Murli du jour du samedi 2 septembre 2023

02-09-2023 praatahmurli om shanti "baapdaada"' madhuban

“meethe bachche - abhi tumhaari jyoti jagi hai, jyoti jagna arthaat brihaspati ki dasha baithna, brihaspati ki dasha baithne se tum vishwa ke maalik ban jaate ho''

prashn:- satayug mein har ghar ki visheshta kya hogi, kaliyug mein har ghar kya ban gaye hain?

uttar:- satayug mein har ghar mein khushiyaan hongi। sabki jyoti jagi hui hogi। kaliyug mein to ghar-ghar mein gami, chinta hai। har ghar mein andhiyaara hai। aatma ki jyoti ujhaai hui hai। baap aaye hain apni jyoti se sabki jyoti jagaane, jisse phir ghar-ghar mein deevaali hogi।

geet:- maata O maata…

om shanti। bachchon ne maa ki mahima suni। yoon vaastav mein upma to ek ki hi hoti hai। maa ko bhi jagat amba banaane vaala, janma dene vaala phir bhi koi aur hai। aisi maa ko bhi janma kisne diya? kahenge patit-paavan param-pita paramatma shiv ne diya। phir bhi mahima ho jaati hai ek hi gyaan saagar, patit-paavan parampita paramatma shivbaaba ki। woh baith bachchon ko apna aur apni rachna ke aadi-madhya-ant ka aur patiton ko paavan banaane ka raaz samjhaate hain। yeh to bachche samajh gaye hain is samay patit raajya hai, jisko raavan raajya kaha jaata hai। abhi dashahra aata hai na। yeh to samjhaaya gaya hai - yeh sab andhashradha ke utsav hain। aise to koi hai nahin ki ek raavan tha, lanka thi। lanka Ceylon ko kaha jaata hai। dikhaate hain vahaan saagar par bandaron ne pul banaai..... । vaastav mein yeh sab hain danta kathaayen। aise to hai nahin ki 10 sheesh vaala koi raavan tha, lanka mein raajya karta tha। phir to unki effigy lanka mein hi jalaani chaahiye। raavan ko jalaane ka bhaarat mein hi rivaaj hai aur koi jagah nahin jalaate। akhbaar mein bhi yahaan ke liye hi padta hai। sabse jaasti utsav maisoor ka mahaaraaja manaate hain। unka shaayad is danta katha se prem dikhaai padta hai। ab is par samjhaana tum bachchon ka kaam hai। effigy to dushman ka banaakar jalaaya jaata hai। jaise aage Hitler ka effigy banaakar jalaate the। dushman to bahuton ke hote hain। ab raavan kiska dushman tha? bhaaratvaasiyon ka dushman tha। parantu dushman ko bhi ek baar jalaaya jaata hai। aise to koi bhi nahin karte jo har varsha dushman ka effigy (but) banaakar jalaate। dushman ka effigy to banaate hain parantu varsha-varsha to nahin jalaate। yeh raavan phir kaun hai jiska bhaarat mein bahut samay se 10 sheesh vaala effigy banaakar jalaate rehte hain? yeh dushman kab se hua hai jo marta hi nahin? aakhreen khatma hoga ya sadaiv rahega hi? tum bachche jaante ho bhaarat hi pavitra tha phir bhaarat ko hi raavan ne apvitra banaaya hai। abhi raavan raajya hai। agar lanka ka raaja tha to raani bhi hogi। tum to yeh baaten maanenge nahin। raavan abhi tak jeeta hai va kya, kuchh bhi samajhte nahin। jeeta hai phir unki effigy banaakar jalaate rehte। ek baar jalaaya phir kya hua? har varsha jalaate rehte hain to tum bachchon ko samjhaana chaahiye। committee ke bade jo bante hain jaise maisoor ka mahaaraaja hai, woh bahut manaate hain। foreigners ko bhi dekhne ke liye bulaate hain। samjhenge shaayad aisa hua hoga। parantu aisa to kabhi hua nahin hai। naatak bana dete hain। raavan ka bhi naatak banaate hain। to is raavan ki baat par samjhaana hai। badi jabardasta baat hai। abhi tum raavan raajya mein baithe ho। patit duniya ko hi raavan raajya kaha jaata hai। abhi raam raajya aur raavan raajya ka raaz tumko samjhaaya gaya hai। raavan 5 vikaaron ko kaha jaata hai aur koi nahin hai।

