Murli du jour du lundi 6 décembre 2021

06-12-2021 praatahmurli om shanti "baapdaada"' madhuban

“meethe bachche - daan mein di hui cheez kabhi bhi vaapis nahin lena, vaapis lenge to aasheervaad ke badle shraap mil jaayega''

prashn:- kaun sa nishchay pakka ho jaae to kisi bhi virodh ka saamna kar sakte hain?

uttar:- agar nishchay ho jaae ki hamko bhagwan mila hai, use yaad kar humein vikarma vinaash karne hain, vishwa ki baadshaahi leni hai to sab opposition khatma ho jaayenge। saamna karne ki shakti aa jaayegi। nishchay ki kami hai to moonjh jaate hain। phir gyaan ko chhod bhakti mein lag jaate hain।

geet:- tumhein paake hamne jahaan pa liya hai…

om shanti। yeh geet kaun sunte hain? bachche sunte hain vahi arth ko bhi samajhte hain। praja bhi jo sunti hai woh bhi vishwa ka maalik banti hai। jaise bhaaratvaasi sab kehte hain hamaara bhaarat, vaise vahaan bhi yatha raaja raani tatha praja, sab samajhte hain vishwa ke maalik hain। jaise yooropvaasi aaye to woh bhi kehte the ham hindustaan ke maalik hain। us samay phir hindustaani nahin kahenge ki ham hindustaan ke maalik hain। woh gulaam the। raajaai saari unhon ke haath mein thi। phir hamaara raajya bhaagya raavan ne chheena। abhi hamko apna raajya chaahiye। yeh paraaya raajya hai। gaaya bhi jaata hai doordesh ke rahne vaale। ab tum apna raajya le rahe ho। tum koi ke liye ladte nahin ho। apne liye hi tum sab kuchh karte ho। woh sena ladti hai apne president va prime minister ke liye। bade aadmi to woh bante hain na। unko nasha achha rehta hai phir bhi abhi kehte hain na - bhaarat hamaara hai। parantu bhaaratvaasiyon ko yeh pata nahin hai ki yeh koi hamaara raajya nahin hai। yeh raavan ka raajya hai, jismen ham rah rahe hain। raamraajya mein aise nahin kahenge ki yeh paraaya hai। abhi bhaarat par raavan ka poora raajya hai। raam ka raajya tha, devtaaon ka raajya tha, abhi nahin hai। tum jaante ho 5 hajaar varsha ke baad ham raajya le rahe hain। kisse? paramatma baap se। raam akshar kahne se log moonjhate hain isliye behad ka baap kehna theek hai। baap akshar bahut meetha hai। baap hi varsa yaad dilaate hain। ek baap ke sivaae aur sab kuchh bhool jaana hai। ham aatmaayen baap se varsa le rahi hain। baap aakar tumko aatma-abhimaani banaate hain। ham aatma hain। aatma kitni chhoti maheen hai। usmein 84 janmon ka part bhara hua hai। yeh moti buddhi vaale manushya nahin jaante hain। na samjha sakte hain। baba se varsa le rahe hain, kitna sahaj hai। parantu maaya bhula deti hai isliye bachchon ko mehnat karni padti hai। ismen koi hathiyaar, baarood ki baat nahin। na koi drill aadi seekhni hai, na koi shaastra aadi uthaana hai। sirf baba ko yaad karna hai। baap jo sunaate hain woh dhaaran karna hai। ham apna raajyabhaagya le rahe hain। jaise naatak mein actor part bajaakar phir kapde badli kar apne ghar jaate hain, vaise tumhaari buddhi mein bhi hai ki ab naatak poora hone vaala hai। ab ashareeri bankar ghar jaana hai। ham har 5 hajaar varsha ke baad part bajaate hain। aadhaakalpa raajya karte, aadhaakalpa gulaam ban jaate। bachchon ko koi jaasti takleeph nahin dete hain। buddhi mein sirf yaad rahni chaahiye। purushaartha kar jitna ho sake yeh bhoolna nahin chaahiye। ab naatak poora hota hai। baaki thoda samay hai, hamko jaana hai। aise-aise apne saath baaten karte-karte tum paavan ban vaapis chale jaayenge। har ek bachcha jaan sakta hai ki main baba ko kitna yaad karta hoon। chaahe koi chart likhe ya na likhe। parantu buddhi mein to rehta hai na। to saare din mein hamne kya-kya kiya? jaise vyaapaari log apni muraadi sambhaalte hain, raatri ko। yeh bhi vyaapaar hai। raatri ko sone ke samay jaanch karte hain saare din mein baap ko kitna yaad kiya? kitnon ko baap ka parichay diya? jo hoshiyaar hote hain unka dhandha achha chalta hai। buddhu hoga to dhandha bhi aise hi chalega। yeh