Murli du jour du jeudi 1 août 2024

01-08-2024 praatahmurli om shanti "baapdaada"' madhuban

“meethe bachche - tum pavitra banne ke bigar vaapis ja nahin sakte isliye baap ki yaad se aatma ki battery ko charge karo aur natural pavitra bano।''

prashn:- baba tum bachchon ko ghar chalne ke pahle kaun-si baat sikhlaate hain?

uttar:- bachche, ghar chalne ke pahle jeete ji marna hai isliye baba tumhein pahle se hi deh ke bhaan se pare le jaane ka abhyaas karaate hain arthaat marna sikhlaate hain। oopar jaana maana marna। jaane aur aane ka gyaan abhi tumhein mila hai। tum jaante ho ham aatma oopar se aai hain, is shareer dvaara part bajaane। ham asul vahaan ke rahne vaale hain, abhi vahaan hi vaapis jaana hai।

om shanti। apne ko aatma samajh baap ko yaad karne mein koi takleeph nahin hai, ghutka nahin khaana hai। isko kaha jaata hai sahaj yaad। pahle-pahle apne ko aatma hi samajhna hai। aatma hi shareer dhaaran kar part bajaati hai। sanskaar bhi sab aatma mein hi rehte hain। aatma to independent hai। baap kehte hain apne ko aatma samajh mujh baap ko yaad karo। yeh knowledge abhi hi tumko milti hai, phir nahin milegi। tumhaara yeh shant mein baithna duniya nahin jaanti, isko kaha jaata hai natural shanti। ham aatma oopar se aai hain, is shareer dvaara part bajaane। ham aatma asul vahaan ke rahne vaale hain। yeh buddhi mein gyaan hai। baaki ismen hathayog ki koi baat nahin, bilkul sahaj hai। abhi ham aatmaon ko ghar jaana hai parantu pavitra banne bigar ja nahin sakte। pavitra hone ke liye paramatma baap ko yaad karna hai। yaad karte-karte paap mit jaayenge। takleeph ki to koi baat hi nahin। tum paidal karne jaate ho to baap ki yaad mein raho। abhi hi yaad se pavitra ban sakte ho। vahaan woh to hai pavitra duniya। vahaan us paavan duniya mein is gyaan ki koi darkaar nahin rehti kyonki vahaan koi vikarma hota nahin। yahaan yaad se vikarma vinaash karne hain। vahaan to tum natural chalte ho, jaise yahaan chalte ho। phir thoda-thoda neeche utarte ho। aise nahin ki vahaan bhi tumko yeh practice karna hai। practice abhi hi karna hai। battery ab charge karna hai phir aahiste-aahiste battery discharge hona hi hai। battery charge hone ka gyaan abhi ek hi baar tumko milta hai। satopradhaan se tamopradhaan banne mein tumko kitna samay lag jaata hai! shuru se lekar kuchh na kuchh battery kam hoti jaati hai। mool vatan mein to hain hi aatmaayen। shareer to hai nahin। to natural utarne arthaat battery kam hone ki baat hi nahin। motor jab chalegi tab to battery kam hoti jaayegi। motor khadi hogi to battery thode hi chaalu hogi। motor jab chale tab battery chaalu hogi। bhal motor mein battery charge hoti rehti hai lekin tumhaari battery ek hi baar is samay charge hoti hai। tum phir jab yahaan shareer se karma karte ho phir thodi battery kam hoti jaati hai। pahle to samjhaana hai ki woh hai supreme father, jisko sab aatmaayen yaad karti hain। he bhagwan kehte hain, woh baap hai, ham bachche hain। yahaan tum bachchon ko samjhaaya jaata hai, battery kaise charge karni hai। bhal ghoomo phiro, baap ko yaad karo to satopradhaan ban jaayenge। koi bhi baat na samjho to poochh sakte ho। hai bilkul sahaj। 5 hajaar varsha baad hamaari battery discharge ho jaati hai। baap aakar sabki battery charge kar dete hain। vinaash ke samay sab eeshvar ko yaad karte hain। samjho baadh hui to bhi jo bhakta honge woh bhagwan ko hi yaad karenge parantu us samay bhagwan ki yaad aa nahin sakti। mitra-sambandhi, dhan-daulat hi yaad aa jaata hai। bhal ‘he bhagwan' kehte hain parantu woh bhi kahne maatra। bhagwan baap hai, ham unke bachche hain। yeh to jaante hi nahin। unko sarvavyaapi ka ulta gyaan milta hai। baap aakar sulta gyaan dete hain। bhakti ki department hi alag hai। bhakti mein thokren khaani hoti hain। brahma ki raat so braahmanon ki raat hai। brahma ka din so braahmanon ka din hai। aisa to nahin kahenge shoodron ka din, shoodron ki raat। yeh raaz baap baith samjhaate hain। yeh hai behad ki raat va din। abhi tum din mein jaate ho, raat poori hoti hai। yeh akshar shaastron mein hain। brahma ka din, brahma ki raat kehte hain parantu jaante nahin hain। tumhaari buddhi ab behad mein chali gai hai। yoon to devtaaon ko bhi kah sakte hain - vishnu ka din, vishnu ki raat kyonki vishnu aur brahma ka sambandh bhi samjhaaya jaata hai। trimoorti ka occupation kya hai - aur to koi samajh na sake। woh to bhagwan ko hi kachchha-machchha mein va janma-maran ke chakra mein le gaye hain। raadhe-krishna aadi bhi manushya hain, parantu daivi gunon vaale। abhi tumko aisa banna hai। doosre janma mein devta ban jaayenge। 84 janmon ka jo hisaab-kitaab tha woh ab poora hua। phir repeat hoga। ab tumko yeh shiksha mil rahi hai।