tum samajh gaye ho raavan ka raajya abhi bhaarat mein hai। bhaarat mein hi dashahra, deepmaala aadi manaate hain। to samjhaana pade। agar raavan jeeta hai to raavan raajya thahra na। raavan hai patit banaane vaala। tum jaante ho 5 vikaar jo ki is samay sarvavyaapi hain, unko hi raavan kaha jaata hai। raavan ke chitra to aage dashahre mein nikle the, ismen tithi-taareekh bhi daalni pade। is samay patit ka vinaash aur paavan ki sthaapna hoti hai। tum patit se paavan ban rahe ho, paavan ban jaayenge phir raavan sampradaay ko aag lagegi। raavan khatma ho jaayega phir satayug mein koi effigy nahin banaani padegi। sab paavan ban jaayenge। aatma mein satopradhaanta ki jab taakat thi to jaagti jyot thi। patit banne se woh jyot ujha gai hai। aatma hi patit bani hai, udne ki taakat nahin hai। 5 vikaaron se aatma iron aged ban gai hai। yeh zaroor samjhaana hai। aatma ko jaagrit karne vaala ek baap hai। yeh to sab kehte hain jyoti swaroop parampita paramatma aayega। ab jyoti swaroop to tum aatma bhi ho, parampita paramatma bhi jyoti swaroop hai। tumhaari aatma ki jyoti bujh gai hai। baaki jaakar jara si rahi hai। manushya marte hain to raat-din unka deeva jalaate hain। deeve ki bahut sambhaal karte hain। ghrit khatma ho jaata hai phir aur daalte hain। aatmaon ka bhi aise hai। baap aakar sabki gyaan se jyoti jagaate hain। jyoti jagi hui kitna samay chalti hai? woh to raat ko jalaate hain phir ghrit daalte jaate hain। tumhaari ab jyoti jag rahi hai। jagte-jagte phir jag hi jaayegi। jyoti bujhne mein 5 hajaar varsha lagta hai phir baap aakar ghrit daalte hain। tumhaari ab jyoti jagi hai phir dheere-dheere kala kam hoti jaayegi। jyoti ujhaai jaayegi। tum jaante ho abhi hamaari jyoti jagti hai phir satayug mein ghar-ghar mein sojhra hoga। bhaarat ki hi baat hai। abhi to ghar-ghar mein andhiyaara hai। khushi hai nahin। tum jaante ho satayug-treta mein ham bahut khush the aur khushi manaate the। sabhi ki jyoti jagi hui rehti hai phir thodi-thodi kamti hoti jaati hai। is samay to bilkul ujhaai hui hai। khaad padi hui hai। baap aakar phir gyaan ka ghrit daalte hain jisse tum phir jaagti jyot ban jaate ho। tumhaare gyaan chakshu khul jaate hain।

