Murli du jour du jeudi 12 mai 2022

12-05-2022 praatahmurli om shanti "baapdaada"' madhuban

“meethe bachche - is samay boodhe, bachche, javaan sabki vaanaprastha avastha hai, kyonki sabhi ko vaani se pare mukti-dhaam jaana hai, tum unhein ghar ka raasta bataao''

prashn:- baap ki shreemat har bachche ke prati alag-alag hai, ek jaisi nahin - kyon?

uttar:- kyonki baap har bachche ki nabja dekh, circumstance dekh shreemat dete hain। samjho koi nirbandhan hain। boodha hai ya kumaari hai, service ke laayak hai to baba raay denge is seva mein poora lag jaao। baaki sabko to yahaan nahin bitha denge। jiske prati baap ki jo shreemat milti hai usmein kalyaan hai। jaise mama baba, shivbaaba se varsa lete hain aise follow kar un jaisi service kar varsa lena hai।

geet:- bholenaath se niraala…

om shanti। meethe-meethe sikeeldhe bachchon ne geet suna। shiv ko bholaanaath kaha jaata hai। aur yeh jo damru bajaate hain unko shankar kah dete hain। yahaan kitne aashram hain, jahaan ved, shaastra, upnishad aadi sunaate hain, yeh bhi jaise damru bajaate hain। kitne aashram hain jahaan manushya jaakar rehte bhi hain। parantu em object koi bhi hai nahin। samajhte hain guru log hamko vaani se pare shantidham le jaayenge। is vichaar se jaakar rehte hain ki yahaan hi praan tyaagen, parantu vaapis to koi bhi ja nahin sakte। vo log to apni-apni bhakti aadi sikhlaate hain। yahaan to bachche jaante hain sachcha-sachcha yeh vaanaprastha hai। bachche boodhe javaan sabhi vaanaprasthi hain। baaki muktidhaam mein jaane ke liye purushaartha kara rahe hain। aisa aur koi nahin hoga jo sadgati athva vaani se pare jaane ka raasta bataave। gati sadgati daata ek hi hai। baap aise nahin kah sakte ki grihastha vyavhaar ko chhodkar yahaan baith jaao। haan, jo service ke laayak hain unko rakha ja sakta hai। auron ko bhi vaanaprastha ka raasta bataana hai kyonki abhi sabhi ka vaani se pare jaane ka samay hai। vaanaprastha athva muktidhaam mein le jaane vaala ek hi baap hai। us baap ke paas tum baithe ho। vo log bhal vaanaprastha lete hain parantu vaapis to koi bhi ja nahin sakte। vaanaprastha mein le jaane vaala ek baap hai vahi achhi mat denge। koi kahe baba ham gharbaar le yahaan aakar baithen। nahin, dekhna hota hai yeh service laayak hai va nahin। koi bandhanmukta hain, bujurga hain, serviceable hain to unko shreemat di jaati hai। jaise bachche kehte hain seminar karo to service ki yuktiyaan seekhen। kanyaaon ke saath-saath maataayen, purush bhi seekhte jaayenge। seminar to yeh hai na। baba roz shiksha dete rehte hain - kaise kisko samjhaana hai। raay dete rehte hain। pahle to ek hi baat samjhaao। parampita paramatma jisko yaad karte hain woh tumhaara kya lagta hai। agar baap hai to baap se to varsa milna chaahiye। tum to baap ko jaante nahin ho। kah dete ho sabmen bhagwan hai। kan-kan mein bhagwan hai phir tumhaara kya haal hoga! abhi tum bachche jaante ho ham baba ke sammukh baithe hain। baba hamko laayak banaakar, kaante se phool banaakar saath le jaayenge baaki aur to sab jangal ka hi raasta bataate hain। baap to kitna sahaj raasta bataate hain। second mein jeevanmukti gaai hui hai। woh koi jhooth thode hi hai। baba kaha maana tum jeevanmukta ho gaye। baba pahle-pahle apne ghar le jaate hain। tum sab apne ghar ko bhoole hue ho na। kehte hain god father sab messengers ko bhej dete hain - dharma sthaapan karne, phir sarvavyaapi kyon kehte? oopar se bhej dete hain na। bolte ek hain phir maante nahin। baap dharma sthaapan arth bhej dete hain to unki sanstha bhi unke peechhe aane lag padegi। pahle-pahle hai devi devtaaon ki sanstha। pahle-pahle aadi sanaatan devi-devta dharma vaale lakshmi-naaraayan aayenge apni praja sahit, aur koi praja sahit nahin aate। woh ek aayega phir doosra, teesra aayega। yahaan tum sab taiyaar ho rahe ho baap se varsa lene। yeh school hai। ghar mein rehte ek ghadi, aadhi ghadi...aadhe ki pun aadh। ek second mein tumko sirf batlaate hain - parampita paramatma se tumhaara kya sambandh hai। mukh se kehte bhi hain parampita... woh to sabka baap, creator hai phir bhi baap na samjhe to kya kahenge! baap svarga ka rachayita hai to zaroor svarga ki baadshaahi denge। bhaarat ko diya hua hai na। nar se naaraayan banaane vaala raajayog mashhoor hai। yeh satya naaraayan ki katha bhi hai। amraktha bhi hai, teejri ki arthaat teesra netra milne ki katha bhi hai। tum bachche jaante ho baba hamko varsa de rahe hain। baap shreemat dete hain। unki mat se zaroor kalyaan hi hoga। baba har ek ki nabja dekhte hain। unko koi bandhan nahin hai। service bhi kar sakte hain। baap laayak dekhkar phir direction dete hain। circumstance dekh kaha jaata hai - tum yahaan rah sakte ho, service bhi karte raho। jahaan-jahaan jaroorat padegi, pradarshani mein to bahuton ki jaroorat padti hai। bujurga bhi chaahiye, kanyaayen bhi chaahiye। sabko shiksha milti rehti hai। yeh hai padhaai। bhagvaanuvaach, bhagwan kaha jaata hai niraakaar ko। tum aatmaayen unke bachche ho। kehte ho O god father to unko phir sarvavyaapi thode hi kahenge। laukik baap sarvavyaapi hai kya! nahin, tum father kehte ho aur gaate bhi ho patit-paavan baap hai to zaroor yahaan aakar paavan banaayenge। tum bachche jaante ho patit se paavan ban rahe hain।