baap kehte hain - meethe-meethe bachchon, apne ko aatma nishchay karo। kehte bhi hain ham paartadhaari hain। parantu ham aatmaayen oopar se kaise aati hain - yeh nahin samajhte hain। apne ko dehdhaari hi samajh lete hain। ham aatma oopar se aati hain phir kab jaayengi? oopar jaana maana marna, shareer chhodna। marna kaun chaahte hain? yahaan to baap ne kaha hai - tum is shareer ko bhoolte jaao। jeete ji marna tumko sikhlaate hain, jo aur koi sikhla na sake। tum aaye hi ho apne ghar jaane ke liye। ghar kaise jaana hai - yeh gyaan abhi hi milta hai। tumhaara is mrityulok ka yeh antim janma hai। amarlok satayug ko kaha jaata hai। abhi tum bachchon ki buddhi mein hai - ham jaldi-jaldi jaaven। pahle-pahle to ghar muktidhaam mein jaana padega। yeh shareer roopi kapda yahaan hi chhodna hai phir aatma chali jaayegi ghar। jaise had ke naatak ke actors hote hain, naatak poora hua to kapde vahaan hi chhodkar ghar ke kapde pahan ghar mein jaate hain। tumhein bhi ab yeh chola chhod jaana hai। satayug mein to thode devtaayen hote hain। yahaan to kitne manushya hain anginat। vahaan to hoga hi ek aadi sanaatan devi-devta dharma। abhi to apne ko hindu kah dete hain। apne shreshtha dharma-karma ko bhool gaye hain tab to duhkhi hue hain। satayug mein tumhaara shreshtha karma, dharma tha। abhi kaliyug mein dharma bhrashta hain। buddhi mein aata hai ki ham kaise gire hain? abhi tum behad ke baap ka parichay dete ho। behad ka baap hi aakar nai duniya svarga rachte hain। kehte hain manamnaabhav। yeh geeta ke hi akshar hain। sahaj raajayog ke gyaan ka naam rakh diya jaata hai geeta। yeh tumhaari paathshaala hai। bachche aakar padhte hain to kahenge hamaare baba ki paathshaala hai। jaise koi bachche ka baap principal hoga to kahenge ham apne baba ke college mein padhte hain। unki maa bhi principal hai to kahenge hamaare maa-baap donon principal hain। donon padhaate hain। hamaare mama-baba ka college hai। tum kahenge hamaare mama-baba ki paathshaala hai। donon hi padhaate hain। donon ne yeh roohaani college va university kholi hai। donon ikatthe padhaate hain। baap ne bachchon ko adopt kiya hai। yeh bahut guhya gyaan ki baaten hain। baap koi nai baat nahin samjhaate hain। yeh to kalpa pahle bhi samjhaani di hai। haan, itni knowledge hai jo din-pratidin guhya hoti jaati hai। aatma ki samjhaani dekho abhi tumko kaise milti hai। itni chhoti si aatma mein 84 janmon ka part bhara hua hai। woh kabhi vinaash nahin hota। aatma avinaashi to unmein part bhi avinaashi hai। aatma ne kaanon dvaara suna। shareer hai to part hai। shareer se aatma alag ho jaati hai to javaab nahin milta। abhi baap kehte hain - bachche, tumko vaapis ghar chalna hai। yeh purooshottam yug jab aata hai tab hi vaapis jaana hota hai, ismen pavitrata hi mukhya chaahiye। shantidham mein to pavitra aatmaayen hi rehti hain। shantidham aur sukhdhaam donon hi pavitra dhaam hain। vahaan shareer hai nahin। aatma pavitra hai, vahaan battery discharge nahin hoti। yahaan shareer dhaaran karne se motor chalti hai। motor khadi hogi to petrol kam thode hi hoga। abhi tumhaari aatma ki jyot bahut kam ho gai hai। ekdam bujh nahin jaati hai। jab koi marta hai to deeva jalaate hain। phir uski bahut sambhaal rakhte hain ki bujh na jaae। aatma ki jyot kabhi bujhti nahin hai, woh to avinaashi hai। yeh sab baaten baap baith samjhaate hain। baba jaante hain ki yeh bahut sweet children hain, yeh sab kaam chita par baith jalkar bhasma ho gaye hain। phir inhon ko jagaata hoon। bilkul hi tamopradhaan murde ban pade hain। baap ko jaante hi nahin। manushya koi kaam ke nahin rahe hain। manushya ki mitti koi kaam ki nahin rehti hai। aise nahin ki bade aadmi ki mitti koi kaam ki hai, gareebon ki nahin। mitti to mitti mein mil jaati hai phir bhal koi bhi ho। koi jalaate hain, koi kabra mein band kar dete hain। paarsi log kuen par rakh dete hain phir panchhi maas kha lete hain। phir haddiyaan jaakar neeche padti hain। woh phir bhi kaam aati hain। duniya mein to dher manushya marte hain। abhi tumko to aapehi shareer chhodna hai। tum yahaan aaye hi ho shareer chhodkar vaapis ghar jaane arthaat marne। tum khushi se jaate ho ki ham jeevanmukti mein jaayenge।