tum jaante ho abhi hamaari saari kaaya khalaas ho gai hai, raahu ka grahan lag gaya hai। tumko kaala hone mein kitna samay lagta hai? shuru se lekar thoda-thoda hote phir maaya ka pravesh hone se hi bahut kaale ban jaate ho। abhi tumhaare oopar raahu ki dasha hai। sabse kadi hai raahu ki dasha। abhi phir brihaspati ki dasha baithti hai kyonki abhi vishwa ka maalik banne ke liye tum vrikshapti guru dvaara purushaartha kar rahe ho। woh hai avinaashi guru। kiska? avinaashi aatmaon ka। woh manushya log aatmaon ka guru nahin bante hain। woh manushya ka guru bante hain। abhi baap tumhaari aatmaon ka guru aakar bane hain। vrikshapti parampita paramatma hai। tum samajhte ho ab hamaare oopar brihaspati ki dasha hai। svarga ke maalik to banenge। avinaashi sukh rehta hai, parantu uske liye purushaartha ab karna hai ki ham sukhdhaam ke mahaaraaja-mahaaraani banen। purushaartha to har ek ka apna chalta hai। yeh hai rudra shiv ki paathshaala। woh hai gyaan saagar। tum unki paathshaala mein padh rahe ho। bhagvaanuvaach - main tumko raajayog sikhlaata hoon। avinaashi aatmaon ka avinaashi baap main hoon। ek hai jismaani baap, ek hai roohaani baap। donon contrast bhi bataana hai। roohaani baap kab milte hain, jisko bhakti maarga mein sabhi roohen yaad karti hain। jismaani baap to hai vinaashi। aatmaayen to vinaashi nahin hoti hain। tum jaante ho hamaara jo laukik baap hai woh to janma by janma ham badalte aaye। baap bigar to bachche ka janma ho nahin sakta। tum bachchon ko ab vishaalbuddhi mili hai। tum samajh sakte ho ki kab se ham do baap vaale bante hain। satayug mein to ek hi laukik baap hota hai unko hi yaad karte hain। aatmaon ko us roohaani baap ko yaad karne ki darkaar nahin rehti। aatmaon ko satayug mein to ek hi laukik baap hota hai। vahaan shareer bhi gora milta hai, praalabdha bhogte hain na isliye vahaan baap ko yaad nahin karte। to tumko yeh samjhaana hai। bhakti maarga mein ek hai vinaashi laukik baap, woh to har janma mein doosra milta hai। tum aatma to avinaashi ho, avinaashi baap ko yaad karti ho। kehte bhi hain parampita paramdham mein rahne vaale pita। laukik pita ko kabhi parampita nahin kahenge। yeh do baap ka raaz samjhaana bahut zaroori hai। raavan ka raaz bhi samjhaana hai। raavan raajya arthaat patit raajya abhi hai isliye patit-paavan baap ko bula rahe hain। woh avinaashi baap hai। do baap zaroor siddha karne hain। aatmaon ka bhi baap hai isliye paarlaukik parampita paramatma ko yaad karte hain। har janma mein laukik baap aur aur milta hai phir bhi us roohaani baap ko zaroor yaad karte hain। woh kabhi badalta nahin। baap bhi kehte hain barobar tum mujhe yaad karte the - he parampita paramatma। kab tak tumko yaad karna hai, phir baap kab milta hai? yeh tum abhi jaan gaye ho। jab bhakti ka ant hota hai tab bhakton ko phal dene baap aate hain। baap ne samjhaaya hai - sabhi bhakton ko mukti-jeevanmukti deta hoon। tum jaante ho satayug mein ek hi dharma hota hai, usko one-ness kahenge। kehte hain sabhi milkar ek ho jaaen। parantu sabhi dharma to ek ho nahin sakte। jab ek raajya ho jaata hai to pavitrata, sukh, shanti rehti hai। bhaarat mein raamraajya tha zaroor। abhi yeh raavan raajya hai, isliye raavan ko jalaate rehte hain। to do baap ka raaz samjhaane se jhat samajh jaayenge। avinaashi baap to zaroor hai, nai duniya rachne vaala baap hi hai। nai duniya mein barobar devi-devtaayen hi the phir vahi duniya nai se puraani hoti hai। nai duniya mein kitne janma lete, puraani duniya mein kitne janma lete yeh tum jaante ho। aise bhi nahin ki 84 janmon ke aadha hone chaahiye, 42 janma puraani duniya mein, 42 janma nai duniya mein। nahin। bhaaratvaasiyon ki aayu pahle 100 varsha, 125 varsha thi, abhi to 40-50 varsha bhi mushkil chalti hai। to aadha-aadha ho na sake। 84 janmon ka hisaab to chaahiye na। baap kehte hain tumhaara 84 janmon ka chakra ab poora hua। tum nahin jaante ho, ham samjhaate hain, 84 janmon ka raaz sivaae parampita paramatma ke aur koi samjha na sake। tum baap se sunkar khush hote ho aur phir nai duniya ke liye purushaartha karte ho।

