aur jitna shreshtha sankalpon ka khaata jama hoga to samay par jama ka khaata kaam mein aayega। nahin to jaise sthool dhan mein agar jama nahin hota to samay par dhokha kha lete hain। aise yahaan bhi jab koi badi pareeksha aa jaati hai to man aur buddhi khaali-khaali lagti hai, shakti nahin lagti hai। to kya karna hai? jama karna seekho। agle varsha agar dekhen to sabke shreshtha sankalpon ka khaata bharpoor ho। khaali-khaali nahin ho। yahi shreshtha sankalpon ka khajaana shreshtha praalabdha ka aadhaar banega। to jama karna aata hai? raajayogi arthaat check karna bhi aata aur jama karna bhi aata। jiska khaata jama hoga uski chalan aur chehra sada hi bharpoor dikhaai dega। aise nahin, aaj dekho to chehra bada chamak raha hai aur kal dekho to udaasi ki lahar - aisa nahin hoga। saare din mein check karo to aapke pose kitne badalte hain? kabhi check kiya hai? bahut pose badalte hain। baapdaada to sabke pose dekhte hain na! kabhi-kabhi dekhte hain ki kai bachche karma karne mein itna time nahin lagaate lekin kiye hue karma ke pashchaataap mein time bahut ganvaate hain। phir kehte hain teen din ho gaye, khushi gum ho gai hai। kyon khushi gum hui, kahaan gai, kaun le gaya? khajaana to aapka hai lekin le kaun gaya? pashchaataap karna achhi cheez hai, kyonki pashchaataap parivartan karaata hai lekin usmein jyaada time nahin lagaao। pashchaataap ka rona karenge to saara saptaah rote rahenge। pashchaataap kiya, bahut achha lekin pashchaataap karna aur praapti ki khushi laana। aage ke liye second mein nirnay karo ki ye karna hai ya ye nahin karna hai। pahle sunaaya hai na - not aur dot ye donon shabd yaad rakho। not socha aur dot lagaaya। chaar ghanta rote rahe, chalo paani nahin aaya, andar rote rahe। aadha ghanta paani bahaaya aur chaar ghanta man se roya to itna pashchaataap nahin karo। yeh bahut hai। pashchaataap ki bhi koi had rakho।

baapdaada ko double foreigners ki ek visheshta bahut achhi lagti hai, rona nahin achha lagta lekin ek visheshta achhi lagti hai। kaun si? sachchi dil par saaheb raazi। sach bataane mein darenge nahin, chhipaayenge nahin। to sachchi dil hai iske kaaran baap ke double pyaar ke bhi paatra ho। to sachchi dil rakhi, saaheb ko to raazi kar liya lekin parivartan bhi phir itna jaldi karna chaahiye। usko baar-baar apne andar mein varnan nahin karo - ye ho gaya, ye ho gaya...। ho gaya, finish। aage ke liye attention। lekin kabhi-kabhi attention ke bajaay tension kar lete ho, vo nahin karna hai। bade te bada justice bano। yahaan bhi chief justice hote hain na, aap to chief justice ke bhi chief ho। apne prati jaldi se jaldi justice karo - wrong, right। wrong hai to not aur dot। aisa nahin hota to aise hota, aise nahin karte to aisa hota... ye ganvaane ka khaata jama karte hain। kamaai khatma ho jaati, jama ka khaata khatma hota। socho lekin vyartha nahin। aur bachaakar dikhaao - ek ghante se itna bachaaya, ye result dikhaao ki vyartha chaalu hua lekin hamne change kiya aur jama kiya। vesta ko bachaao। ye bachat ka khaata bahut khushi dilaayega।