jinhonne jo part bajaaya hai, ant tak vahi bajaayenge। baap purooshaartha karaate rahenge, saakshi ho dekhte rahenge। yeh to samajh ki baat hai, ismen darne ki koi baat nahin hai। ham svarga mein jaane ke liye khud hi purooshaartha kar shareer chhod dete hain। baap ko hi yaad karte rehna hai to ant mati so gati ho jaae, ismen mehnat hai। har ek padhaai mein mehnat hai। bhagwan ko aakar padhaana padta hai। zaroor padhaai badi hogi, ismen daiveegun bhi chaahiye। yeh lakshmi-naaraayan banna hai na। yeh satayug mein the। ab phir tum satayugi devta banne aaye ho। em object kitni sahaj hai। trimoorti mein clear hai। yeh brahma, vishnu, shankar aadi ke chitra na hon to ham samjha kaise sakte। brahma so vishnu, vishnu so brahma। brahma ki 8 bhuja, 100 bhuja dikhaate hain kyonki brahma ke kitne dher bachche hote hain। to unhonne phir woh chitra bana diya hai। baaki manushya koi itni bhujaaon vaala hota thode hi hai। raavan 10 sheesh ka bhi arth hai, aisa manushya hota nahin। yeh baap hi baith samjhaate hain, manushya to kuchh bhi jaante nahin। yeh bhi khel hai, yeh koi ko pata nahin hai ki yeh kab se shuru hua hai। parampara kah dete hain। are, woh bhi kab se? to meethe-meethe bachchon ko baap padhaate hain, woh teacher bhi hai to guru bhi hai। to bachchon ko kitni khushi honi chaahiye।