to apni kamaai karni hai। baap sirf kehte hain - mujhe yaad karo, chakra ko yaad karo to chakravarti raaja banenge। ismen tu mach aashaayen nahin honi chaahiye। gaanv mein rahne vaalon ko aashaayen kam rehti hain, saahookaaron ko bahut hoti hain। woh apni gareebi mein hi khush rehte hain। rotla khaane par hir jaate hain (sookhi roti khaane ki aadat pad jaati hai)। saahookaaron mein ichchhaayen bahut hoti hain। maa baap ko hi tang kar dete hain। baba anubhvi hai। gareebon par raham bhi aata hai। gareeb dekhenge, itna bada aadmi gyaan sunta hai to ham bhi sunen। chitra to baba ne bahut banvaaye hain। koi kehte hain hamko service chaahiye। baba kehte hain pahle tum hoshiyaar bano phir service par jaao kyonki aajkal bhakti ka bhi jor hai। ek taraph samjhaao, doosre taraph gurooon ki chakri chalti hai। woh dara dete hain - tum agar bhakti nahin karenge to tumko phal kaise milega? bhakti se to bhagwan milta hai। jab tak is gyaan mein pakka ho jaae, poora nishchay ho jaae ki hamko bhagwan mila hai, woh hamko kehte hain ki mujhe yaad karo to vikarma vinaash ho jaayen। jab yeh pakka nishchay jam jaaye tab hi kisse saamna kar saken। tumhaare se hi opposition hai। tum ek baat kehte woh doosri baat kehte। duniya mein bahut math-panth hain, jahaan manushya jaakar kuchh na kuchh sunkar aate hain। geeta ka bhi bhinna-bhinna arth sunaate hain, to manushya phans padte hain। sannyaasi kabhi grihasthiyon ko nahin kahenge ki vikaar mein nahin jaao। agar woh kahen bhi ki nirvikaari bano phir kya hoga? em-object to kuchh hai nahin। ulta raasta bataane vaale duniya mein bahut hain। sachcha raasta bataane vaale hain thode। un par bhi maaya ka bahut vaar hota hai। dil kahegi ki pavitra banen parantu maaya buddhi ko phiraati rahegi। bahut kharaab khyaalaat laati rahegi। maaya ki ladaai hai bahut। chalte-chalte toofaan bahut aate hain। agar koi bhi vikaar ka bhoot andar hoga to dil ko khaata rahega। koi ko kahega krodh ka daan do aur khud krodh karte rahenge to log kahenge tum khud krodh karte rehte ho phir hamko kaise kehte ho? to krodh ko bhi chhodna hi pade। krodh koi chhipaakar to nahin kiya jaata hai। krodh mein to aavaaj bahut hota hai। aapas mein ladte hain। ek do ko gaali dete hain। baba dekhte hain - krodh ka bhoot nikalta hi nahin hai। koi-koi yahaan sammukh baba ke hote bhi krodh kar lete hain। bahuton mein krodh ka bhoot aa jaata hai, yeh bahut kharaab hai। tang karte hain। baba to phir pyaar se samjhaate hain। agar naam badnaam karenge to phir pad bhi bhrashta kar denge। yeh to samjhaana chaahiye ki tumne 5 vikaar baba ko daan diye hain to phir vaapas kyon lete ho। agar phir krodh kar liya to grahan chhootega nahin। woh phir vriddhi ko paata hai। baap ki aasheervaad ke badle shraap mil jaata hai kyonki baap ke saath dharmaraaj bhi hai। yeh bhi drama mein noondh hai। krodh karna yeh bhi paap hai, jinmen 5 vikaar hain unko paap aatma kaha jaata hai। satayug mein hain sab punya aatma। vahaan koi paap nahin karte। abhi janma-janmaantar ke paapon ka bojha sir par bahut hai। pahle yogbal se kat karna hai। maaya badi kharaab hai। lobh bahuton mein hai। kapde ka, joote ka, paai paise ki baat ka lobh hai, to jhooth bolte rehte hain। yeh sab lobh ki nishaaniyaan hain। yahaan to sab kuchh milta hai। baahar mein to ghar-ghar mein khit-khit lagi hui hai। sang bhi bahut kharaab hai। pati brahman, to stri shoodra। stri braahmani to pati shoodra। ghar mein hi hans aur bagule, bahut khitpit rehti hai। apne ko shant rakhne ki yukti rakhni hoti hai। gharbaar chhodna bhi baba allow nahin karte। aise bahut aashram hain jahaan baal bachchon sahit jaakar rehte hain, phir khitpit to sab jagah hoti hogi। shanti kahaan bhi nahin hai। sachchi-sachchi shanti, sukh, pavitrata 21 janmon ke liye tum bachchon ko ab mil rahi hai। aisi mat aur koi de na sake।