is varsha baapdaada sabhi ke bachat ka khaata bharpoor dekhna chaahte hain। kar sakte ho na? to abhi fast gati se karna kyonki time bhi to fast ja raha hai na! phir dekhenge - ismen number one kaun jaata hai? bachat ka khaata kiska sabse jyaada hota hai? bachat ke khaate mein nambarvaar kaun-kaun hote hain, vo list nikaalenge। aur agar aapne sankalp ko control kiya to auron ko control karne ki mehnat nahin karni padegi। kai kehte hain bolna nahin chaahte hain lekin pata nahin mukh se nikal gaya। lekin jab bol nikalta hai ya karma bhi hota hai to pahle to sankalp aata hai। agar kisse krodh bhi karna hai to pahle sankalp mein plan banta hai - aise karunga, aise boloonga, ye kya samajhta hai... plan chalta hai। phir samay ko bhi usmein use karte hain। samay dekhte rahenge kab aata hai, kaun aata hai...। to sankalp ke khajaane ke peechhe samay ka khajaana bhi vesta jaata hai। sambandh hai। to sankalp ko bachaane se samay ko, bol ko bachaana svatah hi ho jaayega।

to varsha beetta ja raha hai। abhi sankalp mein saadhaaran sankalp nahin karo, pratigya karo। shareer jaaye lekin pratigya nahin jaaye। kitna bhi sahan karna pade, parivartan karna pade lekin pratigya nahin todo। isko kaha jaata hai dridh sankalp। sochte bahut achha ho, baapdaada bhi khush ho jaate hain। ye karenge, ye karenge, ye nahin karenge - khush to kar dete ho lekin ismen dridhta dvaara sada shabd add karo। thoda samay to prabhaav dikhaate ho। uske liye jaise pahle sunaaya na ki apne ko sada economy ka avtaar samjho। saath-saath economy, eknaami aur ekaantavaasi। jyaada bol mein nahin aao। ekaantavaasi bano। dekha jaata hai jo bol mein saara din aate hain unke sankalp, samay sab khajaane jyaada vesta hote hain। ekaantavaasi ka double arth hai। sirf baahar ki ekaanta nahin lekin ek ke ant mein kho jaana, ekaanta। nahin to sirf baahar ki ekaanta hogi to bor ho jaayenge, kahenge - pata nahin din kaise beetega! lekin ek baap ke ant mein kho jaao। jaise saagar ke tale mein chale jaate hain to kitna khajaana milta hai। ant mein chale jaao arthaat baap se jo praaptiyaan hain usmein kho jaao। sirf oopar-oopar ki lahron mein nahin lahraao, ant mein chale jaao, kho jaao। phir dekho kitna maja aata hai। to sarva khajaanon mein economy karo, aur ek baap doosra na koi, isko kehte hain eknaami। aise sthiti mein rahne vaale apne sarva khajaanon ko jama kar sakenge, nahin to jama nahin hota hai। to economy karna jaante ho na? achha!

chaaron or ke roohaani sachche diamond aatmaon ko, sada economy ke avtaar vishesh aatmaon ko, sada eknaami, ekaanta-priy vishesh aatmaon ko apne vibration vritti ki chamak se vishwa mein prakaash phailaane vaale chamakti hui aatmaon ko baapdaada ka yaad-pyaar aur namaste।

daadiyon se:- sab kaarya saphal hue hi pade hain। saphalta swaroop aatmaayen nimitta ho। aap sabhi nimitta aatmaayen kaun-se sitaare ho? saphalta ke sitaare ho na! ye saara sangathan saphalta ke sitaare hain। yeh saara sangathan brahman parivaar ke taara mandal mein saphalta ke sitaare chamakte hue hain। achha।

vardaan:- khushi ke khajaane se anek aatmaon ko maalaamaal banaane vaale sada khushanseeb bhav

khushanseeb unhein kaha jaata jo sada khush rehte hain aur khushi ke khajaane dvaara anek aatmaon ko maalaamaal bana dete hain। aajkal har ek ko vishesh khushi ke khajaane ki aavashyakta hai, aur sab kuchh hai lekin khushi nahin hai। aap sabko to khushiyon ki khaan mil gai। khushiyon ka variety khajaana aapke paas hai, sirf is khajaane ke maalik ban jo mila hai vo svayan ke prati aur sarva ke prati use karo to maalaamaal anubhav karenge।

slogan:- anya aatmaon ke vyartha bhaav ko shreshtha bhaav mein parivartan kar dena hi sachchi seva hai।