yeh museum aadi kiske direction se kholte hain? yahaan hain hi maa, baap aur bachche। dher bachche hain। direction par kholte rehte hain। log kehte hain tum kehte ho bhagvaanuvaach to rath dvaara hamko bhagwan ka saakshaatkaar karaao। are, tumne aatma ka saakshaatkaar kiya hai? itni chhoti-si bindu ka saakshaatkaar tum kya kar sakenge! jaroorat hi nahin hai। yeh to aatma ko jaanna hota hai। aatma bhrakuti ke beech rehti hai, jiske aadhaar par hi itna bada shareer chalta hai। abhi tumhaare paas na light ka, na ratna jadit taaj hai। donon taaj lene liye phir se tum purooshaartha kar rahe ho। kalpa-kalpa tum baap se varsa lete ho। baba poochhte hain aage kab mile ho? to kehte hain - haan baba, kalpa-kalpa milte aaye hain kyon? yeh lakshmi-naaraayan banne ke liye। yeh sabhi ek hi baat bolenge। baap kehte hain - achha, shubh bolte ho, ab purooshaartha karo। sab to nar se naaraayan nahin banenge, praja bhi to chaahiye। katha bhi hoti hai satya naaraayan ki। vo log katha sunaate hain, parantu buddhi mein kuchh bhi nahin aata। tum bachche samajhte ho woh hai shantidham, niraakaari duniya। phir vahaan se jaayenge sukhdhaam। sukhdhaam mein le jaane vaala ek hi baap hai। tum koi ko samjhaao, bolo abhi vaapis ghar jaayenge। aatma ko apne ghar to ashareeri baap hi le jaayenge। abhi baap aaye hain, unko jaante nahin। baap kehte hain main jis tan mein aaya hoon, unko bhi nahin jaante। rath bhi to hai na। har ek rath mein aatma pravesh karti hai। sabki aatma bhrakuti ke beech rehti hai। baap aakar bhrakuti ke beech mein baithega। samjhaate to bahut sahaj hain। patit-paavan to ek hi baap hai, baap ke sab bachche ek samaan hain। unmein har ek ka apna-apna part hai, ismen koi interfere nahin kar sakta। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is shareer roopi kapde se mamatva nikaal jeete ji marna hai arthaat apne sab puraane hisaab-kitaab chuktu karne hain।

2) double taajdhaari banne ke liye padhaai ki mehnat karni hai। daivi gun dhaaran karne hain। jaisa lakshya hai, shubh bol hai, aisa purooshaartha karna hai।

vardaan:- akalyaan ke sankalp ko samaapta kar apkaariyon par upkaar karne vaale gyaani tu aatma bhav

koi roz aapki glaani kare, akalyaan kare, gaali de - to bhi uske prati man mein ghrina bhaav na aaye, apkaari par bhi upkaar - yahi gyaani tu aatma ka kartavya hai। jaise aap bachchon ne baap ko 63 janma gaali di phir bhi baap ne kalyaankaari drishti se dekha, to follow father। gyaani tu aatma ka arth hi hai sarva ke prati kalyaan ki bhaavna। akalyaan sankalp maatra bhi nahin ho।

slogan:- manamnaabhav ki sthiti mein sthit raho to auron ke man ke bhaavon ko jaan jaayenge।