baap kehte hain mere 5 hajaar varsha baad phir se aakar mile hue bachche। tum phir se varsa lene aaye ho। jaante ho raajdhaani sthaapan ho rahi hai। jaise mama baba shivbaaba se varsa lete hain, ham bhi unse lete hain, follow karo। mama baba jaisi service bhi karo। mama baba nar se naaraayan banaane ki katha sunaate hain। ham phir kam kyon sunen। jaante ho vahi sooryavanshi phir chandravanshi bhi banenge। pahle to sooryavanshi mein jaana padega na। samajh to hai na। bigar samajh school mein koi baith na sake। baba shreemat dete hain। ham jaante hain inmen to baba ki praveshta hai। nahin to prajaapita kahaan se aaye। brahma to sookshmavtanvaasi hai। prajaapita to yahaan chaahiye na। baap kehte hain brahma dvaara main sthaapna karta hoon। kiski? braahmanon ki। is brahma mein pravesh karta hoon। tum aatmaayen bhi shareer mein pravesh karti ho na। mujhe kehte hain gyaan ka saagar। to ham niraakaar gyaan kaise sunaaoon। krishna ko to gyaan ka saagar nahin kahenge। krishna ki aatma bahut janmon ke ant mein gyaan lekar phir krishna bani hai, abhi nahin hai। tum jaante ho bhagwan dvaara raajayog seekh devi-devta svarga ke maalik bane hain। baap kehte hain kalpa-kalpa tumko raajayog sikhaata hoon। padhaai se raajaai milti hai। tum raajaaon ka raaja banenge। tumhaari em object hi yeh hai। tum aaye ho phir se so sooryavanshi devi-devta banne। ek devi-devta dharma ki sthaapna ho rahi hai। abhi to anekaanek dharma hain। anek guru hain। woh sab khalaas ho jaayenge। in sab gurooon ka guru sadgati daata ek baap hai। saadhu logon ki bhi sadgati karne aaya hoon। aage chal woh bhi tumhaare aage jhukenge, kalpa pahle muaaphik।