baba kehte hain main kitna doordesh se aata hoon service karne। tumko bhi service karni hai। pradarshani, mele mein bahut nahin samajh sakte। bhal governor opening karte hain, parantu yeh thode hi buddhi mein aata hai ki inhon ko paramatma padhaate hain brahma dvaara, jisse vishwa ka varsa milta hai। sirf kehte hain achha hai। maataayen achha kartavya kar rahi hain, shreshthaachaari bana rahi hain। bhal yeh bhi likhte hain ki main maanta hoon ki geeta bhagwan ne gaai hai। likh diya parantu buddhi mein thode hi baithta hai, na purushaartha chalta hai samajhne ka। tumhaari buddhi mein hai ki shivbaaba brahma dvaara kehte hain ki mujhe yaad karo to tum yeh lakshmi-naaraayan banenge। yeh paigaam sabko sunaana hai। tum paigambar ke bachche ho aur jo bhi aate hain, woh dharma sthaapak hain। tum sabko yeh message sunaao ki baba svarga nai duniya ki sthaapna kar rahe hain। baba kehte hain agar tum mujhe yaad karenge aur pavitra rahenge to tum bhi svarga ke maalik ban jaayenge। ghadi-ghadi yeh khyaalaat chalne chaahiye। kachchi avastha hone ke kaaran dhandhe-dhori mein jaate hain to sab kuchh bhool jaata hai। phir jo kuchh mahaavaakya sunte hain, woh bhi vyartha nahin jaate hain। ek-ek ratna kam nahin hai। ek ratna bhi svarga ka maalik bana sakta hai। gaate bhi hain bhaarat hamaara bahut oonch desh hai। tum jaante ho hamaara bhaarat jo svarga tha, woh ab narka bana hai। ab phir baba kehte hain maamekam yaad karo to vikarma vinaash honge। praja to dher banti jaati hai। vriddhi bhi hoti rehti hai। centres khulte hi rehte hain। baap bhi kehte hain gaanv mein jaakar service karo। aise bahut gaanv hain jahaan milkar class karte hain। phir baba ko patra likhte hain।

tum bachchon ka kaam hai brahman dharma ko badhaana, taaki sab manushya devta ban jaayen। yahaan vaala jo hoga woh aur satsangon mein nahin phansega। yahaan mukhya baat hai pavitrata ki। is par hi baap bachchon ke, stri purush ke, purush stri ke dushman ban jaate hain। government bhi kehti hai yeh kya karte? yeh kyon hota hai? parantu dharma mein interfere to kar nahin sakte। sva-raajya to sthaapan kar hi lenge। pahle jo ladaai lagi hai aur ismen raat-din ka farka hai। yeh bombs aadi pahle nahin the। tum jaante ho hamaare raajya mein ladaai ka naam-nishaan bhi nahin hoga। satayug-treta sukh, dvaapar-kaliyug duhkh। nai duniya aur puraani duniya। duniya ek hi hai, sirf nai aur puraani banti hai। ab puraani duniya vinaash ho nai banne vaali hai। yeh puraani duniya ab koi kaam ki nahin rahi hai phir nai duniya chaahiye। dehli mein kitne baar naye mahal bane honge। jo aate hain woh tod-phodkar phir apna naya banaate hain, yaadgaar ke liye। jab badi ladaai lagegi to yeh sab toot phoot jaayega। phir nai duniya mein naye mahal banaayenge। phir jitna jo padhega utna oonch pad paayega। koi achha padhte hain koi kam। yeh to chalta rehta hai।

tum bachche yeh pakka yaad rakho ki hamne ab 84 janma poore kiye hain। ab hamko ghar jaana hai। yeh puraana shareer chhod ham apne ghar jaayen, aisi pakki avastha ho jaae phir aur kya chaahiye। aisi avastha mein koi shareer bhi chhode to bahut oonch kul mein janma lenge। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apni kamaai jama karne ke liye baap aur chakra ko yaad karte rehna hai। maaya ki chakri mein kabhi nahin aana hai। tu mach aashaayen nahin rakhni hain।

2) manushyon ko devta banaane ke liye apne brahman dharma ko badhaana hai। gaanv-gaanv mein jaakar seva karni hai।

vardaan:- baar-baar haar khaane ke bajaae balihaar jaane vaale master sarvashaktimaan vijayi bhav

svayan ko sada vijayi ratna samajhkar har sankalp aur karma karo to kabhi bhi haar ho nahin sakti। master sarvashaktimaan kabhi haar nahin kha sakte। yadi baar-baar haar hoti hai to dharmaraaj ki maar khaani padegi aur haar khaane vaalon ko bhavishya mein haar banaane padenge, dvaapar se anek moortiyon ko haar pahnaane padenge isliye haar khaane ke bajaae balihaar ho jaao, apne sampoorn swaroop ko dhaaran karne ki pratigya karo to vijayi ban jaayenge।

slogan:- “kab'' shabd kamjori siddha karta hai isliye “kab'' karenge nahin, ab karna hai।