ab yeh bachchon ko siddha kar bataana hai ki ham abhi behad ke paarlaukik baap se behad ka varsa le rahe hain। woh baap aate hi tab hain jab svarga ki sthaapna karte hain। unko kaha hi jaata hai heavenly god father। jab naye ghar ki sthaapna hoti hai tab puraane ghar ko toda jaata hai। likha hua bhi hai sthaapna phir vinaash। sthaapna jab poori ho jaayegi tab vinaash hoga। sthaapna karne vaala hai parampita paramatma, is brahma dvaara। yeh bhi baba ne samjhaaya hai sookshmavtanvaasi ko to prajaapita nahin kahenge। vahaan praja hoti nahin, to zaroor prajaapita brahma yahaan hoga। vahi phir avyakt sampoorn banega। woh to hai avyakt, zaroor vyakta bhi chaahiye jo phir avyakt hona hai। donon abhi dikhaai padte hain। prajaapita brahma yahaan bhi hai, sookshm vatan mein bhi hai। prajaapita to yahaan chaahiye, zaroor prajaapita brahma ke bachche bhi yahaan hi hain। pradarshani mein do baap ka raaz samjhaana hai। kaayda to hai ek-ek ko alag-alag samjhaaya jaata hai। ab vahaan kisko kaise samjhaayenge? samjhaane ke liye to ekaanta chaahiye। vahaan to bahut hangaama hota hai। yahaan to tumko ek dedh ghanta lag jaata hai samjhaane mein। vahaan itni bheed mein to samjhaana bada mushkil ho jaayega। anek prakaar ke dharma vaale hain। koi kya kahenge, koi kya। chupkar to baithenge nahin। tum sunaayenge ek laukik jismaani baap hai, doosra paarlaukik roohaani baap hai। woh hai parampita paramatma। ab brahma dvaara sthaapna kar rahe hain svarga ki। narka ka vinaash bhi saamne khada hai। mahaabhaari ladaai hai na। barobar yeh raajayog bhi hai, raajaai praapta karne ki geeta paathshaala hai। bhagvaanuvaach - sabhi ko do baap hain। shreekrishna ko sabhi aatmaon ka baap nahin kahenge। aatmaon ka baap parampita paramatma kehte hain ki maamekam yaad karo। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) svayan mein gyaan ka ghrit daalte sada jaagti jyot rehna hai। baap ki yaad mein rah raahu ka grahan utaar dena hai।

2) roohaani aur jismaani do baap hain, yeh pahchaan har ek ko dekar behad ke varse ka adhikaari banaana hai।

vardaan:- pravritti mein rehte ek baap ke saath combined rahne vaale deh ke sambandhon se nivrrit bhav

pravritti mein agar pavitra pravritti ka part bajaana hai to deh ke sambandhon se nivrrit raho। main puroosh hoon, yeh stri hai-yeh bhaan svapna mein bhi nahin aana chaahiye। aatma bhaai-bhaai hai to stri purush kahaan se aaye। yugal to aap aur baap ho। yeh to nimitta maatra seva arth hai, baaki combined roop mein aap aur baap ho। aisa samajhkar chalo tab kahenge himmatvaan vijayi aatma।

slogan:- sada santushta aur sada khush rahne vaale hi khushanseeb, teevra purushaarthi hain।