tum bachchon ki buddhi mein drama ka saara raaz hai। jaante ho sookshm vatan mein hain brahma, vishnu, shankar, yeh phir hai prajaapita। kehte hain brahma ke boodhe tan mein pravesh karta hoon। inko bhi kehte hain he bachche, tum sab brahman ho tum par kalash rakhta hoon। tumne itne janma liye hain। is samay hai hi raurav narka, baaki to koi nadi nahin hai jisko narka kaha jaae। garud puraan mein to bahut baaten likh di hain। ab baba bachchon ko baith samjhaate hain। yeh bhi to padha hua hai na। to ab bholaanaath baap tum bhole bachchon ko baith samjhaate hain। gareeb bhole bachchon ko phir oonch te oonch saahookaar banaate hain। tum jaante ho sooryavanshi maalik bante hain। phir aahiste-aahiste girte-girte kya ho gaye hain। kaisa wonderful khel hai। svarga mein kitne maalaamaal the। abhi bhi raajaaon ke bahut bade-bade mahal hain। jaypur mein bhi hain। abhi hi aise-aise mahal hain to aage vaale pata nahin kaise honge। government house aise nahin bante hain। raajaaon ke mahal banaane ka bhabhka hi alag hai। achha phir svarga ka model dekhna ho to jaao ajmer mein। ek model banaane mein bhi mehnat achhi ki hai। dekhne se tumko kitni khushi hogi। yahaan to baba jhat saakshaatkaar kara dete hain। jo divya drishti se dekhte hain woh phir tumko practical mein dekhna hai। bhakti maarga mein bhakton ko bhal saakshaatkaar hota hai parantu woh koi baikuntha ke maalik thode hi banen। tum to practical maalik bante ho। abhi to hai hi narka। ek do ko kaatte, ladte rehte hain। bachche baap ka, bhaai ka bhi khoon karne mein deri nahin karte hain। satayug mein ladaai aadi ki to koi baat hi nahin। ab ki kamaai se tum 21 janmon ke liye pad paate ho। to kitni khushi honi chaahiye। pahli baat hai agar baap ka parichay aur baap ki biography ko na jaanen to baaki baba kahne se phaayda hi kya, itne daan punya karte to bhaarat ka yeh haal ho gaya hai। parantu yeh samajhte koi nahin hain। kehte hain bhakti ke baad bhagwan milega। parantu kab aur kisko milega! bhakti to sab karte parantu sabko raajaai to nahin milegi। kitni gunjaais hai samajhne ki। tum koi ko bhi kah sakte ho, yeh shaastra aadi sab bhoolo, jeete ji maro। brahm tatva hai। usse varsa to nahin mil sakta hai। varsa to baap se hi milta hai। kalpa-kalpa ham lete hain। koi nai baat nahin hai। ab naatak poora hone vaala hai। hamko shareer chhod vaapis ghar jaana hai। jitna yaad karenge to ant mati so gati hogi। inko kayaamat ka samay kaha jaata hai। paap aatmaon ka hisaab-kitaab chuktu hona hai। ab punya aatma banna hai yogbal se। bhambhor ko aag lagegi। aatmaayen chali jaayengi vaapis। ek dharma ki sthaapna hoti hai to anek dharma zaroor vaapis chale jaayenge। shareer thode hi saath le jaayenge।

koi kahe moksha mile। parantu yeh ho kaise sakta hai, jabki bana banaaya drama hai, jo sadaiv chalta hi rehta hai। inki end kabhi hoti nahin। anaadi chakra kaise phirta hai so ab baap baith raaz samjhaate hain। yeh sab baaten samjhaani pade। jab jaasti samajhne lag padenge phir vriddhi hone lag padegi। yeh tumhaara bahut ooncha dharma hai, inko chidiya kha jaati hai aur dharmo ko chidiya nahin khaati। tum bachchon ko is duniya mein koi shauk nahin rakhna chaahiye - yeh kabristaan hai। puraani duniya se kya laagat (lagaav) rakhni hai। America mein jo sensible hain woh samajhte hain koi prerak hai। maut saamne khada hai। vinaash to hona hi hai। sabki dil to khaati hi rehti hai। drama ki bhaavi aisi bani hui hai। shivbaaba to daata hai, inko to koi aasakti nahin। niraakaar hai। yeh sab kuchh bachchon ka hai। nai duniya bhi bachchon ki hai। vishwa ki baadshaahi ham sthaapan kar rahe hain, ham hi raajya karenge। baba kitna nishkaami hai। tum baba ko yaad karenge tab tumhaari buddhi ka taala khulega। tum double philanthropist (mahaadaani) ho। tan-man-dhan dete ho, avinaashi gyaan ratna bhi dete ho। shivbaaba ko tum kya dete ho? karneeghor ko dete hain na। eeshvar samarpanam, eeshvar bhookha hai kya? va krishna arpanam karte hain। donon ko bhikhaari bana diya hai। woh to daata hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) puraani duniya ki kisi bhi cheez mein laagat (lagaav) nahin rakhna hai। is duniya mein kisi bhi baat ka shauk nahin rakhna hai kyonki yeh kabristaan hone vaali hai।

2) ab naatak poora hota hai, hisaab-kitaab chuktu kar ghar jaana hai isliye yogbal dvaara paapon se mukta ho punya aatma banna hai। double daani banna hai।

vardaan:- khushi ki khuraak dvaara man aur buddhi ko shaktishaali banaane vaale achal-adol bhav

“vaah baba vaah aur vaah mera bhaagya vaah!'' sada yahi khushi ke geet gaate raho। ‘khushi' sabse badi khuraak hai, khushi jaisi aur koi khuraak nahin। jo roz khushi ki khuraak khaate hain ve sada tandaroosta rehte hain। kabhi kamjor nahin hote, isliye khushi ki khuraak dvaara man aur buddhi ko shaktishaali banaao to sthiti shaktishaali rahegi। aisi shaktishaali sthiti vaale sada hi achal-adol rahenge।

slogan:- man aur buddhi ko anubhav ki seat par set kar do to kabhi upset nahin honge।